दूध, भाजीपाला, कांदे फेकले रस्त्यावर; रास्ता रोकोमुळे वाहतूक ठप्प
टीम मटा
महाराष्ट्र बंदला जिल्ह्यात चांगला प्रतिसाद मिळाला. जिल्हाभरात कडकडीत बंद पाळण्यात आल्याने व्यवहार ठप्प झाले. जिल्ह्यातील सर्व बाजार स‌मित्याही बंद होत्या. अनेक ठिकाणी रास्ता रोको करण्यात आला. तसेच, शेतकरी आंदोलकांनी काही ठिकाणी दूध, कांदा व भाजीपाला रस्त्यावर फेकून सरकारचा निषेध केला. अनेक ठिकाणी मुख्यमंत्र्यांच्या प्रतीकात्मक पुतळ्याचे दहन करण्यात आले. पोलिसांनी काही आंदोलकांनाही ताब्यात घेतले. मागण्या मागे होईपर्यंत संप सुरू ठेवण्याचा निर्धार यावेळी करण्यात आला.
निफाडमध्ये रास्ता रोको
निफाड : शेतकरी संपाच्या पार्श्वभूमीवर पुकारलेल्या महाराष्ट्र बंदला निफाड तालुक्यातील प्रमुख शहरांसह अनेक गावांमध्ये चांगला प्रतिसाद मिळाला. तालुक्यात काही ठिकाणी हिंसक आंदोलन करणाऱ्यांना पोलिसांनी ताब्यात घेतले आहे. निफाड येथील शांतीनगर चौफुली येथे नाशिक-औरंगाबाद महामार्ग सकाळी ११ वाजेदरम्यान रोखून धरण्यात आला. म्हाळसाकोरे येथे शेतकरी आंदोलकांनी सत्ताधारी भाजप-सेना युतीची प्रेतयात्रा काढून अमरधाममध्ये मुख्यमंत्र्यांच्या पुतळ्याचे दहन केले. वनसगाव येथे रास्ता रोको करीत रस्त्यावर भजन करण्यात आले. भेंडाळी, चांदोरी चौफुली या ठिकाणी रास्ता रोको करण्यात आला. दिंडोरी तास व नांदूरमध्यमेश्वर या गावातील शेतकऱ्यांनी रास्ता रोको केला. नांदूरमध्यमेश्वर येथे मालट्रकमध्ये आडवी लावून रस्ता बंद केला. खाणगाव येथे हिंसक आंदोलनाचा प्रयत्न करणाऱ्या सहा आंदोलकांना पोलिसांनी ताब्यात घेतले आहे.
पिंपळगाव बसवंत शहरातील व्यवहार दिवसभर बंद ठेवण्यात आले होते. पालखेड व कोकणगाव येथे भाजीपाला रस्त्यावर टाकून शासनाचा निषेध करण्यात आला. शिरवाडे वणी येथे निषेध सभा घेत असताना पोलिसांनी सदरची सभा उधळून लावल्याने शेतकरी संतप्त झाले. शिरवाडे फाट्यावर वडनेर भैरव येथून शेकडो शेतकऱ्यांनी महामार्गावर टायर जाळण्याचा प्रयत्न केला. पोलिसांनी लाठीमार करून आंदोलकांना पांगवले.
लासलगावात व्यवहार ठप्प
लासलगाव आणि पिंपळगाव बाजार समिती बंद असल्याने जवळपास चाळीस कोटींची उलाढाल ठप्प झाली आहे. गुरुवारपासून शेतकऱ्यांनी संप केल्याने कांद्याचे लिलाव बंद आहेत. तसेच, धान्य बाजारही बंद आहे.
देवळ्यात उत्स्फूर्त प्रतिसाद
देवळा : महाराष्ट्र बंदला देवळा तालुक्यातून उत्स्फूर्त प्रतिसाद मिळाला. कोणताही अनुचित प्रकार न घडता बंद अत्यंत शांततेत पार पडला. बंदमधून अत्यावश्यक सेवा वगळण्यात आल्याने मेडिकल, खासगी वैद्यकीय दवाखाने, पतसंस्था, बँका वगळता सर्वांनी कडकडीत बंद पाळला. लोहोणेर, उमराणे, दहीवड, मेशी, वाजगाव, गुंजाळनगर, महाल पाटणे, पिंपळगाव, खर्डे, वाखारी आदींसह सर्वच गावांमध्ये कडकडीत बंद पाळण्यात आला. वाजगाव येथील ग्रामस्थांनी देवळा येथे येऊन राज्य शासनाची प्रतीकात्मक अंत्ययात्रा काढली. यावेळी पोलिसांनी हसक्षेप करून सर्व साहित्य जमा करून घेतले. उमराणे येथील शेतकऱ्यांनी गाव बंद करून छत्रपती संभाजीराजे चौकात कांदे, दूध, भाजीपाला रस्त्यावर टाकून महाराष्ट्र सरकारचा निषेध केला. सर्व शेतकरी बांधवांच्या वतीने किसान सभा घेण्यात आली.
इगतपुरी, घोटीत शुकशुकाट
घोटी : शेतकऱ्यांनी पुकारलेल्या महाराष्ट्र बंदला इगतपुरी तालुका व घोटी परिसरात चांगला प्रतिसाद मिळाला. अनेक दुकानदार व राजकीय पक्षांनी या संपला पाठिंबा दिला. घोटीसारख्या महत्त्वाच्या बाजारपेठेत सकाळपासूनच व्यवहार ठप्प राहिल्याने आर्थिक फटका बसला, तर बाजार समिती आवारात शुकशुकाट जाणवला. महाराष्ट्र बंदमुळे घोटीत आवक नसल्याने भाजीपाला मुंबईला जाऊ शकला नाही. इगतपुरी, घोटी परिसरात शेतकऱ्यांबरोबरच काँग्रेस, राष्ट्रवादी, शिवसेनेने संपात उडी घेतली. घोटी बाजार समिती गेटवर संपात सहभागी राजकीय पक्ष व शेतकऱ्यांनी घोषणा देत तहसीलदार अनिल पुरे यांना निवेदन दिले. इगतपुरी तालुक्यातील दळणवळणाचा महत्त्वाचा मार्ग असल्याने कुठलाही अनुचित प्रकार घडू नये, यासाठी खुद्द जिल्हाधिकारी व जिल्हापोलिस प्रमुख यांनी घोटी परिसरात दिवसभर देखरेख ठेवली.
कळवणमध्ये निषेध सभा
कळवण : महाराष्ट्र बंदला कळवण येथील व्यापारी बांधवांचा उत्स्फूर्त प्रतिसाद मिळून शंभर टक्के बंद पाळण्यात आला. मेनरोड येथे निषेध सभेचे आयोजन करण्यात आले होते. नाकोडे, साकोरे गावाच्या शेतकऱ्यांनी मुख्यमंत्री व कृषिमंत्र्यांच्या प्रतीकात्मक पुतळ्याचे दहन केले. ठिय्या आंदोलन करणाऱ्या शेकडो जणांना अटक करून नंतर सोडून देण्यात आले.
मालेगावात सरकारचा निषेध
मालेगाव : महाराष्ट्र बंदला मालेगाव शहरात संमिश्र प्रतिसाद मिळाला, तर ग्रामीण भागात मात्र कडकडीत बंद पाळण्यात आला. सोयगाव, सटाणा नाका, कॅम्प, संगमेश्वर भागात व्यापाऱ्यांनी दुकाने बंद ठेवून पाठिंबा दर्शवला. ग्रामीण भागात गावागावात शेतकरी, व्यापारी, दुकानदार यांनी कडकडीत बंद पाळला. तालुक्यातील पिंपळगाव (दा.) झोडगे, करंजगव्हाण, अजंग, वडेल, कळवाडी, रावळगाव, दाभाडी, सौंदाणे, टेहरे, निमगाव आदी प्रमुख गावांसह सर्वच ठिकाणी व्यवहार बंद होते. पिंपळगाव (दा.) येथे सरकारची प्रतीकात्मक प्रेतयात्रा काढून निषेध करण्यात आला. येसगाव, रावळगाव, वडेल, निमगाव येथील आठवडे बाजारदेखील बंद होते.
सटाण्यात सुरळीत व्यवहार
सटाणा : महाराष्ट्र बंदचा सटाणा शहरात कोणताही परिणाम जाणवून आला नाही. मात्र तालुक्यातील ग्रामीण भागात सर्वत्र कडकडीत बंद पाळण्यात आला. शहरातील दैनंदिन भाजीमंडई मात्र ग्राहकांनी गजबजली होती. दरम्यान, सटाणा शहर वगळता महाराष्ट्र बंदमध्ये ताहाराबाद, लखमापूर, ब्राह्मणगाव आदी गावे सहभागी झाली होती. नामपूर येथे शहर बंद ठेवून निषेध करण्यात आला.
चांदवडमध्ये शेतकऱ्यांचे रिंगण
मनमाड : महाराष्ट्र बंदच्या आवाहनाला प्रतिसाद देत नांदगाव व चांदवड तालुक्यात सोमवारी ठिकठिकाणी रास्ता रोको करण्यात आला. संपूर्ण कर्जमाफी द्यावी, सातबारा कोरा करावा या मागण्यांसाठी चांदवड येथे शेतकऱ्यांनी तीव्र आंदोलन करीत मुंबई-आग्रा महामार्ग रोखून धरला. चांदवडनजीक दुगाव, वडाळी भोई, राहुड यासह नांदगाव शहर या ठिकाणी सोमवारी शेतकऱ्यांनी रास्ता रोको आंदोलन केले. न्यायडोंगरी येथे मुख्यमंत्री देवेंद्र फडणवीस यांची प्रतीकात्मक अंत्ययात्रा काढण्यात आली.
मनमाड, नांदगाव शहरात बंदला संमिश्र प्रतिसाद मिळून आला. नांदगाव व चांदवडमध्ये काँग्रेस, राष्ट्रवादी, शिवसेना व रिपाइंने शेतकरी संघटनांना पाठिंबा दिल्याने आंदोलनाची धार अधिकच वाढल्याचे चित्र होते. चांदवड येथे किसान सभेच्या कार्यकर्त्यांसह शेतकऱ्यांनी सकाळी मुंबई-आग्रा महामार्गावर रास्ता रोको केले. यामुळे वाहतूक बराच काळ ठप्प झाली. याशिवाय याच मार्गावर वडाळी भोई येथेही रास्ता रोको करण्यात आला. चांदवडनजीक राहुड व दुगाव येथेही संतप्त शेतकऱ्यांनी रस्त्यावर उतरून संतापाला वाट करून दिली. यामुळे वाहतूक ठप्प झाली होती.
दुगाव येथे शेतकऱ्यांनी रस्त्यावर कांदे फेकून व दूध ओतून सरकारविरोधी संताप व्यक्त केला. मनमाड, नांदगाव, चांदवड येथे बाजार समित्यांच्या परिसरात शुकशुकाट होता. चांदवड येथील रास्ता रोकोमध्ये शेतकऱ्यांचे वेगळेपण पाहायला मिळाले. रस्त्यावर गोल रिंगण करून व टाळ मृदूंगासह भजने म्हणत शेतकऱ्यांनी आंदोलनात सहभाग घेतला.
येवल्यात चक्का जाम अन् रॅली
येवला : येवला शहरासह तालुक्याच्या ग्रामीण भागातील जवळपास सर्वच ठिकाणी कडकडीत बंद पाळत अनेक ठिकाणी शेतकरी रस्त्यावर उतरले होते. सायगाव येथे शेतकऱ्यांनी रस्त्यावर कांदा फेकत कवडीमोल बाजारभावाने विकल्या जाणाऱ्या उन्हाळ कांद्याकडे शासनाचे लक्ष वेधण्याचा प्रयत्न केला. धामणगाव येथे शेतकऱ्यांनी आपल्याकडील दूध, कांदे, वांगे रस्त्यावर फेकल्याने तालुक्यातील शेतकरी आंदोलनाची धार तीव्र असल्याचे दिसून आले. नगरसूल, पाटोदा, मुखेड, अंदरसूल या मोठ्या गावांसह जवळपास सर्वच गावात कडकडीत बंद पाळला गेला. शिवसेना, काँग्रेस, राष्ट्रवादी काँग्रेस, शेतकरी संघटनांच्या कार्यकर्त्यांसह जमलेल्या शेतकऱ्यांनी येवला शहरातून काढलेली ‘रॅली’ लक्ष वेधून गेली.
धामणगाव येथील येवला-भारम रस्त्यावर शेतकऱ्यांनी दूध रस्त्यावर ओततानाच कांदे, वांगे फेकत निदर्शने केली. नगरसूल येथे मुख्यमंत्र्यांच्या प्रतीकात्मक पुतळ्याची अंत्ययात्रा काढून शासनाचा निषेध व्यक्त केला. सावरगाव, विसापूर पाटी, कासारखेडे पाटी या ठिकाणी शेतकरी रस्त्यावर उतरले होते. चक्काजाम आंदोलनात शेकडो शेतकऱ्यांनी महामार्गावर ठाण मांडल्याने वाहतूक ठप्प झाली होती. आज येवल्यात पुन्हा धरणे आंदोलन करण्यात येणार आहे.
शेतकरी महिलाही रस्त्यावर
येवला तालुक्यातील पिंपळगाव जलाल, उंदीरवाडी, आडगाव चोथवा येथील शेकडो शेतकरी महिलांनी सोमवारी येवला तहसीलकडे मोर्चा वळवत तहसीलदारांना निवेदन दिले. त्यांनी आंदोलकांवरील गुन्हे तत्काळ मागे घेऊन निर्दोष मुक्तता करण्याची मागणी केली.
मोबाइल अॅप डाउनलोड करा आणि राहा अपडेट
