मुंबईपाठोपाठ नाशिकमधील मराठी, उर्दू, इंग्रजी माध्यमांच्या शाळांमध्येही ‘वंदे मातरम्’ सक्तीचे करावे, अशी मागणी शिवसेनेच्या नगरसेविका किरण गामणे यांनी केली आहे. त्या संदर्भातील प्रस्तावही येत्या महासभेत ठेवण्यात आला आहे. या प्रस्तावावरून मुंबईप्रमाणेच नाशिकमध्येही वाद निर्माण होण्याची शक्यता आहे. त्यामुळे महापौर या प्रस्तावाबाबत काय निर्णय घेतात, याकडे सर्वांचे लक्ष लागले आहे.
मुंबई महापालिकेतील शाळांमध्ये वंदे मातरम् हे गीत सक्तीचे करण्यावरून वाद सुरू असतानाच नाशिकमधील शिवसेनेच्या नगरसेविका गामणे यांनी महापालिकेला असाच प्रस्ताव दिला आहे. नाशिकमधील मराठी, उर्दू आणि इंग्रजी शाळांमध्ये ‘वंदे मातरम्’ची सक्ती करण्याची मागणी त्यांनी केली आहे. शाळा भरतेवेळी व सुटतेवेळी रोज ‘वंदे मातरम्’ गीत म्हणण्यात यावे, अशी मागणी त्यांनी केली आहे. सोबतच स्वातंत्र्यवीर सावरकर, भगतसिंग, राजगुरू, महात्मा जोतिबा फुले, भारतरत्न डॉ. बाबासाहेब आंबेडकर या महापुरुषांच्या महतीबाबत रोज शाळांमध्ये एक तास घेण्यात यावा, अशी मागणीही त्यांनी केली आहे. त्या संदर्भातील प्रस्ताव येत्या शनिवारी महासभेत ठेवण्यात येणार आहे.
वंदे मातरम् या गीतावरून मुंबईत अगोदरच वाद सुरू आहेत. त्याच धर्तीवर ‘वंदे मातरम्’ला नाशिकमध्येही विरोध होण्याची शक्यता आहे. त्यामुळे महापौर या महासभेत याबाबत काय निर्णय घेतात, याकडे सर्वांचे लक्ष लागून आहे. गेल्या महासभेत गायीला श्रद्धांजली देण्याचा प्रस्ताव पारित करून महापौरांनी वाद ओढवून घेतला होता. त्यामुळे या प्रस्तावाबाबत त्या काय निर्णय घेतील, याकडे लक्ष लागून आहे.
मोबाइल अॅप डाउनलोड करा आणि राहा अपडेट