म. टा. वृत्तसेवा, सातपूर
वाढत्या लोकवस्तीने शहरात अनेक ठिकाणी कॉलनी भाग उभे राहिले आहेत. परंतु, या वाढत्या लोकवस्तीत सातपूरच्या कामगार वसाहतीमध्ये ड्रेनेज चोकअपची समस्या सर्वांनाच डोकेदुखी ठरत आहे. नेहमीच ड्रेनेज वेगवेगळ्या भागात चोकअप होत असल्याने रस्त्यांवरून वाहणाऱ्या सांडपाण्यामुळे रहिवाशांचे आरोग्य धोक्यात आले आहे. महापालिकेने सांडपाणी वाहून जाण्यासाठी ड्रेनेजची स्वतंत्र व्यवस्था केली असली, तरी नेहमीच्या चोकअपवर कायमस्वरूपी तोडगा काढवा, अशी मागणी रहिवाशांनी केली आहे.
स्मार्ट सिटीत नाशिक महापालिकेचा समावेश केला आहे. साहाजिकच यामुळे नाशिक महापालिकेच्या नागरी सुविधा देण्याकरीता जबाबदाऱ्या वाढल्या आहेत. परंतु, वाढत्या नाशिक शहरात रोजच होणाऱ्या ड्रेनेज चोकअपची डोकेदुखी थांबणार कधी, असा सवाल सुज्ञ नागरिकांकडून उपस्थित केला जात आहे. सातपूर भागात सातपूर कॉलनी, अशोकनगर, शिवाजीनगर, धृव नगर, जाधव संकुल, पवार संकुल, राधाकृष्ण नगर, विश्वास नगर, आनंदवली, गंगापूररोड, सिरीन मेडोस, गणेश नगर, कामगार नगर यांसह कॅनलरोडवर टुमदार घरकुले उभारली आहेत.
या घरकुलांमध्ये महापालिकेकडून नागरी सुविधादेखील दिल्या गेल्या आहेत. परंतु, दाट लोकवस्तीच्या रहिवाशी भागात नेहमीच होत असलेल्या ड्रेनेज चोकअपमुळे अनेक ठिकाणी नागरिकांचे आरोग्य धोक्यात आले आहे. त्यातच महापालिकेकडे ड्रेनेज चोकअप काढण्यासाठी स्वतंत्र व्यवस्था असतानादेखील चोकअपची संख्या अधिक असल्याने रोजच सर्व समस्या सुटत नाहीत. तरी यासाठी महापालिकेने वाहनांची व्यवस्था करावी, अशी मागणी केली जात आहे.
कपडे, बारदान चेंबरमध्ये?
महापालिकेने नागरी वस्तीत सांडपाणी वाहून जाण्यासाठी ड्रेनेज लाइनींची व्यवस्था केली आहे. परंतु, नेहमीच ड्रेनेज चोकअप होत असल्याने त्याचा नाहक त्रास सर्वांनाच सहन करावा लागतो. ड्रेनेज चोकअप नेमके कशामुळे होतात. याबाबत ड्रेनेज कर्मचाऱ्यांना विचारले असता, त्यांनी सांडपाण्याच्या लाइनीत कपडे, बारदाने, नारळाचे करवंटे
टाकले जात असल्यानेच चोकअप होत असल्याचे सांगितले. नागरिकांनी सांडपाण्याव्यतिरिक्त काहीच न टाकल्यास ड्रेनेज चोकअप होणार नसल्याचे कर्मचाऱ्यांचे म्हणणे आहे.
सातपूरच्या कामगार वस्तीत वाढत्या लोकवस्तीत घरकुलांची संख्याही वाढली आहे. वाढलेल्या घरकुलांचे सांडपाणी वाहून जाण्यासाठी महापालिकेने ड्रेनेजची व्यवस्था केली आहे. परंतु, नेहमीच ड्रेनेज चोकअप होत असल्याने त्याचा रहिवाशांना त्रास सहन करावा लागतो.
- हेमांगी देवरे, रहिवाशी, अशोकनगर
मोबाइल अॅप डाउनलोड करा आणि राहा अपडेट