म. टा. वृत्तसेवा, सिन्नर फाटा
यंदा खरीप हंगामाच्या सुरुवातीलाच नाशिक विभागातील बहुतांश तालुक्यांत मोसमी पावसाने हजेरी लावल्याने खरीप हंगामाची तयारी पूर्ण झाली असून, काही तालुक्यांत पेरण्यांनाही सुरुवात झाली आहे. कृषी विभागानेही शेतकऱ्यांना मुबलक प्रमाणात बियाणे उपलब्ध व्हावीत, यासाठीचे नियोजन केले आहे. नाशिक विभागात एकूण १७ पिकांच्या २ लाख २६ हजार ७४४ क्विंटल बियाण्यांची कृषी विभागाकडून उपलब्धता करून देण्यात आली असून, त्यापैकी १ लाख एक हजार ८८५ क्विंटल बियाण्यांचा प्रत्यक्ष बाजारात पुरवठाही झालेला आहे.
यंदा हवामान खात्याने ९८ टक्के पावसाचा अंदाज वर्तवला होता. त्यामुळे कृषी विभागाने यंदाच्या खरिपाचे नियोजन करताना बियाण्यांची मागणी मोठ्या प्रमाणात नोंदवली होती. महाबीज व खासगी कंपन्यांकडे कृषी विभागाने नोंदविलेल्या बियाण्यांच्या मागणीपैकी २ लाख २६ हजार ७४४ क्विंटल बियाणे नाशिक विभागाला प्राप्त झाले आहे. त्यापैकी प्रत्यक्ष बाजारात निम्म्यापेक्षा जास्त बियाणे शेतकऱ्यांसाठी उपलब्ध झालेले आहे.
१७ पिकांचे बियाणे उपलब्ध
कृषी विभागाच्या नियोजनानुसार महाबीज व काही खासगी कंपन्यांचे विविध १७ पिकांचे बियाणे बाजारात उपलब्ध झालेले आहे. त्यात संकरित ज्वारी, सुधारित ज्वारी, संकरित बाजरी, सुधारित बाजरी, भात, मका, तूर, मूग, उडीद, भुईमूग, सूर्यफूल, तीळ, सोयाबीन, संकरित व सुधारित कापूस, बीटी कापूस, नागली या पिकांच्या बियाण्यांचा समावेश आहे.
सोयाबीन, मक्याला प्राधान्य
विभागातील शेतकरी सोयाबीन व मका यांसारख्या पिकांना प्राधान्य देत असल्याने यंदाच्या खरिप हंगामात नाशिक विभागासाठी कृषी विभागाने सोयाबीन बियाण्यांचे ६३ हजार ४५२, तर मका बियाणे ७७ हजार १७८ क्विंटलचे वाटप केलेले आहे. त्यापैकी सोयाबीनचे २८ हजार ६८७, तर मक्याचे २८ हजार ५०० क्विंटल बियाणे प्रत्यक्षात बाजारात उपलब्ध झालेले आहे. गेल्या काही वर्षांत विभागातील शेतकरी सोयाबीन व मका या पिकांना प्राधान्य देत असल्याने या पिकांच्या लागवडीखालील क्षेत्र वाढू लागले आहे. परिणामी कृषी विभागाकडून या पिकांच्या बियाण्यांच्या वाटपातही मोठी वाढ झाल्याचे दिसून येत आहे.
गुणनियंत्रणासाठी भरारी पथके
विभागातील बियाणे व खतांचा काळाबाजार, बोगस खते व बियाणे विक्री करणाऱ्या विक्रेत्यांचा शोध घेऊन त्यांच्यावर कारवाई करण्यासाठी विभागीय स्तरावर एक, जिल्हा स्तरावर ५, तालुका स्तरावर ५४ अशी विभागात एकूण ६० भरारी पथकांची व ६० गुणनियंत्रण कक्षांची स्थापना कृषी विभागाकडून करण्यात आलेली आहे. गेल्या वर्षी गुणवत्ता नियंत्रणाच्या दृष्टीने या पथकांनी विभागात ७०३४ नमुने काढले होते, तर ४४ विक्रेत्यांवर परवाने निलंबनाची, तर ३४ विक्रेत्यांवर परवाने रद्दची कारवाई केली होती, तर ४९० इतके विक्री बंदचे आदेश देण्यात आले होते.
मोबाइल अॅप डाउनलोड करा आणि राहा अपडेट
