फेमिना मिस इंडिया २०१७ या स्पर्धेचे उपविजेतेपद पटकाविणे केवळ प्रयत्नांतील सातत्य, महत्त्वाकांक्षा आणि आत्मविश्वास या त्रिसूत्रीच्या बळावरच साध्य झाले. ही त्रिसूत्री तुम्हीही बाळगा, यश नक्की मिळेल, असा सल्ला फेमिना मिस इंडिया स्पर्धेची उपविजेती प्रियांका कुमारी हिने तरुणाईला दिला.
के. के. वाघ शिक्षण संस्थेच्या वतीने प्रियांका हिच्या सत्कार सोहळ्याचे आयोजन करण्यात आले होते. शिक्षण संस्थेचे अध्यक्ष बाळासाहेब वाघ यांच्या हस्ते तिला गौरविण्यात आले. फेमिना मिस इंडियाची उपविजेती प्रियांका ही नाशिकच्या के. के. वाघ वाघ इंजिनीअरिंग कॉलेजची माजी विद्यार्थिनी आहे. तिने २०१३ मध्ये मेकॅनिकल इंजिनीअरिंग या विषयात पदवी घेतली आहे. येथील शिक्षण पूर्ण झाल्यानंतर तिला टीसीएस कंपनीत करिअरची संधी मिळाली होती.
यावेळी सत्काराला उत्तर देताना तिने कॅम्पसमधील तरुणाईशी संवाद साधला. प्रियांका कुमारी म्हणाली, ‘मिस इंडियासारख्या प्रतिष्ठेच्या स्पर्धेत सहभागी होणे आणि फेमिना मिस इंडिया २०१७ चे उपविजेतेपद पटकाविणे हा प्रवास अविस्मरणीय होता. यासाठी कुटुंबातील पार्श्वभूमी नव्हती. संशोधक वृत्ती आणि चांगल्या निरीक्षण क्षमतेचाही फायदा महाविद्यालयीन जीवनात झाला. एकदा या क्षेत्रात करिअर करण्याचे ध्येय ठरल्यानंतर प्रत्येक गोष्ट कठीण वाटत होती. मात्र, स्पर्धेच्या कालावधीत मिळालेल्या व्यावसायिक प्रशिक्षणाने आत्मविश्वासात दुप्पट वाढ झाली. दुर्बल आर्थिक परिस्थितीशी झगडणाऱ्या निरागस लहान मुलांसाठी भविष्यात चांगले कार्य उभारण्याचा मानसही प्रियांका हिने यावेळी बोलताना व्यक्त केला.
कार्यक्रमाच्या सुरुवातीला के. के. वाघ अभियांत्रिकी महाविद्यालयाचे प्राचार्य डॉ. नांदूरकर आणि मेकॅनिकल विभागाचे प्रमुख डॉ. मुरुगकर यांनी मनोगत व्यक्त केले. याप्रसंगी संस्थेचे विश्वस्त अशोक मर्चंट, डॉ. शाहबादकर, आदी उपस्थित होते.
मोबाइल अॅप डाउनलोड करा आणि राहा अपडेट
