टीम मटा
शहर परिसरातील विविध विठ्ठल मंदिरे अन् घराघरांत मंगळवारी भक्तिमय वातावरणात आषाढी एकादशी साजरी करण्यात आली. शहर परिसरातील शाळांमध्येदेखील बालवारकऱ्यांच्या दिंड्या अन् विविध उपक्रमांद्वारे विठुनामाचा गजर करण्यात आला. शहरातील नामदेव विठ्ठल मंदिर, काझीपुऱ्यातील नामदेव विठ्ठल मंदिर, हुंडीवाला लेनमधील ज्ञानदेव विठ्ठल मंदिर, आकाशवाणीशेजारील विठ्ठल मंदिर, तसेच अतिप्राचीन असलेले गोदाघाटावरील विश्वनाथ विठ्ठल मंदिर, विहितगाव येथील प्रतिपंढरपूर समजले जाणारे विठ्ठल मंदिर, देवळाली कॅम्प, विहितगाव, सातपूर येथील विठ्ठ्ल मंदिर आदी ठिकाणी विठ्ठ्ल-रखूमाईचे विधिवत पूजन करण्यात आले. ठिकठिकाणी धार्मिक, सांस्कृतिक कार्यक्रमही झाले.
---
विहितगावला भाविकांची मांदियाळी
म. टा. वृत्तसेवा, देवळाली कॅम्प
उठा पांडुरंगा आता दर्शन द्या सकळा।
झाला अरुणोदय सारली निद्रेची वेळा ।।
म्हणत विहितगावच्या प्रतिपंढरपूर समजल्या जाणाऱ्या विठ्ठल मंदिरात भल्या पहाटे काकडा आरतीचे स्वर गुंजत होते. पहाटेपासूनच पंढरपूरला न जाऊ शकलेल्या वारकऱ्यांसह पंचक्रोशीतील भाविकांनी मंदिरात,
तुज पाहता सामोरी। दृष्टी न फिरे माघारी।।
माझे चित्त तुझे पाया। मिठी पडली पंढरीराया।।
असा उत्कट भाव मनात ठेवून आषाढी एकादशीनिमित्त लाडक्या विठुरायाचरणी माथा टेकविला. पहाटे ४ ते ७ वाजेदरम्यान खासदार हेमंत गोडसे, त्यांच्या पत्नी अनिता गोडसे, नगरसेविका सुनीता कोठुळे व उत्तम कोठुळे यांच्या हस्ते विठ्ठलाच्या मूर्तीस महाअभिषेक करून महापूजा करण्यात आली. आमदार योगेश घोलप, दत्ता गायकवाड, निवृत्ती अरिंगळे, नगरसेवक केशव पोरजे, अरुण जाधव आदींच्या हस्ते तुळशीचा हार अर्पण करण्यात आला. दुपारी १ ते ३ वाजेदरम्यान महिलांचे भजन, सायंकाळी ६ वाजता हरिपाठ, रात्री ९ वाजता हभप अनिल महाराज तुपे यांचे हरिकीर्तन झाले. दिवसभर पंचक्रोशीतील भाविकांनी विठ्ठलाच्या दर्शनासाठी गर्दी केली होती. यावेळी भाविकांना खिचडी व केळी प्रसाद म्हणून वाटप करण्यात आले. दिवसभर विविध गावच्या भजनी मंडळांकडून सुश्राव्य अभंगांवर आधारित भजनाचे कार्यक्रम झाले. नगरसेविका सत्यभामा गाडेकर यांनी यंदा स्वखर्चातून मंदिरात सीसीटीव्ही कॅमेरे बसविले आहेत.
कार्यक्रमाच्या यशस्वीतेसाठी शिवाजी हांडोरे,दिनेश हांडोरे,सोमनाथ कोठुळे,उद्धव हांडोरे,आत्माराम हगवणे,विजय हांडोरे,बाळासाहेब कोठुळे,विष्णू हांडोरे,रोहित मते,संपत हांडोरे,प्रकाश हगवणे,सोपान हांडोरे,संजय हांडोरे आदींसह गावकरी प्रयत्नशील होते.
देवळालीत दिंडी सोहळा
देवळालीगावातील १२० वर्ष जुन्या विठ्ठल मंदिरात पहाटे वाघुळकर कुटुंबीय व पांडुरंग झोंबाड, कैलास गोडसे, सतीश वाघुळकर, सुरेश वाघुळकर, नगरसेविका प्रभावती धिवरे, प्रभाकर लोणे, रामकिसन गोडसे यांच्यातर्फे अभिषेक करण्यात आला. यावेळी देवळालीकरांच्या उपस्थितीत महाआरती झाली. सकाळी ९ वाजल्यापासून प्रसादाचे वाटप झाले. दुपारी ४ ते ६ वाजेदरम्यान महिला भजनी मंडळांचे भजनाचे कार्यक्रम झाले. सायंकाळी ६ ते ८ वाजेदरम्यान भव्य पालखी सोहळा झाला. लामरोडवरील भैरवनाथ मंदिरात श्री भैरवनाथ प्रासादिक भजनी मंडळातर्फे सामूहिक भजनसंध्या झाली. आज, बुधवारी (दि. ५) सिंधी पंचायत हॉल येथे महाप्रसादाचा कार्यक्रम होणार आहे. चेहेडी पंपिंग स्टेशन, चेहेडी गावातील विठ्ठल-रुक्मिणी मंदिरातही विधिवत पूजनासह भजनादी कार्यक्रम झाले.
पृथ्वी मित्रमंडळ
देवळालीगावातील पृथ्वी मित्रमंडळातर्फे विठ्ठल मूर्ती सजविण्यात आली होती. खासदार हेमंत गोडसे, आमदार योगेश घोलप, दत्ता गायकवाड, निवृत्ती अरिंगळे, मनोहर कोरडे, अॅड. शांताराम कदम, नयना घोलप आदींनी पूजा केली. योगेश शिंदे, दिनेश शिंदे, नीलेश भोईर, विजय आर्या, पुरुषोत्तम केला, नंदू खैरे, पवन विसपुते, किरण डहाळे, चंदू महानुभव, विकास गिते आदींनी संयोजन केले.
---
सातपूरला विठुनामाचा गजर
म. टा. वृत्तसेवा, सातपूर
आषाढी एकादशीनिमित्त सातपूर परिसर मंगळवारी विठुनामाच्या गजराने दुमदुमला होता. विठ्ठल मंदिरासह महापालिका व खासगी शाळांमध्येही विविध कार्यक्रम झाले. समृद्धनगर येथील विठ्ठल-रुख्मिणी मंदिरात नगरसेवक शशिकांत जाधव यांच्या हस्ते पूजा करण्यात आली. दिवसभर कीर्तनाचेही आयोजन मंदिर ट्रस्टच्या वतीने करण्यात आले होते. विविध शाळांमधील विद्यार्थ्यांनी वारकऱ्यांचा पेहरावात परिसरातून दिंडी काढली.
विश्वासनगर येथील महापालिकेच्या माँसाहेब मीनाताई ठाकरे विद्यालयाच्या विद्यार्थ्यांनी परिसरात दिंडी काढली. विद्यार्थी वारकऱ्यांच्या भूमिकेत होते, तर विद्यार्थिनींनी डोक्यावर तुळस घेत दिंडीत सोहळ्यात सहभाग घेतला. सामाजिक कार्यकर्ते संदीप पवार यांच्या हस्ते पालखीचे पूजन करून दिंडीला सुरुवात करण्यात आली.
दरम्यान, वारकऱ्यांची वेशभूषा केलेल्या माँसाहेब मीनाताई ठाकरे विद्यालयातील विद्यार्थ्यांनी हनुमान मंदिराच्या प्रांगणात रिंगण तयार केले होते. मध्यभागी पालखी ठेवत विद्यार्थ्यांसह शिक्षकांनीदेखील रिंगण सोहळ्याचा आनंद लुटला.
---
दिंडी सोहळ्याने फुलले शालेय आवार
--
सावित्रीबाई फुले विद्यामंदिर
पखालरोडवरील मातोश्री सावित्रीबाई फुले विद्यामंदिरात आषाढी एकादशी दिंडी काढून भक्तिमय वातावरणात साजरी झाली. प्रारंभी विठ्ठलाच्या पालखीचे मान्यवरांच्या हस्ते पूजन झाले. विठ्ठलाच्या आरतीबरोबरच अभंगही सादर झाले. ज्योती महाले यांनी आषाढी एकादशीचे महत्त्व विशद केले. वारकऱ्यांच्या वेशातील विद्यार्थी व डोक्यावर तुळस घेतलेल्या नऊवारी साडीतील विद्यार्थिनी दिंडीत सहभागी झाल्या होत्या. प्रसाद जॉन, जेनी प्रसाद, शाळेचे मुख्याध्यापक सुनील शेवाळे उपस्थित होते. सुनील शेवाळे यांनी प्रास्ताविक केले. मोहन माळी यांनी सूत्रसंचालन केले. संगीता महाजन,विद्या महाजन, जयश्री पवार, वैशाली राजभोज, प्रकाश खैरनार, प्रशांत गवळी, नीलिमा फडोळ, लक्ष्मण काशिद आदींसह पालक उपस्थित होते.
--
के. के. वाघ प्रायमरी स्कूल
आडगाव ः सरस्वतीनगर येथील शाळेत दिंडी काढण्यात आली. टाळ-मृदंगाच्या गजरात वारकऱ्यांच्या वेशभूषेतील चिमुकले त्यात सहभागी झाले होते. हर्ष पानसरे व सौरभ मोहिते यांनी विठ्ठलाची, तर ईश्वरी आहेर व समृद्धी पोकळे यांनी रुक्मिणीची वेशभूषा साकारली होती. प्राचार्य अश्विनी पवार यांनी पालखीचे पूजन केले. अनुराधा ढवण, माधुरी निफाडे, सरिता जाधव, चैताली पिंगळे, अनुराधा पैठणकर आदी उपस्थित होते.
--
अभिनव बालविकास मंदिर
नाशिकरोड ः जेलरोडच्या गणेश धात्रक शिक्षण संस्थेच्या अभिनव बालविकास मंदिर व डीएफडी माध्यमिक विद्यालयात आषाढी एकादशी उत्साहात झाली. विद्यार्थ्यांनी विठ्ठल-रुक्मिणीसह संत ज्ञानेश्वर, संत तुकाराम, संत एकनाथ, संत निवृत्तिनाथ आदींची वेशभूषा केली होती. संस्थापक संचालक दत्तात्रय धात्रक, रंजना धात्रक, एंजल स्कूलच्या प्राचार्या मनीषा दराडे, आनंद महाराज कॉलेजच्या सुलभा डांगे, डॅफोडिल्सच्या मुख्याध्यापिका पायल पंजाबी, प्राथमिक विभागप्रमुख जयश्री सरोदे, वैशाली पाटील उपस्थित होते. माधुरी निमसे यांनी अभंग सादर केले. शीतल भामरे यांनी सूत्रसंचालन केले.
--
(फोटो ः सतीश काळे, पंकज चांडोले, प्रशांत धिवंदे, नामदेव पवार, डॉ. बाळकृष्ण शेलार, अभिजित राऊत)
मोबाइल अॅप डाउनलोड करा आणि राहा अपडेट
