गेले आठ दिवस शेतकरी संपामुळे ठप्प पडलेले बाजार समितीतील व्यवहार शुक्रवारी (दि. ९) सुरळीत सुरू झाले. मात्र, संपाविषयी अजूनही ठोस निर्णय झालेला नसल्यामुळे शेतकरी संभ्रमावस्‍थेत आहेत. संपाच्या आठ दिवसांनंतर भाजीपाल्याची प्रचंड आवक होईल, अशी शक्यता व्यक्त केली जात होती. मात्र नेहमीच्या तुलनेत केवळ पंचवीस टक्केच भाजीपाला दुपारच्या लिलावात विक्रीस आला. त्यामुळे भाजीपाल्याच्या आठ दिवसांपूर्वीच्या भावात दुप्पटीने वाढ झाली.
शेतकरी संप सुरू करण्याचे निश्चित झाल्यामुळे ३१ मे रोजी भाजीपाल्याची प्रचंड आवक झाली होती. त्यामुळे दर कमी झाले होते. त्याउलट परिस्थिती शुक्रवारी (दि. ९) बघायला मिळाली. मागणी प्रचंड असताना भाजीपाल्याची आवक कमी असल्यामुळे बाजारभाव वाढले. नाशिक बाजार समितीत रोज साधारणतः १२०० ते १५०० टन भाजीपाल्याची आवक होत असते. त्यात १००० टन फळभाज्या असतात. शुक्रवारच्या लिलावात केवळ ४०० टन फळभाज्या विक्रीस आल्या. यामुळे दरवाढ झाली. शेतकरी संप सुरूच असल्याने भाजीपाला विक्रीसाठी आणावा की नाही, याबाबत शेतकरी संभ्रमावस्‍थेत आहेत. याचा परिणाम भाजीपाल्याच्या आवकेवर झाला आहे. यामुळे दरही वाढले आहेत.
शिवार खरेदीवर व्यापाऱ्यांचा भर
शेतकरी संपाच्या काळात बाहेरील बाजारपेठेत भाजीपाला पाठविण्याची काही व्यापाऱ्यांनी तयारी ठेवली होती. यामुळे त्यांनी शिवार खरेदीवर भर दिलेला आहे. गावोगावी थेट शेतीवर जाऊन शेतमाल खरेदी करून तो बाहेरीत बाजारपेठेत पाठविला जात असल्यामुळे बाजार समितीत लिलाव सुरू होऊनही भाजीपाल्याची फारशी आवक होऊ शकली नाही.
लिलाव आजही सुरू राहणार
नाशिक बाजार समितीत शनिवारी फळभाज्यांचे लिलाव बंद असतात. मात्र गेली आठ दिवस संपामुळे बंद असल्यामुळे आज (दि. १०) भाजीपाल्याचे लिलाव सुरू ठेवण्याचा निर्णय व्यापारी आणि आडतदार यांनी घेतला असल्यामुळे शनिवारी लिलाव सुरू राहणार आहेत. यामुळे आज आवक वाढण्याची शक्यता असून, दर आवाक्यात येऊ शकतात.
मोबाइल अॅप डाउनलोड करा आणि राहा अपडेट
