म. टा. प्रतिनिधी, नाशिक
जातीबाहेर लग्न केले, म्हणून गर्भवतीचा जीव घेणाऱ्या बापास जिल्हा व सत्र न्यायाधीश सुचित्रा घोडके यांनी सोमवारी (दि. १९) फाशीची शिक्षा सुनावली. दुर्मिळातील दुर्मीळ घटना असे निरीक्षण नोंदवत या कृत्याला देहदंडाची शिक्षाच होऊ शकते, असे कोर्टाने स्पष्ट केले. ऑनर किलिंग प्रकरणात नाशिक कोर्टाने प्रथमच फाशीची शिक्षा सुनावली असून, या ऐतिहासिक निर्णयाने जातीच्या नावावर विष पेरणाऱ्यांना बसेल, अशी अपेक्षा व्यक्त होत आहे.
एकनाथ किसन कुंभारकर (रा. मोरे मळा, पंचवटी) असे शिक्षा झालेल्या आरोपीचे नाव आहे. ‘ऑनर किलिंग’चा हा धक्कादायक प्रकार २८ जून २०१३ रोजी गंगापूर रोडवरील सावरकर हॉस्पिटलजवळ घडला होता. नऊ महिन्यांची गर्भवती असलेल्या प्रमिलाचा गळा घोटल्यानंतर कुंभारकरला कोणताही पस्तावा नव्हता. या प्रकरणी सरकारवाडा पोलिसांनी लागलीच कुंभारकरला अटक करून गुन्हा नोंदवला. या प्रकरणाचा तपास तत्कालीन सहायक पोलिस निरीक्षक राजेश आखाडे यांनी केला. सरकारी पक्षातर्फे अॅड. पौर्णिमा नाईक यांनी १० साक्षीदार व इतर पुरावे कोर्टासमोर सादर केले. त्यात रिक्षाचालक, तसेच फिर्यादी आणि डॉ. अनंत पवार यांची साक्ष महत्त्वाची ठरली. तपास पथकाने कोर्टासमोर भक्कम पुरावे सादर केले. कुंभारकरने अत्यंत शांत डोक्याने कट रचून मुलीसह तिच्या गर्भातील अर्भकाचा खून केल्याचे सिद्ध झाल्याने न्यायाधीश घोडके यांनी कुंभारकरला हत्येप्रकरणी मरेपर्यंत फाशीची शिक्षा सुनावली.
जातीबाहेरील मुलाशी लग्न केले म्हणून गर्भवतीचा जीव घेणाऱ्या बापास जिल्हा व सत्र न्यायालयाने सोमवारी (दि. १९) फाशीची शिक्षा सुनावली. नाशिक जिल्हा कोर्टाने ऑनर किलिंग प्रकरणात फाशीची शिक्षा सुनावण्याची ही कदाचित पहिलीच वेळ असावी, असे अॅड. पौर्णिमा नाईक यांनी सांगितले. सूत्रांच्या माहितीनुसार, २००७ मध्ये साटोटे हत्याकांडात चौघांना फाशीची शिक्षा झाली होती. मात्र, हे हत्याकांड दरोड्यादरम्यान झाले होते. कुंभारकरचे हत्याकांड उघडकीस आल्यानंतर त्याच्याच जातीतील एकाने मुलीला मारू की आत्महत्या करू, अशी फिर्याद पोलिसांसमोर मांडली. जातपंचायतीच्या दाहकतेचा हा प्रकार ‘मटा’ने समोर आणल्यानंतर राज्य सरकार खडबडून जागे झाले. जातपंचायतीला मूठमाती देण्याचा निर्णय सर्वच प्रमुख जातपंचायतींनी घेतला असून, कोर्टाच्या या निकालाने या प्रकाराला चाप बसण्यास मदत होईल, अशी अपेक्षा व्यक्त होत आहे.
अशी झाली होती हत्या
प्रमिला कुंभारकर (वय १८) हिने बुलडाण्यातील दीपक कांबळे याच्याशी प्रेमविवाह केला होता. ती महात्मानगर परिसरातील एका बिल्डिंग साइटवर आपल्या पतीसोबत राहत होती. या विवाहास कुंभारकरचा विरोध होता. मुलीने आंतरजातीय लग्न केल्याने कुंभारकर संतप्त झाले होते. त्यातच प्रमिलाला दिवस गेल्याने कुंभारकरच्या संतापात आणखी भर पडली. हा विषय कायमचा संपवायचा म्हणून त्याने २८ जून २०१३ रोजी मनाशी खूणगाठ बांधत पहाटे त्याच्या घराजवळ राहणारा प्रमोद आहेर या रिक्षाचालकास सोबत घेतले. नातेवाइकाची तब्येत बरोबर नसल्याने मुलीला घेऊन यायचे, असा बनाव त्याने रचला. रिक्षा घेऊन तो प्रमिलाकडे गेला. ‘तुझी आई सीरिअस असून, तू लवकर चल’ असा निरोप कुंभारकरने दिल्याने प्रमिला त्याच्यासोबत निघाली. वडिलांवर विश्वास असल्याने तिने पतीला बरोबर घेतले नाही. मात्र, काळ बनून आलेल्या बापाच्या मनात वेगळाच विचार घोंगावत होता. कुंभारकरने रिक्षा गंगापूररोडवरील सावरकर हॉस्पिटलजवळ नेण्यास सांगितले. तेथे पोहोचल्यानंतर रिक्षाचालक आहेर याला ‘हॉस्पिटलमध्ये प्रमिलाचे मामा असून, त्यांना घेऊन ये’ असे सांगितले. त्यानुसार आहेर हॉस्पिटलमध्ये घुसताच कुंभारकरने आपल्याकडील नॉयलॉन दोरी काढून प्रमिलाचा गळा आवळण्यास सुरुवात केली. नववा महिना सुरू असलेल्या प्रमिलाचा प्रतिकार निष्प्रभ ठरला. हा प्रकार सुरू असताना रिक्षाचालक आहेर परत आला. त्यांनी कुंभारकरला विरोध केला. मात्र, त्याचा काही उपयोग झाला नाही.
अतिशय महत्त्वपूर्ण असा निर्णय समोर आला. सर्व साक्षीदारांनी भक्कमपणे बाजू मांडली. पोलिसांनी केलेल्या तपासानुसार, तसेच कोर्टात सादर करण्यात आलेल्या पुराव्याआधारे कोर्टाने दुर्मिळातील दुर्मीळ घटना असे स्पष्ट करीत आरोपीस फाशीची शिक्षा सुनावली.
- पौर्णिमा नाईक, सरकारी वकील
दुर्मिळ असा निर्णय कोर्टाने दिला असून, याचा चांगला परिणाम दिसून येईल. फाशीची शिक्षा देताना शक्यतो देशविघातक कृत्यांकडे पाहिले जाते. ऑनर किलिंग हा प्रकार तितकाच घृणास्पद होता, हे कोर्टाच्या निकालावरून स्पष्ट होते. पोलिसांनी अत्यंत बारकाईने तपास केला.
- डॉ. सीताराम कोल्हे, वरिष्ठ पोलिस निरीक्षक
या प्रकरणात सुरुवातीपासून प्रसारमाध्यमांनी चांगले काम केले. यामुळे एक सामाजिक दबाव निर्माण झाला होता. त्यातूनच पुढे जातपंचायत मूठमाती अभियान सुरू झाले. हजारो पीडितांना न्याय मिळाला. कोर्टाने सुनावलेल्या शिक्षेमुळे प्रमिलाला न्याय मिळाल्याची भावना असून, ही लढाई पुढे सुरूच राहील.
- कृष्णा चांदगुडे, राज्य कार्यवाह, जातपंचायत मूठमाती अभियान
मोबाइल अॅप डाउनलोड करा आणि राहा अपडेट
