म. टा. खास प्रतिनिधी, नाशिक
संपूर्ण कर्जमाफीसह विविध मागण्यांसाठी पुणतांब्याहून सुरू झालेल्या शेतकरी संपाची धार तीव्र करीत आता सुकाणू समितीने निर्णायक आंदोलनाची हाक दिली आहे. भाजीपाला व दूधकोंडी करून सर्वसामान्यांना वेठीस धरण्याऐवजी सरकारी यंत्रणेला घेरण्याची रणनीती समितीने आखली आहे. सरकारने दोन दिवसांत निर्णय घ्यावा; अन्यथा राज्यभर धरणे व ठिय्या आंदोलनासह, रेल रोको, तसेच नाशिकसह मुंबई, पुणे, नागपूर, औरंगाबाद या प्रमुख शहरांची रसद टप्प्याटप्प्याने तोडण्याचा इशारा सुकाणू समितीने गुरुवारी सरकारला दिला.
शेतकरी संपाची सात दिवसांची डेडलाइन संपल्यानंतर शेतकरी आंदोलनासाठी स्थापन झालेल्या सुकाणू समितीची बैठक गुरुवारी नाशिकमध्ये झाली. बैठकीत आंदोलनाची पुढील दिशा ठरवण्यात आली आहे. सुकाणू समितीने राज्य सरकारला इशारा देतानाच आंदोलनाचे तीन टप्पे निश्चित केले आहेत. पहिल्या टप्प्यात सरकारला चर्चेसाठी दोन दिवसांचा अल्टिमेटम दिला आहे. दोन दिवसांत सरकार ताळ्यावर आले नाही, तर येत्या १२ जून रोजी राज्यभर जिल्हाधिकारी आणि तहसील कार्यालयांवर धरणे आणि ठिय्या आंदोलन, तर १३ तारखेला गनिमी काव्याने राज्यभर रेल रोको आंदोलन केले जाणार आहे. त्यानंतरही सरकार बधले नाही तर तिसऱ्या टप्प्यात आंदोलन अधिक तीव्र करून थेट मुंबई, पुणे, नागपूर, औरंगाबाद या मोठ्या शहरांची रसद तोडण्याचा निर्धार समितीने केला आहे. सोबतच सरकारमधील मंत्र्यांना कर्जमाफीपर्यंत राज्यात कुठेही सभा घेण्यास मज्जाव करण्याचे आवाहन समितीने केले आहे. त्यामुळे भाजपसह राज्य सरकारची कोंडी अधिकच वाढली आहे.
शेतकऱ्यांसोबतच्या बैठकीपूर्वी कोअर कमिटीच्या सदस्यांनी विश्रामगृहावर आंदोलनाची निश्चित दिशा ठरवून ती बैठकीत जाहीर केली. खासदार राजू शेट्टी, आमदार बच्चू कडू, जयंत पाटील, अजित नवले, रघुनाथदादा पाटील, निवृत्त न्यायमूर्ती बी. जी. कोळसे पाटील, शेतकरी नेते माधवराव खंडेराव मोरे, डॉ. गिरधर पाटील यांच्यासह राज्यभरातील शेतकरी नेते या वेळी उपस्थित होते. शेतकऱ्यांशी संबंधित राज्यातील सर्व संघटना बैठकीला उपस्थित होत्या. भाजीपाला व दूधकोंडीने सर्वसामान्य नागरिकच वेठीस धरला गेला. त्यामुळे पहिल्या टप्प्यातील शेतकरी संप सफल झाला नसल्याने कोअर कमिटीने आता या आंदोलनाची दिशा बदलली आहे. बैठकीत कर्जमाफी, स्वामिनाथन आयोगाची अंमलबजावणी, वीज, सिंचन आणि पेन्शनच्या मागण्या पूर्ण होईपर्यंत आंदोलन मागे न घेण्याचा निर्धार व्यक्त करण्यात आला आहे.
‘तिसरा टप्पा आक्रमक, हिंसक असेल’
शेतकऱ्यांच्या मागण्यांसाठी पहिल्या टप्प्यात सरकारला दोन दिवसांचा अल्टिमेटम देण्यात आला आहे. यो दोन दिवसांत सरकारने कुणाशीही चर्चा करावी; पण निर्णय घ्यावा, असे आव्हान देण्यात आले आहे. सरकारने दोन दिवसांत शेतकऱ्यांच्या मागण्या मान्य केल्या नाही तर आंदोलनाची धार तीव्र करण्याचा इशारा देण्यात आला आहे. तीन टप्प्यांतील या आंदोलनाचा तिसरा टप्पा हिंसक आणि आक्रमक असेल, अशा इशाराही समितीने दिला आहे.
नाशिकसह मुंबईची रसद तोडणार
समितीने तयार केलेल्या आंदोलनाच्या तिसऱ्या टप्प्याची घोषणाही या वेळी करण्यात आली असून, सरकारची लाडकी असलेल्या मुंबई, पुणे, नागपूर, औरंगाबाद, नाशिक या बड्या लाडक्या शहरांची रसद तोडण्याचा इशारा दिला आहे. मुंबई शहराची रसद तोडली तर सरकार ठिकाणावर येईल, अशी सूचना आमदार जयंत पाटील यांनी केली. दूध, भाजीपाला बंदीसोबतच नाशिक व रायगडमधून होणारा मुंबईचा पाणीपुरवठा तोडण्याचा थेट इशाराच या बैठकीत देण्यात आला आहे. त्यानंतर एक तर सरकार असेल; नाही सातबारा कोरा असेल, असा इशारा राजू शेट्टी यांनी दिला आहे.
मंत्र्यांना गावबंदी
सरकारी यंत्रणेला वेठीस धरण्यासोबतच सुकाणू समितीने भाजपचीही कोंडी करण्याचा निर्धार केला आहे. केंद्र आणि राज्य सरकारमधील मंत्र्यांना शेतकरी गावांमध्ये फिरू न देण्याचा इशारा दिला आहे. गावांमध्ये सभा घेण्यासाठी आलेल्या भाजपच्या नेत्यांना आणि मंत्र्यांना कर्जमाफीचा जाब विचारा, असे सांगून सभा न होऊ देण्याचा इशाराच दिला आहे. त्यामुळे सरकारसोबतच भाजपचीही कोंडी केली जाणार आहे.
आत्महत्या न होण्याची हमी घेऊ
मुख्यमंत्र्यांनी शेतकऱ्यांचा खरा आणि खोटा असा भेदाभेद चालवला आहे. त्यावरही बैठकीत टीकास्र सोडण्यात आले असून, कर्जमाफी दिली तर आत्महत्या थांबतील काय, असे सांगणाऱ्या सरकारमधील मंत्र्यांनाही सडेतोड उत्तरे देण्यात आली आहेत. शेतकरी नेते रघुनाथदादा पाटील यांनी शेतकऱ्यांच्या आत्महत्या होणार नाहीत, याची हमी आम्ही घेतो; पहिले कर्जमाफ करा, असा प्रस्ताव सरकारला दिला. संभाजी बिग्रेडने कर्जमाफीनंतर शेतकरी आत्महत्या करणार नाहीत, याचे हमीपत्र आम्ही भरून देऊ, असा दावा केला.
‘कोणाचीही मदत घेऊ’
सुकाणू समितीच्या बैठकीत राजकीय पक्षांच्या नेत्यांच्या उपस्थितीवर काही शेतकऱ्यांनी आक्षेप घेतला. काँग्रेसचे नेते भाई जगताप यांना स्टेजवर जाण्यास विरोध करण्यात आला. त्यावर समितीच्या नेत्यांनी भूमिका स्पष्ट करत, शेतकऱ्यांचा सातबारा कोरा करण्यासाठी आमच्या सोबत जो येईल त्याला आम्ही सोबत घेऊ, असे शेट्टींसह कडू यांनी सांगितले. सरकारविरोधात जो असेल तो आमच्यासोबत असेल, अशी भूमिका नेत्यांनी स्पष्ट केली.
महिलेचा गोंधळ
शेतकऱ्यांना कर्जमुक्ती आयोजित केलेल्या सुकाणू समितीच्या बैठकीत मुंबईच्या कल्पना इनामदार या महिलेने गोंधळ घालत गालबोट लावण्याचा प्रयत्न केला. माईकचा ताबा घेत, शेतकरी संप राजकारणविरहित असल्याचे सांगितले जात असताना खासदार राजू शेट्टी, आमदार बच्चू कडू व्यासपीठावर कसे, असा प्रश्न या महिलेने विचारला. त्यामुळे एकच गोंधळ उडला. पोलिस आणि कार्यकर्त्यांनी तातडीने या महिलेला घेराव घालत व्यासपीठाबाहेर नेले. भाजपच्या इशाऱ्यानेच ही महिला आल्याचा आरोप सभेतील नेत्यांनी या वेळी केला.
चर्चेचे दरवाजे उघड
राज्य सरकारला दोन दिवसांचा अल्टिमेटम दिल्यानंतर सुकाणू समितीने सरकारसाठी चर्चेचे दरवाजे उघडे ठेवले आहेत. शेतकऱ्यांच्या मागण्यांसाठी आम्ही चर्चेसाठी तयार आहोत. सरकारला वाटत असेल त्यांच्याशी चर्चा करा; पण शेतकऱ्यांचा सातबारा कोरा करा, असे आवाहन या समितीने केले आहे.
अशी सुकाणू समितीची रणनीती
पहिला टप्पा ः सरकारला निर्णयासाठी दोन दिवसांची मुदत
दुसरा टप्पा ः १२ जूनला धरणे, ठिय्या, १३ जूनला रेल रोको
तिसरा टप्पा ः मुंबई, पुणे, नागपुरातील रसदकोंडीचा इशारा
मोबाइल अॅप डाउनलोड करा आणि राहा अपडेट
