देवळाली परिसरात रस्त्यांच्या कामांसह विविध सुविधांचा काही महिन्यांपासून अभाव असल्याने लवकरात लवकर नागरिकांच्या सोयीच्या दृष्टीने उपाययोजना कराव्यात व नागरिकांच्या समस्या लवकरात लवकर सोडवाव्यात; अन्यथा आंदोलन करण्याचा इशारा छावा संघटनेतर्फे देण्यात आला आहे. मागण्यांबाबत कॅन्टोन्मेन्टचे मुख्य कार्यकारी अधिकारी विलास पवार यांची संघटनेने भेट घेतली.
यावेळी युवा प्रदेशाध्यक्ष सुनील गुंजाळ, आदिवासी प्रदेशाध्यक्ष शत्रुघ्न झोंबाड, जिल्हाध्यक्ष रवी भारद्वाज, मुस्लिम आघाडी जिल्हाध्यक्ष राशीदभाई सय्यद, युवा जिल्हाध्यक्ष रतन मेढे पाटील, विद्यार्थी जिल्हाध्यक्ष मोहित खालकर, ग्रामीण जिल्हाध्यक्ष अण्णासाहेब खाडे, तालुकाध्यक्ष विजय खर्जूल आदींनी या वेळी निवेदन दिले. निवेदनात नमूद करण्यात आले आहे, की शहरात भुयारी गटाराचे काम सुरू आहे. त्यामुळे रस्त्यांवर पडलेल्या खड्ड्यांमुळे सर्वत्र चिखलाचे साम्राज्य पसरले आहे. सर्वच वॉर्डांमध्ये शौचालयाची दुरुस्ती करून व नव्याने शौचालय बांधण्यात यावे. आठवडे बाजाराच्या नागझिरा मार्ग शौचालयांकडे जाणारा रस्ता काँक्रिटीकरण झाले पाहिजे, लेव्हिट मार्केट येथील मटण व मच्छी मार्केटची अवस्था बिकट झाली आहे. त्याची तातडीने दुरुस्ती करावी. सिंधी पंचायतजवळील स्वच्छतागृह नव्याने करावे, हाडोळा भागात नवीन शौचालये बनवून देण्यात यावीत, गोरगरीब जनतेला जुने घर दुरुस्ती करून नवीन घर बांधण्यासाठी परवानगी द्यावी, कॅन्टोन्मेंट हॉस्पिटलमध्ये सिटी स्कॅन व एमआरआय मशिनरी उपलब्ध करून देणे, गोरगरिबांसाठी घरकुल योजनेसाठी कॅन्टोन्मेंट बोर्डाने पुढाकार घेऊन घरकुल योजना राबविण्यात यावी. या वेळी सुमित पारचा, नझफ सय्यद, सत्यम बेजकर, संतोष फडोळ, ऋतिक अनर्थ, दीपक शिंदे, वैभव अनर्थ, शरद घाटोळ, संतोष जाधव आदी उपस्थित होते.
मोबाइल अॅप डाउनलोड करा आणि राहा अपडेट