शहरात सुरू असलेल्या मालमत्ता सर्व्हेक्षणात नव्याने आढळून आलेल्या मालमत्तांवर महापालिकेने कारवाईची तयारी सुरू केली आहे. आतापर्यंत शहरातील ३ लाख ६० मालमत्तांचे सर्व्हेक्षण पूर्ण केले असून, त्यात ५६ हजार नवीन मालमत्ता आढळून आल्या आहेत. या मालमत्तांचा वापर होत असतानाही त्यांची नोंदणी पालिकेकडे झालेली नाही. त्यामुळे महापालिकेने या मालमत्ताधारकांकडून सहा वर्षांपासून घरपट्टी वसुलीची कारवाई सुरू केली आहे. त्यामुळे नोंदणी न केलेल्या मालमत्ताधारकांच्या अडचणी वाढणार आहेत.
नोंदणी न झालेल्या मालमत्तांना नोटिसा बजावल्या जाणार आहेत. तसेच, कधीपासून प्लॅटमध्ये निवास सुरू केला याचाही पुरावा सादर करावा लागणार आहेत. उत्पन्न वाढविण्यासाठी महापालिका शहरातील मालमत्तांचे सर्व्हेक्षण करीत आहे. महापालिकेडे नोंद न झालेल्या परंतु, त्याचा वापर सुरू असलेल्या मालमत्तांचा शोध घेतला जात आहे. काही मालमत्तांची नोंद निवासी असताना त्याचा व्यावसायिक वापर होत आहे. त्यामुळे या मालमत्ता शोधून त्यांच्यावर कर आकारणी केली जाणार आहे. शहरात सुमारे चार लाख मालमत्ता आहेत. त्यापैकी आतापर्यंत ३ लाख ६० हजार मालमत्तांचे सर्व्हेक्षण पूर्ण झाले आहे. त्यात ५६ हजार नोंदणी नसलेल्या मालमत्ता आढळून आल्या आहेत. पालिकेच्या तरतुदीनुसार घरपट्टी वसुलीसाठी त्यांच्याकडून दुप्पट दंडासह गेल्या सहा वर्षांपासूनची वसुली केली जाणार आहे.
कपाटमुळे मालमत्तांची कोंडी
महापालिका हद्दीत कपाट प्रश्नावरून गेल्या तीन वर्षांपासून भोगवटा प्रमाणपत्रांचा प्रश्न प्रलंबित आहे. सर्व्हेक्षणात सापडलेल्या बहुतेक मालमत्ता या कपाट प्रश्नामुळे अडकलेल्या आहेत. यामुळे भोगवटा प्रमाणपत्र मिळालेले नाही. त्यामुळे त्यांची नोंदणी झालेली नाही. त्यामुळे या मालमत्तांचे करायचे काय असा प्रश्न विविध कर विभागाला पडला आहे.
मोबाइल अॅप डाउनलोड करा आणि राहा अपडेट
