म. टा. वृत्तसेवा, धुळे
गेल्या आठवड्यात रविवारी (दि. ४) नंदुरबार शहरात बिर्याणी विक्रीच्या हातगाडीवर दोन गटांत वाद झाला होता. यात तीनजण जखमी होऊन एका जखमीचा शनिवारी (दि. १०) सकाळी मृत्यू झाल्याने दोन दंगलखोरांनी काही दुकानांची तोडफोड करून नुकसान केले. हाच प्रकार जमावाकडून शहरभर सुरू झाला. परिस्थिती नियंत्रणात आणण्यासाठी पोलिसांनी शहरात बंदोबस्त तैनात केला मात्र पोलिसांवरदेखील दगडफेक करण्यात आली. त्यामुळे तात्काळ जिल्हा प्रशासनाने संचारबंदीचे आदेश जारी केला. पोलिसांची कुमक कमी पडत असल्याने बाहेरील जिल्ह्यातून पोलिस बंदोबस्त मागवून परिस्थिती नियंत्रणात आणण्यात आली.
यामुळे नंदुरबार शहरात शनिवारी (दि. १०) सकाळी अचानक दोन गटात दंगल उसळली. याप्रसंगी मंगळ बाजारात तरुणांनी एकत्र येत व्यावसायिकांना दुकाने बंद करण्याचे आवाहन केले. त्यावेळी सर्वत्र धावपळ सुरू झाली आणि दुसरीकडे दुकानांचे नुकसान करण्यास सुरुवात होऊन अवघ्या काही मिनिटांतच दोन गटात दगडफेक सुरू झाली. शहरात तणाव निर्माण होऊन दोन गटात सुरू असलेला हा वाद वाऱ्यासारखा शहरभर पसरला.
पोलिसांकडून लाठीचार्ज, अश्रूधुरांच्या नळकांड्या
शहरात ठिकठिकाणी पोलिस दाखल होताच पोलिसांवरदेखील दगडफेक करण्यात आली. अखेर लाठीचार्ज, अश्रूधुरांचा मारा करीत पोलिसांनी शहरात शांतता निर्माण केली. यामुळे शहरात भीतीचे वातावरण झाले. पोलिस व जिल्हा प्रशासनाला दुपारी उशिरापर्यंत दंगलीवर नियंत्रण मिळविण्यात यश आले. दरम्यान, शनिवारी दुपारपासून शहरात संचारबंदी लावून चोख पोलिस बंदोबस्त तैनात करण्यात आला होता. घटनेची माहिती घेण्यासाठी नाशिक परिक्षेत्र विशेष पोलिस महानिरीक्षक विनयकुमार चौबे हे शहरात दाखल झाले असून, धुळे, जळगाव, नाशिक येथून अतिरिक्त पोलिसांची कुमक नंदुरबार शहरात मागविण्यात आली आहे. सर्वत्र शांतता असून, या घटनेतील दोषींवर कारवाई करण्यात येणार असल्याची माहिती पोलिस प्रशासनाने दिली आहे.
काय आहे प्रकरण?
सचिन मराठे नामक तरुणाने शब्बीर पिंजारी (रा. नंदुरबार) यांना बिर्याणी फुकट मागितली असता, त्यांनी दिली नाही. या कारणावरून दोघांमध्ये रविवारी रोजी वाद झाला होता. यावेळी सचिनने शब्बीर यांच्या अंगावर पेट्रोल टाकून त्यांना पेटवून दिले. यात शब्बीर पिंजारी गंभीर भाजले होते. त्यांना उपचारासाठी
रुग्णालयात दाखल करून उपचार
करण्यात आले. याप्रकरणी पिंजारी यांनी दिलेल्या फिर्यादीनुसार सचिन मराठे याच्यावर गुन्हा दाखल करण्यात आला होता. मात्र शनिवारी (दि. १०) सकाळी शब्बीर पिंजारी यांचा उपचारादरम्यान मृत्यू झाला. यावरून ही माहिती समजताच सकाळी शेकडोच्या जमावाने एकत्र येऊन मंगळ बाजारातील दुकाने बंद करण्याचे आवाहन करीत दगडफेकीला सुरुवात केली.
मोबाइल अॅप डाउनलोड करा आणि राहा अपडेट