म. टा. वृत्तसेवा, पंचवटी
वाल्मिकनगर येथे अवैधरित्या जुगार खेळणाऱ्या २३ जणांना पोलिसांनी छापा टाकून ताब्यात घेतले. गुरुवारी (दि. ८) रात्रीच्या साडेदहा वाजेच्या सुमारास हा छापा टाकण्यात आला. त्यात ७८ हजार रुपयांचा मुद्देमाल जप्त करण्यात आला. त्यांच्यावर गुन्हा दाखल करण्यात आले.
वाल्मिकनगर येथील क्षीरसागर कॉलनीतील एका खोलीत काही दिवासंपासून अवैधरित्या जुगार सुरू असल्याची माहिती पोलिस मुख्यालयास मिळाली होती. त्यानुसार, गुरुवारी रात्री साडेदहाच्या सुमारास पोलिस उपायुक्त लक्ष्मीकांत पाटील यांनी आपल्या सोबत सरकारी लवाजमा न घेता खासगी रिक्षाने या ठिकाणी येऊन छापा टाकला. त्यांनी सहाय्यक आयुक्त विजयकुमार चव्हाण, पंचवटी ठाण्याचे वरिष्ठ निरीक्षक (गुन्हे) आनंद वाघ यांना बोलावून घेतले. या छाप्यात पोलिसांनी सुमारे ३७ हजार रोख रकमेसह ७८ हजार रुपयांचा मुद्देमाल हस्तगत केला.
या छाप्यात बाळू पाटील, सतीश पाटील, मधुकर मोरे, बबलू थापा, मोहम्मद अन्सारी, संदीपकुमार प्रदीपसिंह, मोहन सोनवणे, दीपक पवार, राजू वाघमारे, राज बोंडे, नीलेश मलहा, राकेश पवार, उदय पाटील, गिरीश धोंगडे, दत्तात्रय मोरे, योगेश रणमाळे, दीपक पवार, किरण राजगुरू, मंहेश बैरागी या २३ जुगारींना पोलिसांनी ताब्यात घेतले. पोलिस हवालदार प्रवीण कोकाटे यांनी पंचवटी पोलिस ठाण्यात फिर्याद दाखल केली आहे.
शाळेजवळ जुगार
नाशिक : महापालिका शाळेच्या आवारात जुगार खेळणाऱ्या चौघा तरूणांना पोलिसांनी अटक केली. या प्रकरणी भद्रकाली पोलिस स्टेशनमध्ये मुंबई जुगार कायद्यान्वये गुन्हा दाखल करण्यात आला आहे.
बाळा गणपत जाधव, मोहसीन शब्बीर शेख, सिराज रफिक शेख व कलाल रफिक शेख (रा. सर्व पंचशीलनगर, गंजमाळ) अशी संशयितांची नावे आहेत. पंचशीलनगर येथील महापालिका शाळा क्रमांक सहाच्या आवारात काही तरुण जुगार खेळत असल्याची माहिती पोलिसांना बुधवारी रात्री मिळाली होती. त्यानुसार, पोलिसांनी रात्री साडेदहा वाजता शाळेच्या आवारात छापा टाकला. यावेळी संशयित जुगार खेळत होते. संशयितांकडून जुगाराचे साहित्य व ६६० रुपये हस्तगत करण्यात आले.
मोबाइल अॅप डाउनलोड करा आणि राहा अपडेट
