म. टा. प्रतिनिधी, नाशिक
अनेक विद्यार्थ्यांना लहान वयापासून आई किंवा वडिलांच्या प्रेमाला पारखे व्हावे लागलेले. उच्च शिक्षणाची चिंता दहावीचा अभ्यास करीत असल्यापासूनच सतावत होती. या कार्यक्रमात आल्यावर आपल्याला किती रक्कम मिळणार यापेक्षा समाजाने आपल्यावर इतका मोठा विश्वास टाकला आहे, याची जाणीव त्यांच्यात निर्माण झाली होती. जसजशा भावना या विद्यार्थ्यांनी मोकळ्या करण्यास सुरुवात केली तसतशी त्यांच्या मनातील कालवाकालव समोर आली. बोलायचे खूप आहे, सांगायचे खूप आहे, पण कंठ दाटून आल्याने तोंडून शब्द बाहेर पडणेही कठीण व्हावे, अशी निर्माण झालेली परिस्थिती यावेळी प्रत्येकाच्याच हृदयाला स्पर्शून गेली अन् उपस्थितांच्याही डोळ्यांच्या कडा पाणावल्या.
--
आम्हीही पुढे येऊ...
मटा हेल्पलाइनने आम्हाला गरजू व्यक्तींसाठी मदतीचा हात देण्याची शिकवण दिली आहे. आमच्या गरजेच्या काळात समाजाकडून मिळालेले पाठबळ अतुल्य आहे. त्याची परतफेड आम्ही स्वतःच्या पायावर उभे राहिल्यावर नक्कीच करू... शाळेचे वय संपवून कॉलेजच्या दिशेने प्रवासास निघालेल्या केवळ पंधरावर्षीय मुलांनी समाजाप्रति व्यक्त केलेल्या या भावनांनी या उपक्रमास आर्थिक मदत केलेल्या दानशूरांचा ऊर भरून आला. आपण केलेली मदत अतिशय योग्य ठिकाणी पोहोचली आहे अशी भावना त्यांच्यात निर्माण झालीच शिवाय, विद्यार्थ्यांची परतफेड करण्याची भावना ऐकून टाळ्यांच्या गजरात त्यांनी प्रोत्साहन दिले.
०००
यंदाचे शिलेदार म्हणतात...
--
करिअरमध्ये भरारी हीच परतफेड
माझे स्वप्न पूर्ण होण्यासाठी आर्थिक मदत होतेय यासाठी ‘मटा’चा खूप ऋणी आहे. माझ्या उज्ज्वल भविष्यासाठी मला समाजाकडून झालेल्या मदतीची परतफेड करताना माझ्या करिअरमध्ये उत्तुंग भरारी घेऊन त्याची पावती देईन. माझ्या आयुष्यातील हा अत्यंत महत्त्वाचा दिवस आहे.
-आदित्य जाधव
मदत लावणार सार्थकी
मला इंजिनीअर व्हायच आहे. शिक्षणाच्या जोरावर खडतर आयुष्यावर मला मात करायची आहे. माझ्या स्वप्नाच्या दिशेने पहिले पाऊल टाकण्यासाठी ‘मटा’ने मला मोलाची मदत केली आहे. ही मदत नक्कीच सार्थकी लावेन. उत्तुंग यशासाठी साथ देणाऱ्या ‘मटा’ची आभारी आहे.
-दीपाली वरघडे
वाटचालीसाठी मोलाची मदत
मला आयएसएस अधिकारी बनायचे आहे. या स्वप्नाची खडतर वाट पार करण्यासाठी ‘मटा’च्या माध्यमातून नाशिककरांनी मला दिलेले आर्थिक बळ समाजाच्या नवीन विद्यार्थ्यांकडून असणाऱ्या अपेक्षा बघून मला अश्रू अनावर होत आहेत. ही मदत माझ्या भविष्याच्या वाटचालीसाठी अत्यंत मोलाची आहे.
-सोनाली कुंवर
पंखांत भरल नवे बळ
माझ्या शिक्षणासाठी पालकांनी केलेले जिवाचे रान आज खऱ्या अर्थाने फळास आले आहे. ‘मटा’ने आमची दखल घेत पंखांत नवे बळ भरल्याने आज गहिवरून आले आहे. मला सीए व्हायचे आहे. त्यासाठी मला मिळालेली मदत मोलाची ठरणार आहे. माझ्या उत्तुंग यशात ‘मटा’चा वाटा असणार आहे.
-सचिन गांगुर्डे
पुढील शिक्षणाचा रस्ता सुकर
प्रतिकूल परिस्थितीमुळे पुढील शिक्षण घेता येईल का, याबाबत माझ्या मनात शंका होती. मात्र ‘मटा हेल्पलाइन’ या उपक्रमाने माझी दखल घेतल्याने आता पुढील शिक्षणाचा माझा रस्ता सुकर झाला आहे. ही मदत माझ्यासाठी अनमोल आहे. या उपक्रमास मनःपूर्वक धन्यवाद देते.
-प्रतीक्षा गायकवाड
दातृत्वशील समाजाला अभिमान
समाजाने अत्यंत महत्त्वाच्या क्षणी पुढे केलेला मदतीचा हात आयुष्यात कधीही विसणार नाही. दातृत्वशील समाजाला मला अभिमान आहे. समाजाचे हे ऋण फेडणे अत्यंत कठीण आहे. मात्र, माझे शिक्षण पूर्ण जिद्दीने आणि मन लावून पूर्ण करेन. ‘मटा’ आणि दात्यांनी माझ्यावर दाखविलेल्या विश्वासाला तडा जाऊ देणार नाही.
-गौरी जाधव
आधाराने काढली उणीव भरून
प्रतिकूल परिस्थितीमुळे गुणवत्ता असूनही माझे हात आज घेणाऱ्यांमध्ये आहेत. पण, भविष्यात माझ्या करिअरमध्ये यश मिळवून माझ हात गरजूंना देण्यामध्ये, त्यांच्या पाठीशी उभे राहण्यासाठी असतील. दहावीत ९१ टक्के गुण मिळवूनही माझ्या मनात आर्थिक पाठबळाअभावी आनंद नव्हता. ‘मटा’ने दिलेल्या आधाराने ही उणीव भरून काढली गेली.
-धनश्री राजोळे
शिक्षणाची वाढविली उमेद
घरची आर्थिक परिस्थिती अत्यंत बिकट असल्याने उत्तम गुण असूनही मी पुढे शिक्षण घेऊ शकेन का, याविषयी मला शंका वाटत होती. पण, ‘मटा हेल्पलाइन’ उपक्रमामुळे पुढची वाट सोपी वाटत आहे. आता अधिक उमेदीने शिक्षण पूर्ण करू शकेन. आमच्या भविष्याला एक आशेचा किरण आणि भक्कम पाठिंबा दिल्याबद्दल ‘मटा’च्या उपक्रमाचे आभार मानते.
-सोनिका चिंचोले
मदतीचा करणार सदुपयोग
अगदी लहानपणापासून ‘मटा’ अत्यंत आवडीने वाचायचे. हेच वृत्तपत्र माझ्या भविष्याचा आधार होईल असे स्वप्नातही वाटले नव्हते. ‘महाराष्ट्र टाइम्स’ची आयुष्यभर ऋणी राहीन. त्यांनी केलेल्या मदतीचा नक्कीच सदुपयोग करेन. माझा पहिला पगार मी माझ्यासारख्या गरजवंताला देईन. माझे, माझ्या कुटुंबीयांचे नाव उज्ज्वल करण्याचा प्रयत्न करेल.
-पूजा सांगळे
मदत व्यर्थ जाऊ देणार नाही
समाजाच्या दातृत्वातून आम्हाला करिअरची खडतर वाट सुखर करण्याची संधी ‘मटा’ने हेल्पलाइन उपक्रमाद्वारे दिली आहे. संकटाच्या काळात आमच्या मदतीला हा उपक्रम धावून आला. त्यांच्या आणि समाजाच्या पुढाकाराने भावी शिक्षण पूर्ण करू शकेन. ही मदत व्यर्थ जाऊ देणार नाही. करिअरसाठी नक्कीच मटाच्या मदतीचा आम्हाला मोठा फायदा होईल.
-आदित्य नाईक
---
पालक म्हणतात...
--
दहावीपर्यंतचे शिक्षण कसेतरी घेतल्यानंतर पुढील शिक्षणाचा गंभीर प्रश्न होता. घरची आर्थिक परिस्थिती अत्यंत हलाखीची होती म्हणून पुढील शिक्षण अत्यंत कठीण होते. पण ‘मटा’तर्फे मिळालेल्या मदतीमुळे चिंता मिटली आहे.
-भाऊसाहेब राजोळे
आम्ही शिकलो नाही तरी आमची मुले शिकून मोठी व्हायला हवीत अशी आमची इच्छा होती. पण, आर्थिक स्थिती कमकुवत असल्याने मुलीचे पुढील शिक्षण थांबविण्याचा विचार होता. पण, महाराष्ट्र टाइम्समुळे पुढील शिक्षणास वेळेवर मदत सोबत मानसिक आधारही मिळाला, याबद्दल मटा व वाचकांचे आभार.
-सुरेखा वरघडे
दहावीनंतरच्या पुढील शिक्षणासाठी आर्थिक मदतीची अत्यंत गरज होती, जी मटा हेल्पलाइनच्या माध्यमाने अगदी वेळेवर मिळाली. या अमूल्य मदतीने समाजाचे देणे सुंदर झाले आहे.
-रुपाली जाधव
शिक्षणाची कसे घ्यावे ही अत्यंत गंभीर समस्या होती. मटाच्या मदतीमुळे आता माझा मुलगा सायन्सचे शिक्षण करू शकेल आणि इच्छेनुसार भौतिकशास्त्राचा वैज्ञानिक बनू शकेल. या उपक्रमाबद्दल मटा व सर्व दानशूरांना धन्यवाद.
-वैशाली नाईक
महाराष्ट्र टाइम्सच्या या मदतीने पुढील शिक्षण सोपे झाले. दहावीनंतर पुढे शिक्षण कसे करायचे असा प्रश्न होता. पण, मटा हेल्पलाइनने याचे निवारण झाले. मटा हेल्पलाइनच्या रुपाने जणू आम्हाला वेळेवर देवच पावला.
-संगीता गायकवाड
शिक्षणासाठी अत्यंत गरजेची आर्थिक मदत मिळाली. मुलाच्या पुढील करिअरसाठी ही मदत अत्यंत मोलाची असेल. आमचा मुलगादेखील मोठा होऊन या उत्तम उपक्रमातून अशी मदत करेल. महाराष्ट्र टाइम्सचे खूप खूप आभार.
-रोहिणी जाधव
मटा हेल्पलाइनच्या पुढील शिक्षणासाठीच्या मदतीमुळे आम्हाला मोठा आधार मिळाला. माझ्या मुलीची इच्छा होती, की तिने सीए व्हावे. ही इच्छा या मदतीने पूर्ण होऊ शकेल. मी महाराष्ट्र टाइम्स आणि सर्व दानशूर वाचकांची आभारी आहे.
-सरला चिंचोले
--
सजग नाशिककर म्हणतात...
--
मला गरीब विद्यार्थ्यांना मदत करण्याची खूप इच्छा होती. परंतु, योग्य विद्यार्थी कोण याची निवड करता येत नव्हती. मटा हेल्पलाइनच्या माध्यमातून योग्य व गरजू विद्यार्थ्यांना मदत करण्याची संधी मिळाली. मटा हेल्पलाइन हे विद्यार्थ्यांपर्यंत मदत पोहोचविण्याचे उत्तम माध्यम आहे.
-प्रशांत पाटील
मटा हेल्पलाइन अतिशय उत्तम असा उपक्रम आहे. त्याबद्दल आम्ही महाराष्ट्र टाइम्सचे आभार मानतो. या उपक्रमाचा भाग आम्हाला होता आले म्हणून आम्ही स्वतःला भाग्यवान समजतो. विद्यार्थ्यांनी स्वतःचे चांगले भवितव्य घडवावे. त्यासाठी आमच्या शुभेच्छा आणि आशीर्वाद.
-वसंत कुलकर्णी
मटा हेल्पलाइन या उपक्रमाचे कितीही कौतुक केले तरी कमीच आहे. यातून गरजू विद्यार्थ्यांना आर्थिक बळ मिळते. उच्च शिक्षण घेण्यासाठी त्यांच्या पंखांत बळ देण्यासाठी महाराष्ट्र टाइम्सचा मोलाचा वाटा आहे.
-अश्विनी भालेराव
मटा हेल्पलाइनच्या या उपक्रमाद्वारे महाराष्ट्र टाइम्सने समाजातील हिरे शोधून काढले आहेत. त्यांना आर्थिक पाठबळ देऊन त्यांना उच्च शिक्षण मिळवून देण्यात महाराष्ट्र टाइम्सचा मोलाचा वाटा आहे. समाज साक्षर होण्यासाठी घेतलेला हा स्तुत्य उपक्रम आहे.
-आशिष कुलकर्णी
मटा हेल्पलाइन या उपक्रमाच्या माध्यमातून अनेक दानशूर व्यक्तींनी मदतीचे हात या विद्यार्थ्यांना दिले आहेत. विद्यार्थ्यांनीसुद्धा या गोष्टीचे भान ठेवावे आणि आपला व समाजाचा विकास साधावा. महाराष्ट्र टाइम्सचे यातील योगदान अवर्णनीय आहे.
-नीलेश सातपुते
समाजात अनेक दानशूर व्यक्ती आहेत. पण, त्यांना दान करण्यासाठी योग्य व्यासपीठ मिळत नाही अन् ते दान चुकीच्या किंवा अयोग्य व्यक्तींच्या हातात जाते. मटा हेल्पलाइन हे मदत करण्यासाठीचे उत्तम व्यासपीठ महाराष्ट्र टाइम्सने उपलब्ध करून दिले आहे.
-रामदास अहिरे
महाराष्ट्र टाइम्सने राबविलेल्या मटा हेल्पलाइन उपक्रमाद्वारे खरोखरच अनेक गरजू विद्यार्थ्यांना शिक्षणासाठी बळ मिळाले आहे. त्यांच्या या उपक्रमाद्वारे अनेक विद्यार्थ्यांचा आर्थिक पाया मजबूत झाला आहे. त्यांना ध्येयाकडे वाटचाल करण्यास त्याची मदत होईल. ही मदत ज्या दानशूर व्यक्तींमुळे प्राप्त झाली त्यांना माझा सलाम.
-योगेश दुसाने
‘मटा’ने असे उपक्रम पुढेही सुरू ठेवावेत. विद्यार्थ्यांनीसुद्धा आपल्या क्षेत्रात प्रावीण्य मिळवावे. म्हणजे या उपक्रमाचे ध्येय साध्य होईल. आम्हीदेखील त्यांच्या मदतीसाठी सदैव तयार आहोत. महाराष्ट्र टाइम्सने राबविलेल्या या उपक्रमामुळे उद्याचा साक्षर नागरिक घडेल व समाजाचा विकास साधेल.
-अमित खराटे
मोबाइल अॅप डाउनलोड करा आणि राहा अपडेट
