येथील भाईचंद हिराचंद रायसोनी सोसायटीत शहरातील ज्येष्ठ नागरिकांच्या ठेवी अडकल्या आहेत. सोसाटीच्या संचालकांसह सल्लागार मंडळावर गुन्हा दाखल झालेला असतांनाही त्यांना अद्याप अटक झालेली नाही. त्यामुळे संबंधितांना अटक करून ठेवी परत मिळाव्यात, या मागणीसाठी ठेवीदार ज्येष्ठ नागरिकांनी शुक्रवारी मालेगावात उपोषण केले.
पतसंस्थेच्या मालेगाव शाखेत शहरातील ज्येष्ठ नागरिकांनी स्थानिक सल्लागार मंडळाच्या आश्वासनांवर गुंतवणूक केली. लाखो रुपयांच्या ठेवी असतांना शाखेकडून कुठलाही परतावा मिळाला नाही. आता तर शाखाही बंद आहे. त्यामुळे गुंतवणूकदारांना आर्थिक फटका बसला आहे. या संदर्भात छावणी पोलिस ठाण्यात फसवणुकीचा गुन्हा दाखल करून दोन वर्ष उलटले तरीही संशयीतांना अटक झालेली नाही. त्यामुळे याकडे शासन व पोलिस प्रशासनाचे लक्ष वेधण्यासाठी ज्येष्ठ नागरिकांनी भर उन्हात उपोषण केले . या आंदोलनात अन‌िल पाठक, गोविंद राजपूत, सुनील आहीरे, अरुण भावसार, यागेश मोरे, शरद देवरे, गुलाब पाटील, मनोहर हिरे सहभागी झाले आहेत.
0000
पिंपळगावात दरोडा
म. टा. वृत्तसेवा, पिंपळगाव बसवंत/निफाड
पिंपळगाव बसवंत येथील चिंचखेड रोड लगत राहणाऱ्या रवींद्र रामदास मोरे यांच्या घरावर शुक्रवारी पहाटे तीन वाजेच्या सुमारास दरोडा पडला. चोरट्यांनी मोरे कुटुंबावर प्राणघातक हल्ला केला असून, रवींद्र मोरे व त्यांच्या वहिनी शीतल मोरे जखमी झाले आहेत. त्यांच्यावर रुग्णालयात उपचार सुरू आहेत. चोरट्यांनी दहा हजार रुपये, मंगळसूत्र लंपास केले. या घटनेमुळे परिसरात भीती पसरली असून, पोलिस बंदोबस्ताची मागणी करण्यात आली आहे.
चिंचखेड रोडलगत असलेल्या मोरे बंगल्याच्या स्वयंपाकघराचा दरवाजा तोडून दरोडेखोर आत घुसले. शीतल मोरे यांनी चोरट्याना पाहताच आरडाओरड केली. त्यामुळे रवींद्र मोरे यांना जाग आली. त्यांची दरोडेखोरांशी झटापट झाली. दरोडेखोरांनी लाकडी दांडक्यांनी रवींद्र मोरे यांच्या डोक्यात वार केला. त्यामुळे ते बेशुद्ध पडले. त्यानंतर त्यांनी शीतल यांनाही मारहाण केली. घरातील लहान मुलांनाही एका खोलीत बंद केले. घरातील दहा हजाराची रोकड व शीतल यांच्या गळ्यातील मंगळसूत्र ओरबाडून घेतले. सर्व दरोडेखोर हिंदीत बोलत असल्याचे मोरे कुटुंबियांनी सांगितले.
इतर घरांवरही दगडफेक
चोरटे मोरे यांच्या घरात असताना त्यांचे दोन साथीदार बाहेर उभे होते. मोरे यांच्या घरात सुरू असलेला प्रकार समोर राहणारे दीपक शिंदे यांना कळताच त्यांनी मित्रांना फोन करण्याचा प्रयत्न केला. मात्र, मोरे यांच्या घराबाहेर असलेल्या दोघांच्या हे लक्षात येताच त्यांनी शिंदे यांच्या घरावर दगडफेक केली. त्यानंतर सोमनाथ निकम यांनी पोलिस स्टेशनला फोन केला. परंतु फोन उचलला गेला नाही. नंतर पिंपळगावचे माजी सरपंच भास्करराव बनकर व अग्निशमन दलाचे कार्यकर्ते येथे आले. तोपर्यंत दरोडेखोर पसार झाले होते.
पोलिसांना पोहोचण्यास उशीर
पिंपळगाव बसवंत पोलिस स्टेशनपासून पाच किलोमीटर अंतरावर ही घटना घडली, तरी पोलिसांना घटनास्थळी पोहोचण्यासाठी अर्धा ते पाऊण तास लागल्याचे प्रत्यक्षदर्शींनी सांगितले. तसेच पोलिस स्टेशनमध्ये फोन केला असता तो कुणीही घेतला नसल्याचे रहिवाशांनी सांगितले.
मोबाइल अॅप डाउनलोड करा आणि राहा अपडेट
