Prashant.bharvirkar@timesgroup.com
Tweet : bharvirkarPMT
‘त्याला’ नाटक आणि चित्रपटांचे भलतेच वेड. कोणतेही नाटक किंवा चित्रपट असो ‘तो’ पहायला जाणार व त्यातूनच त्याच्या आत एका रोपट्याने अंकुर धरला. आपल्यालाही गाणे तयार करायचे. परंतु जगरहाटीत त्याला कळले हे किती अवघड असते मात्र दुर्दम्य इच्छाशक्ती आणि महत्त्वाकांक्षा यांच्या बळावर त्याने गाणे तयार करून दाखवले. आज हे गाणे यू-ट्युबवर झळकत असून, त्याला चांगल्या लाइक्सही मिळत आहेत.
ही कहाणी आहे, नाशिकच्या नयन कल्पना अभय जाधवची. नयन मविप्र संस्थेच्या केटीएचएम कॉलेजला द्वितीय वर्ष वाणिज्य शाखेत शिकतो. त्याने सुरुवातीला लेख लिहिले, लावण्या लिहिल्या गाणीही लिहिली परंतु, या त्यातील ‘एका दिलाची कहाणी’ हे गाणे त्याला खूपच भावले. ते पडद्यावर आले पाहिजे, अशी इच्छा त्याच्या मनात जागृत झाली आणि मग सुरू झाला संघर्ष.
जगरहाटीमध्ये एखादे गाणे पडद्यावर येणे म्हणजे किती अवघड असते हे त्याला कळून चुकले मात्र त्याने हार मानली नाही. त्याला नाशकातील पहिला ऑफबिट साँग अल्बम तयार करायचाच होता. नयन नाशकातील अनेक दिग्गजांना भेटला, अनेकांचे सल्ले घेतले आणि एक दिवस त्याला आर्थिक मदत करणारा हात सापडला. नाशिक वेध व संवेद या टीम नयनच्या मदतीला धावून आली आणि त्याचे गाणे रेकॉर्डिंग झाले. रितेश मोरे यांनी त्याला मार्गदर्शन केले. हळूहळू कामाने वेग घेतला, नाशिकच्या आनंद ओक, अभिषेक दांडेकर यांच्या डी. जी. बिट्स या म्युझिक स्टुडिओत अवघ्या दोनच दिवसात गाण्याचे रेकॉर्डिंग झाले. हे त्रिवेणी संगम असलेले गीत प्रांजली बिरारी-नेवासकर हिने गायले. गीताचे संपूर्ण चित्रीकरण नाशिकमध्येच पार पडले.
हे गाणे साडे सात मिनिटांचे असून हेमंत ठोके आणि प्रीती देवरे या नवीन चेहऱ्यांवर चित्रित झालेले आहे. प्रसाद आंबेकर, आकाश ठाकूर, वैभव पाटील, अनुजा वाणी यांनी छायाचित्रिकरण केले असून, प्रथमेष गायधनी याने संपूर्ण गीताच्या चित्रीकरणाच्या आठवणी कॅमेराबद्ध केल्या आहेत. शुभम घमंडी याने गीतासाठी डबिंग केले.
नवपदार्पण गीतासाठी ५ नामांकने
या गीताचे ६ राष्ट्रीय आणि १ आंतरराष्ट्रीय फिल्म फेस्टिव्हलला रजिस्ट्रेशन केले असताना या गीताला नाशिकमध्ये झालेल्या फेस्टिवलमध्ये उत्कृष्ट नवपदार्पण गीतासाठी पुरस्कारही मिळाला. मुंबईच्या फेस्टिवलमध्ये या गीताला नवपदार्पण गीतासाठी ५ नामांकने मिळाली. नयनला या कामी मानसोपचार तज्ज्ञ डॉ. जयंत ढाके, डॉ. सरिता पगार, पुष्पाताई जोशी, सचिन मराठे, किशोर दलाल, डॉ. अमोल कुलकर्णी, गायधनी, प्रा. योगेश जोशी यांनी मोलाची मदत केली.
एका दिलाची कहाणी
एका दिलाची कहाणी हे गीत कॉलेजियन जीवनातील प्रेमाच्या सद्यस्थितीवर भाष्य करणारे आहे. आजकालच्या मुलांना नात्याच्या गंभीरतेचा विचारच नाही. असंख्य वेळा नात्यात फूट पडूनही त्यांच्यात सुधारणा होत नाही. ज्यांनी इतिहासात आपल्या रक्ताने प्रेमाच्या नात्याला अजरामर केले त्याच सर्वांना आज ही मुल शरमेने माना खाली घालायला लावताय. याच विषयाला हात घालत त्याने गद्य न् पद्य या दोन सुरेख भावनांचा मेळ घालत हे गीत लिहिलंय. गाण्यात काही ठिकाणी स्वगतही आहे. हे संपूर्ण गीत म्हणजे गद्य, पद्य न् स्वगत यांचा त्रिवेणी संगमच आहे.
कोट००
अनेक अडचणींचा सामना करत आज हा दिवस पहायला मिळाल्याने खूप आनंद होतोय. मी तयार केलेल्या या छोट्याशा गीताच्या निर्मितीला वाव मिळावा एवढीच इच्छा आहे. माझ्यातील या कलेला एक व्यासपीठ मिळावे म्हणून ही निर्मिती आहे.
-नयन जाधव, दिग्दर्शक
मोबाइल अॅप डाउनलोड करा आणि राहा अपडेट
