नाशिक जिल्हा सरकारी व परिषद कर्मचारी सहकारी बँकेच्या पंचवार्षिक निवडणुकीसाठी मराठा हायस्कूल येथे रविवारी शांततेत मतदान झाले. या निवडणुकीची मतमोजणी सोमवारी फेम थिएटरच्या मागे असलेल्या सहस्त्रार्जुन मंगल कार्यालयात होणार आहे. १४ हजार ६० सभासद असलेल्या या बँकेच्या निवडणुकीत सत्ताधारी समता पॅनल व विरोधी गटाच्या सहकार पॅनलमध्ये चुरशीची लढत झाली. मतदानाननंतर दोन्ही पॅनलने विजयाचा दावा केला आहे.
नाशिक जिल्ह्यातील पोलिस व शिक्षक सोडून इतर सर्वच खात्यांतील वर्ग १ ते ४ या सर्वच स्तरातील कर्मचारी या बँकेचे सभासद असल्यामुळे या निवडणुकीला महत्त्व प्राप्त झाले होते. गेल्या काही दिवसांपासून या दोन्ही पॅनलच्या उमेदवारांनी सर्व सरकारी कार्यालयांत जोरदार प्रचार करुन रंगत वाढवली होती. या निवडणुकीत सत्ताधारी समता पॅनलचे विद्यमान संचालक सहकार पॅनलकडे गेल्यामुळे मतदारांचाही गोंधळ उडाला. सकाळी ८ वाजेपासून सायंकाळी ५ वाजेपर्यंत मतदान झाले. त्यासाठी २८ बूथ व १६० कर्मचारी तैनात होते. निवडणूक निर्णय अधिकारी म्हणून अभिजीत देशपांडे व सहाय्यक अधिकारी म्हणून आर. आर. मोरे यांनी काम बघितले.
‘महेश’साठी ३७ टक्के मतदान
आडगाव ः दोन दशकांपासून सहकार क्षेत्रात परिचित असणाऱ्या महेश बँकेच्या स्थापनेनंतर पहिल्यांदाच मतदान झाले असून, ६४५८ मतदारांपैकी २४२७ मतदारांनी मतदानाचा हक्क बजावला. महेश्वरी बालाजी मंदिर ट्रस्ट येथे सोमवारी सकाळी ८ वाजता मतमोजणीस सुरुवात होणार आहे. दुपारी बारा वाजेपर्यंत संपूर्ण चित्र स्पष्ट होईल.
या निवडणुकीत १५ जागांपैकी ४ जागा बिनविरोध झाल्या असून, उर्वरित १० जागांसाठी ११ उमेद्वार रिंगणात आहेत. एन. टी. प्रवर्गाची एक जागा रिक्त आहे. नाशिक, नाशिकरोड, सिन्नर आणि मालेगाव या ठिकाणी मतदार केंद्रांची व्यवस्था करण्यात आली होती. सकाळच्या सुमारास मतदारांची गर्दी पहायला मिळाली. पण त्यानंतर मात्र वेग मंदावला. एकूण निवडणूक प्रक्रियेसाठी ७ केंद्रांवर ७० कर्मचाऱ्यांची नेमणूक करण्यात आली होती. सर्व मतदान केंद्रांवर शांततेत मतदान पार पडल्याची माहिती निवडणूक निर्णय अजय गुजराथी यांनी दिली. सहाय्यक निवडणूक निर्णय अधिकारी म्हणून पी. आर. शिंदे यांनी कामकाज बघितले. सोमवारी सकाळी ८ वाजता श्री महेश्वरी बालाजी मंदिर ट्रस्ट, अभोणकर लेन, रविवार पेठ, येथे मतमोजणी होणार आहे.
मोबाइल अॅप डाउनलोड करा आणि राहा अपडेट
