सदनिकेचा ताबा व खरेदी खत वेळेत न दिल्यामुळे जिल्हा ग्राहक न्यायमंचाने बिल्डरला दोन महिन्यात सदनिकेचा ताबा देण्याचे तसेच हस्तांतरण दस्त तयार करुन देण्याचे आदेश दिले आहेत. त्याचप्रमाणे जून २०१३ पासून १६ लाख ६ हजार ५०० रुपये या सदनिकेच्या किमतीवर १८ टक्के व्याज देण्याचेही आदेश दिलेत. शिवाय शारीरिक व मानसिक त्रासापोटी १० हजार व अर्जाच्या खर्चाचे पाच हजार रुपये असा पंधरा हजारांचा दंडही ठोठावला.
बिल्डर मे. साधना शेल्टर क्राफ्ट विरुध्द ज्योती गुलशन वर्मा यांनी ग्राहक न्यायमंचात तक्रार केल्यानंतर हा निकाल देण्यात आला. या तक्रारीत वर्मा यांनी गंगापूर गावातील संगम अपार्टमेंट येथे जून २०१३ मध्ये १६ लाख ६ हजार ५०० रुपयांना सदनिका विकत घेतल्याचे म्हटले आहे. त्यासाठी करारनामा करण्यात आला. त्यात १५ मे २०१४ ला सदनिकेचा कब्जा व १५ नोव्हेंबर २०१४ रोजी खरेदीखताचा अंत‌मि दस्त देण्याचे ठरले. तसे न केल्यास १ जून २०१३ पासून व्याज देण्याचेही त्यात म्हटले होते. पण वरील करारनाम्यानुसार ताबा व खरेदीखत देण्यात आले नाही. त्यामुळे त्यांनी न्यायमंचात तक्रार दाखल केली. या तक्रारीवर बिल्डरतर्फे बाजू मांडण्यात आली की, करारनामा केल्यावर बांधकाम पूर्णत्वाचा दाखला देण्याचे काम नाशिक महानगरपालिकेने कायदेशीर बाबीमुळे थांबवले. त्यामुळे खरेदीखत देता आले नाही. त्यात आमचा काही दोष नाही. त्याबरोबरच बांधकाम साहित्याच्या वाढलेल्या किमती व सतत चार वर्षे असलेल्या दुष्काळी परिस्थितीमुळे पाणी उपलब्ध होऊ शकले नाही. त्यामुळे बांधकाम व्यवसाय ठप्प झाला. सेवा देण्याची कोणतीही कमतरता केली नाही, असे नमूद करण्यात आले.
या दोन्ही बाजू ऐकल्यानंतर न्यायमंचाने निकाल देताना सांगितले की, महाराष्ट्र ओनरशिप ऑफ फ्लॅट अॅक्ट, १९६३ च्या कलम ४ नुसार करण्यात आलेल्या कराराच्या अटींप्रमाणे ताबा न दिल्यास तक्रारदार ग्राहक कलम ८ नुसार भरलेल्या रकमेचा परतावा मागू शकतो, अशी तरतूद आहे. या तरतुदीचा भंग केल्यामुळे बिल्डरने सेवा देण्यास कमतरता केल्याचे दिसून येत आहे. त्यामुळे त्यांनी दोन महिन्यात सदनिकेचा ताबा देऊन खरेदी खत करावे, १८ टक्क्यांप्रमाणे व्याज द्यावे. त्याचप्रमाणे शारीरिक व मानसिक त्रासापोटी १० हजार व अर्जाच्या खर्चाचे ५ हजार असे १५ हजार रुपये ग्राहकास अदा करावेत. हा निकाल न्यायमंचाचे अध्यक्ष मिलिंद सोनवणे, सदस्या प्रेरणा काळुंखे - कुलकर्णी यांनी दिला.
मोबाइल अॅप डाउनलोड करा आणि राहा अपडेट
