म. टा. खास प्रतिनिधी, नाशिक
गेल्या १४ जून रोजी झालेल्या मुसळधार पावसाच्या आठवणी ताज्या असतानाच शनिवारी पुन्हा शहराला संततधार पावसाने झोडपून काढले. सकाळपासूनच कोसळणाऱ्या पावसाने पुन्हा शहराची दैना उडाली. पावसाळापूर्व कामांच्या ढिलाईमुळे शनिवारी पुन्हा ठिकठिकाणी पाणी साचल्याने नागरिकांची तारांबळ उडाली.
दिवसभर पावसाची रिपरिप सुरू असल्याने आणि वादळी वाऱ्यामुळे अनेक भागात वीज गायब झाली, तर अनेक ठिकाणी वृक्ष कोसळल्याने वाहतुकीवर त्याचा विपरित परिणाम झाला. पंचवटी, जुने नाशिक, भद्रकाली, सीबीएस, शालिमार, द्वारका, इंदिरानगर, सातपूर या ठिकाणी अनेक भागांमध्ये पाणी साचले होते. त्यामुळे वादानंतर प्रशासनाने घाईघाईत केलेल्या नालेसफाईचा कोणताही फायदा झाला नाही. अनेक भागात दिवसभर वीज गायब झाल्याने नागरिकांना मोठा त्रास सहन करावा लागला असून, महावितरणच्या कामांचीही पोलखोल झाली. गेल्या वेळेपेक्षा पावसाचे प्रमाण कमी प्रमाणात असल्याने सराफ बाजारात काहीसी समाधानकारक स्थिती होती.
--
खंडित वीजपुरवठ्याचा ‘वार’
सिन्नर फाटा ः देखभाल दुरुस्तीच्या कारणास्तव शहरातील विविध भागातील तब्बल सतरा वीजवाहिन्यांवरील वीजपुरवठा वेगवेगळ्या वेळेत खंडित राहिल्याने लाखो नाशिककरांना खंडित वीजपुरवठ्याचा ‘वार’ सहन करावा लागला. खंडित वीजपुरवठयाचे वेळापत्रक जाहीर केलेले असले, तरी बहुतांश ठिकाणी नियोजित वेळेपेक्षाही जास्त काळ वीजपुरवठा खंडित राहिल्याने नागरिकांचे हाल झाले. काही भागात तब्बल पाच तास वीजपुरवठा खंडित राहिल्याने नागरिक बेहाल झाले महावितरणकडून प्रत्येक आठवड्याला वीजवाहिन्यांची दुरुस्ती का करावी लागते, असा संतप्त सवाल नागरिकांकडून केला जात आहे. वीजपुरवठ्यासंदर्भात तक्रारी करण्यासाठी महावितरणने मोबाइल ऍपची सुविधा सुरू केलेली आहे. या सुविधेचा नागरिक वापर करीत आहेत.या पद्धतीने तक्रार केल्यानंतर नागरिकांना संबंधित कर्मचाऱ्याचा मोबाइल नंबर एसएमएसद्वारे कळविला जातो. मात्र, या मोबाइल नंबरवर संपर्क साधल्यास संबंधित कर्मचारी नागरिकांची तक्रार सोडविण्यास टाळाटाळ करीत असल्याच्या नागरिकांच्या तक्रारी आहेत.
---
औरंगाबाद नाक्यावर साचले पाणी
पंचवटी ः रस्ता तयार करताना पाण्याचा निचऱ्याची व्यवस्था केली नसल्याने औरंगाबाद नाका येथील रस्त्यावरच पाणी साचू लागले आहे. शनिवारी येथे साचलेल्या पाण्यातून वाहने चालविणे अवघड बनले होते. थोड्याशा पावसाने येथे पाणी साचत असल्यामुळे, तसेच वाहनचालकांना या पाण्याचा आणि खड्ड्याचा अंदाज येत नसल्यामुळे येथे अपघात घडण्याची शक्यता वाढली आहे.
--
महात्मानगरला वृक्ष कोसळले
सातपूर ः परिसरात अनेक ठिकाणी पाणी साचण्याच्या व घरात पावसाचे पाणी जाण्याच्या घटना शनिवारी घडल्या. जोरदार पावसामुळे महात्मानगर भागात चार ठिकाणी वृक्ष कोसळले. सुदैवाने हानी टळली. गणपती मंदिर, गुलमोहर कॉलनी, गंगापूररोड व नरसिंहनगर येथे पावसाने वृक्ष कोसळल्याचा घटना घडल्या. रस्त्यालगत झुकलेल्या वृक्षांच्या फांद्याही अग्निशमन दलाचे जवान व उद्यान विभागाने काढल्या. सातपूर अग्निशमन दलाच्या जवानांनी उद्यान विभागाच्या वतीने कोसळलेले वृक्ष हटविले. परिसरात ठिकठिकाणी साचलेले पाणी महापालिकेच्या बांधकाम विभागाकडून वाहते करण्याचे काम हाती घेण्यात आले होते.
--
सिडकोत रस्ते जलमय
सिडको ः परिसरात संततधार पावसाने हजेरी लावल्याने सिडकोतील सर्वच रस्ते जलमय झाले होते. महापालिकेच्या वतीने मागील आठवड्यातील गटारी व नाले साफसफाई झाल्याने पाणी साचण्याचे प्रमाण काहीसे कमी होते. महापालिकेच्या बांधकाम विभागाने विविध भागात साचलेले पाणी काढण्याचे काम सकाळपासूनच केल्याचे दिसून आले. बांधकाम विभागाच्या वतीने उंटवाडी येथील नंदिनी पुलाजवळ, गोविंदनगर, मनोहरनगर, आनंदनगर या ठिकाणी साचलेले पाणी काढण्याचे काम सुरू होते. इंदिरानगर भागात सकाळपासून सुरू असलेल्या पावसाने नागरिकांची तारांबळ उडाली होती. कलानगर, चार्वाक चौक या मुख्य वर्दळीच्या चौकांमध्ये पाणी साचल्याने नागरिकांचे हाल झाले.
--
गंगापूर धरण समूहात मात्र भर
मान्सूनच्या पावसाचे जूनच्या दुसऱ्या आठवड्यातच आगमन झाले असले, तरी शनिवार खऱ्या अर्थाने पावसाचा ठरला. नाशिककरांची सकाळ उजाडली तेव्हा पावसाची संततधार सुरूच होती. ना ढगांचा गडगडाट. ना विजांचा कडकडाट. पावसाच्या संततधार सरींनी केवळ शहरातच नव्हे, तर बहुतांश ग्रामीण भागातही दमदार हजेरी लावली. त्यामुळे शहरातील रस्ते जलमय झाले असले, तरी शहराला पाणीपुरवठा करणाऱ्या गंगापूर धरण समूहातील पाणी पातळी वाढण्यास त्यामुळे मदत होणार आहे.
--
अनेकांनी लुटला पावसाचा आनंद
शहरात दिवसभर संततधार पाऊस सुरू होता. सकाळी सात ते सायंकाळी पाच या कालावधीत शहरात ५४.५ मिलिमीटर पावसाची नोंद झाली. शनिवारी औद्योगिक वसाहतींमधील कामगार, तसेच सरकारी कार्यालयांना सुटी असल्याने अनेकांनी कुटुंबीयांसमवेत पावसाचा आनंद लुटला. शहरातील बहुतांश भागात दिवसभर विजेचा खेळखंडोबा झाल्याने नागरिकांचा हिरमोड झाला. नाशिक तालुक्यात ४२ मिलिमीटर पावसाची नोंद झाली.
मोबाइल अॅप डाउनलोड करा आणि राहा अपडेट
