टीम मटा
शहर परिसरात सोमवारी रक्षाबंधन घरोघरी पारंपरिक उत्साहात साजरे झालेच, मात्र विविध सामाजिक संस्था, संघटनांतर्फेही हा सण राखी बांधण्यासग विविध उपक्रमांद्वारे साजरा करण्यात आला. या उपक्रमांतर्गत लष्करी जवान, मध्यवर्ती कारागृहातील बंदिवान, वीज कर्मचारी आदींना राख्या बांधून सामाजिक ऋणानुबंध जोपासण्याला बळकटी देण्याचा प्रयत्न करण्यात आला.
--
अन् बंदिवान भारावले...
नाशिकरोड ः नाशिकरोड मध्यवर्ती कारागृहातील बंदिवान डोळे सोमवारी रक्षाबंधनानिमित्त दूरवर असलेल्या बहिणींच्या आठवणीने हळवे झाले होते. मात्र, त्याची ही व्यथा जाणून त्यांना आधार दिला तो सामाजिक संस्थांनी. विविध संस्थांतर्फे कारागृहात रक्षाबंधन साजरे करण्यात आले. त्यामुळे अनेक बंदिवान भारावल्याचे दिसून आले.
नाशिकमधील तेरा स्वयंसेवी संस्थांनी ४०० बंदिवानांना रक्षाबंधनाची अनोखी भेट दिली. कारागृह प्रशानाने कारागृहात रक्षाबंधनाची तयारी केली होती. सकाळी दहा वाजेपासूनच रक्षाबंधन कार्यक्रमाला प्रारंभ झाला. कारागृहाचे अधीक्षक राजकुमार साळी यांच्या मार्गदर्शनाखाली अधिकारी आणि कर्मचाऱ्यांनी आठवडाभर आधी रक्षाबंधनाचे नियोजन केले होते. श्रीमती र. ज. चौहान बिटको गर्ल्स हायस्कूल, कम्युनिटी हेल्थ संस्था, सहज योग ध्यान केंद्र इंदिरानगर, नाशिकरोड बेरोजगार अपंगांची स्वयंसेवी संस्था, गोविंद चॅरिटेबल ट्रस्ट, नाशिक सोशल सर्व्हिस, स्पार्टन हेल्प सेंटर, संत आसारामजी महिला उत्थान संस्था, भीमाई शैक्षणिक- सामाजिक महिला मंडळ, दर्शन अकादमी, रेणुका महिला सहकारी संस्था, कृपाल आश्रम, रोटरी क्लब नाशिक या संस्थांच्या समाजसेवी महिलांनी बंदिवानांना राख्या बांधून औक्षण केले. यावेळी अनेक कैद्यांच्या डोळ्यात आनंदाश्रू तरळले होते.
या कार्यक्रमावेळी कारागृह अधीक्षक साळी, शांतिदूत परिवाराचे अध्यक्ष समाधान गांगुर्डे, भाजपच्या मंदा फड, डॉ. प्रशांत भुतडा, रोटरीच्या अध्यक्ष मनीषा बागुल, अनिल बागुल, माजी नगरसेविका सुनंदा मोरे, संध्या शिरसाठ, सुमन विश्वकर्मा, नयना वाबळे, रुपाली मार्चाडे आदी उपस्थित होते.
---
सद्गुणांची राखी अन् गुणगौरव
सिन्नर फाटा ः नाशिकरोड मध्यवर्ती कारागृहात यशवंतराव चव्हाण महाराष्ट्र मुक्त विद्यापीठ व ब्रह्माकुमारीज शिक्षा प्रभागतर्फे गुणगौरव सोहळा व सद्गुणांची राखी हा रक्षाबंधनाचा अनोखा सोहळा रंगला.
यावेळी प्रगत पदविका / पदविका मूल्य आणि आध्यात्मिक शिक्षण या अभ्यासक्रमात उत्तीर्ण झालेल्या बंदिवान विद्यार्थ्यांचा गुणगौरव करण्यात आला, तसेच सद्गुणांची राखी या उपक्रमांतर्गत सर्व मान्यवरांसह बंदिवानांना राखी बांधण्यात आली.
मुक्त विद्यापीठाचे कुलगुरू ई.वायुनंदन म्हणाले, की शिक्षण मानवीय सत्याची प्रगती , परिवर्तन आणि प्रेरणा यांचा आधार स्तंभ आहे. शिक्षणा द्वारे ज्ञानाची प्राप्ती होते. पण, ते ग्रहण करण्याची व त्याप्रमाणे आपली जीवनक्षैली बनविण्याची जबाबदारी आपल्यावरच असते. मुक्त विद्यापीठाच्या माध्यमातून राज्यातील मध्यवर्ती कारागृहांत ही शिक्षणाची ज्ञानगंगा विनामूल्य पोहोचविण्याचा माझा मानस आहे. त्यामुळे जेलमधील कैदी बांधवांचे शैक्षणिक सशक्तीकरण होण्यास मदत होणार आहे.
कारागृह अधीक्षक राजकुमार साळी, ब्रह्माकुमारी गोदावरीदीदी, ब्रह्माकुमारी पुष्पादीदी यांनीही यावेळी मार्गदर्शन केले. गुणवंतांनाही मनोगत व्यक्त केले. विकास साळुंखे यांनी सूत्रसंचालन केले. कारागृह अधिकारी वामन निमजे, अशोक कारकर, संतोष कोकणे, कारागृह गुरुजी विष्णू राठोड आदी उपस्थित होते.
--
‘कॅन्टोन्मेंट’मध्ये रंगला सोहळा
प्रजापिता ब्रह्माकुमारी ईश्वरीय विश्वविद्यालय आडकेनगरतर्फे देवळाली कॅन्टोन्मेंट कार्यालयात रक्षाबंधन सण साजरा करण्यात आला. कार्यालयातील अधिकारी,कर्मचाऱ्यांसह लोकप्रतिनिधींना राखी बांधण्यात आली. उपाध्यक्ष दिनकर आढाव, बाबुराव मोजाड, भगवान कटारिया, कार्यालयीन अध्यक्ष उमेश गोरवाडकर आदी उपस्थित होते. मीराबेन यांनी रक्षाबंधन सणाचे महत्त्व विशद केले.
---
‘रणरागिणी’तर्फे जवानांचे औक्षण
नाशिकरोड ः येथील रणरागिणी महिला मंडळातर्फे गांधीनगरच्या लष्करी केंद्रातील जवानांना राखी बांधण्यात आली. मंडळाच्या पदाधिकारी तथा माजी नगरसेविका वंदना मनचंदा यांच्या पुढाकाराने गेल्या काही वर्षांपासून हा उपक्रम राबविला जात आहे. आपल्या घरापासून कोसो दूर असलेल्या या जवानांना रक्षाबंधनासाठी सुटी मिळतेच असे नाही. घर संसाराचा त्याग करुन देशाच्या रक्षणासाठी सज्ज असलेल्या या जवानांची ही व्यथा जाणून रणरागिणी महिला मंडळ दर वर्षी गांधीनगरच्या लष्करी केंद्रात जवानांना औक्षण करते. जवान त्याबदल्यात त्यांना मिठाई व भेटवस्तू देतात.
सोमवारी झालेल्या सोहळ्यावेळी शीला अग्रवाल, गीता पवार, कमल चव्हाण, रिचा वाघ, श्रद्धा गलांडे, सविता कदम, सुकन्या महाले, उषा कडाळे, स्नेहा मनचंदा आदींसह लष्कराचे पदाधिकारी व जवान उपस्थित होते.
---
वीज कर्मचाऱ्यांचे औक्षण
नाशिकरोड ः मानव उत्थान या सामाजिक संस्थेकडून तपोवनातील तिगरानिया कंपनीशेजारील वीज कंपनीच्या कार्यालयातील कर्मचाऱ्यांचे औक्षण करून त्यांना राखी बांधण्यात आली. जगबीर सिंग, भारती जाधव, ज्योती ग्रोव्हर, हेमंत जाधव, तसेच मानव उत्थान मंचच्या सदस्यांनी या उपक्रमात सहभाग घेतला. पावसाळ्यात विजेच्या तारांवरील झाडांच्या फांद्या छाटताना, तसेच वीजपुरवठा सुरळीत करताना वीज कर्मचाऱ्यांना जिवावर उदार होऊन काम करावे लागते. अनेकदा त्यांचे प्राणही संकटात सापडतात. अशा कर्मचाऱ्यांप्रति आदर व्यक्त व्हावा म्हणून मानव उत्थान मंचने रक्षाबंधनाचा उपक्रम राबविला. झाडांची छाटणी करताना पर्यावरणाचा विचार करण्याचे आश्वासन अधिकारी निंबाळकर यांनी दिले. भूमिगत तारांच्या योजनांची माहिती त्यांनी दिली.
---
हास्य योगतर्फे कार्यक्रम
नाशिकरोड येथील आनंद हास्य योग क्लबतर्फे रक्षाबंधनाचा सण पारंपरिक पद्धतीने साजरा करण्यात आला. क्लबचे अध्यक्ष अॅड. वसंतराव पेखळे यांनी रक्षाबंधनाचे महत्त्व सांगितले. क्लबचे सदस्य रमेश नवले, सिद्धार्थ हिरे, सुरेश वाडगावकर, सुरेखा दुसाने, जयमाला भुतडा, सुरेखा वाघ आदींनी संयोजन केले. यावेळी 50 रक्षाबंधन-बीईंग कामन संस्था ५० सदस्य उपस्थित होते.२५ भगिनींनी उपस्थितांचे औक्षण करून त्यांना राख्या बांधल्या. सदस्यांच्या आरोग्याची काळजी घेण्याबरोबरच सामाजिक बांधिलकी जपणारा हा क्लब विविध सण उत्साहाने साजरा करतो.
--
‘बीइंग कॉमन’चा संदेश
उपनगर पोलिस ठाण्यातील वरिष्ठ निरीक्षक बाजीराव महाजन यांच्यासह अधिकारी व कर्मचारी यांना बीइंग कॉमन संस्थेच्या सदस्यांनी राखी बांधून सामाजिक एकतेचा संदेश दिला. संस्थेचे अध्यक्ष विक्रम कदम, गुरमित सिंग रेखी, विकी नालकर, सुधीर निकाळे, संदीप राजगुरू, मोईन खान, मोहित महाले, उमेश जाधव, विजय कदम आदी उपस्थित होते. निरीक्षक महाजन यांनी पोलिस आणि नागरिकांचे नाते घट्ट करण्यासाठी असे उपक्रम गरजेचे असल्याचे नमूद केले.
--
बालसदनात अनोखा सोहळा
कळवण : निराश्रित-निराधार बालकांना सण-उत्सवांत सहभागी करीत त्यांच्या चेहऱ्यावर समाधानाची लकेर उमटविण्याच्या हेतूने रक्षाबंधनाचे औचित्यसाधून मानूरच्या शिवप्रताप प्रतिष्ठानच्या युवतींनी राखीचा प्रेमळ धागा अनाथांच्या नाजूक मनगटावर बांधून बहिणीची माया देण्याचा आगळावेगळा उपक्रम राबविला. प्रतिष्ठानचे अध्यक्ष परिमल पवार याच्या संकल्पनेतून भावना बालसदन या निराश्रित बालकांच्या निवासाची संस्थेत हा उपक्रम झाला. प्रतिष्ठानच्या प्राजली पवार, प्रतीक्षा पवार, हर्षदा पवार, सृष्टी आहेर, चारुशीला पाटील आणि कामिनी गुंजाळ या युवतींनी बालसदनातील बालकांचे विधिवत औक्षण करून, राख्या बांधून मिठाई भरविली. त्यावेळी सारे भारावले होते. बालसदनचे संस्थापक रवींद्रकुमार जाधव यांनी या उपक्रमाचे कौतुक केले.
--
चिमुकल्यांना पोलिसांचे गिफ्ट
येवला ः येथील पटेल कॉलनीतील संजीवनी टॉडलर्समधील शाळकरी चिमुकल्या मुलींनी येवला शहर पोलिस स्टेशनला भेट देत पोलिस अधिकारी व कर्मचाऱ्यांसमवेत साजरे केलेले रक्षाबंधन आगळेवेगळे ठरले. या शाळकरी चिमुकल्यांनी शहर पोलिस स्टेशनमध्ये निरीक्षक संजय पाटील, उपनिरीक्षक संदीप पाटील यांच्यासह उपस्थित पोलिस कर्मचाऱ्यांचे औक्षण करीत त्यांना राख्या बांधल्या. विशेष म्हणजे आपल्या शिक्षकांच्या मार्गदर्शनाखाली या राख्या त्यांनी स्वतः तयार केलेल्या होत्या. पोलिस कर्मचाऱ्यांनी या चिमुकल्यांना कॅडबरीचे गिफ्ट देत धन्यवाद दिले.
मोबाइल अॅप डाउनलोड करा आणि राहा अपडेट
