म. टा. प्रतिनिधी, नाशिक
जेवण करून हॉटेलमधून बाहेर पडलेल्या महिलेच्या गळ्यातील सोन्याचे मंगळसूत्र दुचाकीवर आलेल्या चोरट्यांनी तोडून नेले. ही घटना मुंबई नाका पोलिस स्टेशनपासून हाकेच्या अंतरावर घडली.
पोलिसांनी परिसरातील सीसीटीव्ही यंत्रणेद्वारे चोरट्यांचा माग काढण्याचा प्रयत्न केला. मात्र, २४ तास उलटूनही चोरटे पोलिसांच्या हाती लागलेले नाही. या प्रकरणी मुंबई नाका पोलिस स्टेशनमध्ये गुन्हा दाखल झाला आहे. पोलिस कर्मचाऱ्यांची नातेवाईक असलेल्या नाझीया फैयाज सय्यद (रा. पोलिस वसाहत, गंगापूर रोड) या महिलेने घटनेबाबत तक्रार दिली आहे. नाझीया सय्यद कुटुंबीयांसह मुंबई नाका पोलिस स्टेशनपासून हाकेच्या अंतरावर असलेल्या सायबा हॉटेल येथे बुधवारी (दि. २८) रात्री जेवणासाठी गेल्या होत्या. रात्री साडे दहा वाजेच्या सुमारास त्या कारमध्ये बसत असताना एका तरुणाने त्यांच्या गळ्यातील ७० हजार रुपयांचे मंगळसूत्र तोडून पोबारा केला. या घटनेनंतर सय्यद यांच्या पतीने तात्काळ कारने चोरट्याचा पाठलाग केला. मात्र, पुढे उभ्या असलेल्या दुचाकीस्वार साथीदारासमवेत आरोपी फरार होण्यात यशस्वी झाला. वर्दळीच्या ठिकाणी घडलेल्या या घटनेने रात्री-अपरात्री प्रवास करणाऱ्या महिलांच्या सुरक्षेचा प्रश्नही समोर आला आहे. दरम्यान, चेन स्नॅचिंगच्या घटनेनंतर महिलेने आरडाओरड केल्याने हॉटेलमधील नागरिकांसह नजीकच असलेल्या पोलिस स्टेशनमधील कर्मचाऱ्यांनी घटनास्थळी धाव घेतली. पोलिसांनी तात्काळ हॉटेल व परिसरातील सीसीटीव्हीची तपासणी केली. कॅमेऱ्यांच्या फुटेजमध्ये आरोपी दिसत असून, ते महिलेच्या पाळतीवर असल्याचे स्पष्ट होते. मात्र, घटना घडून २४ तासानंतरही चोरट्यांचा थांगपत्ता लागलेला नाही. या प्रकरणी अधिक तपास सहाय्यक निरीक्षक मनोज शिंदे करीत आहेत.
मृतदेह आढळला
पंचवटीतील होंडा शोरूम भागातील पाणपोईच्या बाकड्यावर बुधवारी (दि. २८) दुपारी ४० ते ४५ वयोगटातील व्यक्तीचा मृतदेह आढळून आला. मृतदेहाची अद्याप ओळख पटलेली नाही. त्यामुळे खालील वर्णनाच्या व्यक्तीबाबत माहिती असल्यास पोलिसांशी संपर्क साधावा, असे आवाहन हवालदार बी.व्ही. थेटे यांनी केले आहे. रंगाने निमगोरा, उंची साडे पाच फूट, शरीराने सडपातळ, चेहरा उभट, डोक्याचे केस वाढलेले, पाठीवर जुन्या जखमेचे व्रण असे मृतदेहाचे वर्णन आहे. त्याने अंगात विटकरी रंगाचा बारीक चौकटींचा शर्ट व विटकरी रंगाची पॅण्ट परिधान केली आहे.
अपघातामधील जखमीचा मृत्यू
नाशिक : भरधाव दुचाकीने धडक दिल्याने गंभीर जखमी झालेल्या व्यक्तीचा उपचारादरम्यान मृत्यू झाला. अपघाताची घटना सोमवारी (दि. २६) दुपारी त्र्यंबकरोडवर झाली होती. या प्रकरणी मुंबईनाका पोलिस स्टेशनमध्ये गुन्ह्याची नोंद करण्यात आली.
सुधाकर बाबुराव भावसार (रा. फुले शासकीय वसाहत, टिळकवाडी) असे मृत्यू झालेल्या व्यक्तीचे नाव आहे. काही दिवसांपूर्वी भावसार सिव्हिल हॉस्पिटलच्या सेवेतून निवृत्त झाले होते. भावसार टिळकवाडीकडून भवानी सर्कलकडे सोमवारी दुपारी अडीच वाजेच्या सुमारास पायी जात असताना भरधाव दुचाकीने त्यांना धडक दिली होती.
कॉलेजरोडला भरदिवसा चोरी
नाशिक ः भरदिवसा घरात प्रवेश करून चोरट्यांनी बेडरूममधील कपाटातून सोने-चांदीचे दागिने, रोकडसह असा सुमारे साडेचार लाख रुपयांचा मुद्देमाल चोरी केला. ही घटना कॉलेजरोड परिसरात घडली. या प्रकरणी सरकारवाडा पोलिस स्टेशनमध्ये गुन्ह्याची नोंद केली आहे.
सपना नंदलाल जैन (रा. रुपक सोसा. विसेमळा) यांनी याबाबत तक्रार दिली आहे. मंगळवारी (दि. २७) सायंकाळी ही घटना घडली. जैन कुटुंबीय कामात व्यस्त असतांना चोर उघड्या घरात घुसला. त्याने थेट बेडरुममध्ये प्रवेश करीत कपाटातील रोकड, सोन्याचांदीचे दागिने तसेच बेडवर ठेवलेला लॅपटॉप, माऊस, चाजर्र, हेडफोन असा सुमारे चार लाख ५९ हजार रुपयांचा ऐवज चोरी केला.
पेटीएम वॉलेटचा गैरवापर
हरवलेल्या मोबाइलवर डाऊनलोड केलेल्या पेटीएम वॉलेटचा गैरवापर करण्यात आल्याची घटना समोर आली आहे. भामट्यांनी सापडलेल्या मोबाइलवरील पेटीएम वॉलेटचा वापर करीत बँक खात्यातील चार हजार रुपयांची रक्कम परस्पर काढून घेतली. या प्रकरणी इंदिरानगर पोलिस स्टेशनमध्ये आयटी अॅक्टनुसार गुन्हा दाखल करण्यात आला आहे. अतिष अशोक जोशी (रा. निसर्ग रो हाऊस, देवळालीरोड) यांच्या तक्रारीनुसार, २१ ते २४ जून दरम्यान जोशी कुलू मनाली येथे पर्यटनासाठी गेले होते. या ठिकाणी त्यांची बॅग हरवली. बॅगमध्ये कॅमेरा, मोबाइलसह अन्य साहित्यही होते. दरम्यान ते सहलीवरून परतले. मात्र, त्यांच्या हरवलेल्या मोबाइलमध्ये डाऊनलोड केलेल्या पेटीएम वॉलेटचा भामट्यांनी गैरवापर केला. जोशी यांच्या बँक खात्यातील चार हजार १० रुपयांची रक्कम चोरट्यांनी परस्पर खर्ची केली. घटनेचा अधिक तपास निरीक्षक चौधरी करीत आहेत.
ज्येष्ठ नागरिक बेपत्ता
नाशिकरोड : उपनगर परिसरातील लोखंडे मळ्यातील हनुमंत नगरमधील शांताराम दगडू रुपवते (६८, रा. रुख्मिणी हौसिंग सोसायटी) हे सोमवार (दि. २६) दुपारी तीनच्या सुमारास फिरायला जातो असे सांगून घरातून बाहेर पडले. त्यानंतर सायंकाळी नातेवाइकांनी त्यांचा शोध घेतला असता ते कुठेही सापडले नाहीत. याबाबत उपनगर पोलिस ठाण्यात नातेवाइकांनी तक्रार दिली आहे. रंग सावळा, मध्यम बांधा, उंची चार फूट असे त्यांचे वर्णन आहे. ते आढळल्यास उपनगर पोलिसांशी संपर्क साधण्याचे आवाहन पोलिस निरीक्षक बाजीराव महाजन यांनी केले आहे.
मोबाइल अॅप डाउनलोड करा आणि राहा अपडेट
