टीम मटा
गेल्या आठ दहा दिवसांपासून जिल्ह्यात पावसाने दडी मारल्यामुळे बळीराजा चिंतेत सापडला आहे. जिल्ह्यातील सटाणा, मालेगाव, नांदगाव, निफाड, येवला तालुक्यात पहिल्या पावसाने पेरणी झाली. मात्र त्यानंतर पावसाने पाठ फिरवल्यामुळे काही भागात दुबार पेरणीचे संकट उभे राहिले आहे. सर्वात जास्त पर्जन्य असणारे त्र्यंबकेश्वर आणि इगतपुरी तालुक्यात मात्र अद्यापही दमदार पाऊस झालेला नसल्यामुळे शेतकरी आस लावून बसले आहेत.
दमदार पावसाची आस मालेगावात कायम
मालेगाव ः शहर व तालुक्यात जूनच्या पहिल्या आठवड्यात मान्सूनपूर्व पावसाने दमदार हजेरी लावल्याने शेतकरी बांधवांनी पेरणीपूर्व मशागतीची कामे आटोपून पेरणी सुरू केली. आतापर्यंत तालुक्यात २५ टक्के पेरणी झाली असली तरी पावसाने मात्र दडी मारल्याने शेतकऱ्यांची चिंता वाढली आहे.
पावसाची सुरुवात चांगली झाली असली तरी गेल्या काही दिवसांपासून पावसाने पाठ फिरवल्यामुळे शेती व पिण्याचा पाण्याचा प्रश्न निर्माण झाला आहे. तालुक्यात २० हजार हेक्टरवर पेरणी झाली आहे. मका पीक सर्वाधिक १० हजार हेक्टरवर, तर कापसाची आठ हजार हेक्टरवर लागवड झाली आहे. मान्सूनपूर्व पावसाच्या दमदार आगमनाने शेतकरी बांधवानी पेरणी केली असली तरी नंतर मात्र पाऊस गायब झाल्याने दुबार पेरणी करण्याची वेळ येते की काय अशी चिंता व्यक्त होते आहे.
तालुक्यातील करंजगव्हाण, कळवाडी, सौंदणे आदी परिसरात पावसाची प्रतीक्षा कायम आहे. सरासरीच्या २८ टक्के पावसाची नोंद झाली आहे. शहराला पाणी पुरवठा करणाऱ्या गिरणा धरणात ४ हजार ८६९ दलघफु (२६ टक्के) इतका पाणीसाठा आहे. गेल्या वर्षी जूनमध्ये हा साठा शून्य टक्के होता. शहरात सध्या एक दिवसाआड पाणीपुरवठा होत असून रमजान महिना सुरू असल्याने पाण्याची मागणी वाढली आहे.
येवला तालुक्याला रोजच हुलकावणी
येवला ः यंदा मृग नक्षत्राने दमदार श्रीगणेशा करताना तालुक्यात खरिपाचे चक्र पुढे सरकले गेले असले, तरी गेल्या सहा दिवसांत तालुक्यात अगदी सर्वदूर वरुणराजाने पुन्हा दडी मारल्याने बळीराजाचा जीव टांगणीला लागला आहे. खरिपाची पेरण्या केलेल्या तालुक्यातील शेतकऱ्यांची चिंता वाढली आहे.
एकीकडे मोठे अर्थसंकट उभे असतानाही शेतकऱ्यांनी कसाबसा पैसाआडका उभा करत पेरणी केली आहे. गेल्या सहा दिवसांपासून दडी मारलेला पाऊस गुरुवारी (दि.२२) दुपारी दोनच्या सुमारास येवला तालुक्यात आर्द्राचे ढग काहीसे दाटून येताना आता बरसणार असे चित्र निर्माण झाले. मात्र वरुणराजाने क्षणार्धात पुन्हा पाठ फिरवल्याने तालुक्यातील शेतकऱ्यांचा हिरमोड झाला.
त्र्यंबक, इगतपुरीकडे फिरवली पाठ
त्र्यंबकेश्वर ः दरवर्षी जूनच्या पहिल्याच आठवड्यात दमदार पाऊस होणारा त्र्यंबकेश्वर तालुका अद्याप कोरडाच आहे. शहरासह तालुक्यात पावसाने दडी मारल्यामुळे शेतकरी चिंतेत सापडले आहेत. वळवाच्या किरकोळ पावसानंतर अद्यापही या भागात पावसाने पाठ फिरवली आहे. अधूनमधून एखादी सरी कोसळण्यापलीकडे तालुक्यात पावसाने कुठेही दमदार हजेरी लावलेली नाही. इगतपुरी तालुक्याकडेही यंदा पावसाने पाठ फिरवली आहे. गेल्या आठ दहा दिवसांपासून तुरळक सरींपलीकडे दमदार पाऊस झालेला नाही.
चांदवड, नांदगावात समाधानकारक पाऊस
मनमाड ः चांदवड, नांदगाव तालुक्यात १५ जून अखेर सरासरीपेक्षा जास्त पावसाची नोंद होऊन धरणांत मुबलक पाणीसाठा आहे. मात्र गेल्या तीन दिवसांपासून पावसाने दडी मारल्यामुळे येथील शेतकरीही चिंतेत आहे.
नांदगाव तालुक्यात जूनच्या पहिल्या आठवड्यात १२० मी.मी. पाऊस झाला आहे. चांदवड तालुक्यात आठ दिवस आधी झालेल्या दमदार पावसाने शेतकरी वर्गात आनंदाचे वातावरण आहे. मात्र त्यानंतर शेतीसाठी पोषक अशा दमदार पावसाची अद्यापही प्रतीक्षाच आहे. काही भागात पेरणी झाली आहे.
निफाडमध्ये समाधानकारक पाऊस
निफाड ः तालुक्यात पावसाने ७ जूनलाच हजेरी लावल्यामुळे शेतकरी समाधानी आहे. गेल्या सहा दिवसांपासून पाऊस गायब असला तरीही सुरुवातीला झालेला मान्सूनपूर्व पावसामुळे निफाड तालुक्यातील बहुतांश शेतकऱ्यांनी पेरणी पूर्ण केली असून, पुढील तयारीला लागले आहेत. गुरुवारी तालुक्यात काही ठिकाणी पाऊस झाल्यामुळे शेतकऱ्यांचा जीव भांड्यात पडला आहे.
खरीप हंगामासाठी शेतकऱ्यांनी सोयाबीन पिकाला पसंती दिल्याचे दिसत आहे. खते, बी-बियाणे दुकानदारांनी दिलेल्या माहितीनुसार लोकांची सोयाबीन च्या पेरणीकडे ओढ आहे. त्या खालोखाल मक्यालाही काही गावांमध्ये पसंती आहे. तालुक्यात पाण्याचा मुबलक पुरवठा व सिंचनाच्या सोई उपलब्ध असल्याने द्राक्ष, कांदा, ऊस अशी पिके घेतली जातात. गेल्या आठवड्यात तालुक्यात लासलगाव, विंचुर, नैताळे, सोनेवाडी, खडकमाळेगाव, दावचवाडी, सायखेडा, चांदोरी या चारही भागातील गावांमध्ये चांगला पाऊस झाल्यामुळे बळीराजा सुखावला आहे. या भागात पाऊसाचा जोर इतका अधिक असल्यामुळे द्राक्षबागांसह शेतामध्ये तीन ते चार दिवस पाणी साचून होते.
तालुक्याला वरदान ठरणाऱ्या नांदूरमाध्यमेश्वर धरणातही पाण्याचा साठा असल्याने लासलगाव, विंचुरसह १६ व १२ गाव पाणीपुरवठा योजनेला काही भीती नाही. तसेच पिंपरी, रौळस, कुंदेवाडी या गावांना कादवा नदीला एप्रिलमध्ये आरक्षणाचे सोडलेले पाणी अजूनही नदीपात्रात आहे. मात्र, गेल्या सहा दिवसांपासून दडी मारलेला पाऊस जर अजून लांबला तर चिंतेची बाब ठरू शकते. पेरणी झालेल्या शेतकऱ्यांवर दुबार पेरणीचे संकट येऊ शकते.
बागलाणमध्ये पिके सापडली संकटात
सटाणा ः मृग नक्षत्रापासून सलग तीन झालेल्या पावसाने खरिपाच्या आशा पल्लवित केलेल्या असतांनाच गेल्या काही दिवसांपासून पावसाने दडी मारल्याने खरिपातील पिकांची आशा धूसर झाली आहे.
दरम्यान पाऊस लांबल्याने तालुक्यातील पिण्याच्या पाण्यासह शेती सिंचनाचा प्रश्न आ वासून उभा आहे. शहराला पाणीपुरवठा करणारे तालुक्यातील केळझर धरण कोरडेठाक झाले आहे. परिणामी केळझर ते सटाणा नदीपात्रालगतच्या गावांना शेती सिंचनासह पिण्याच्या पाण्याचे मोठे संकट उभे आहे. मृगाच्या पावसाने धरणक्षेत्रात अद्यापही अवकृपा केल्याने सटाणावासीयांची झोप उडाली आहे. शहराला कळवण तालुक्यातील चणकापूर धरणातून आवर्तन मिळते. मात्र या धरणातील पाण्याचा जलसाठा जेमतेम असल्याने तेथील अपेक्षा फोल ठरली आहे. जूनच्या प्रांरभीच झालेल्या पावसाने तालुकावासीयांना दिलासा दिला होता. मात्र ७ जूननंतर पावसाने दांडी मारली आहे. ती अद्याप कायम आहे. जून महिन्याच्या प्रारंभी तालुक्यात अवघ्या २३ मीमी. इतका पाऊस झाला असला तरीही पेरण्या बाकी आहेत.
कळवण, देवळ्याकडेही फिरवली पाठ
कळवण ः गेल्या आठवड्याभरापासून देवळा, कळवण तालुक्यात पावसाने दांडी मारली आहे. पहिल्या पावसात ज्या शेतकऱ्यांनी पेरणी केली आहे, ते संकटात सापडले आहेत. अजूनही काही भागात पेरणी झालेली नाही.
मोबाइल अॅप डाउनलोड करा आणि राहा अपडेट
