म. टा. वृत्तसेवा, पंचवटी
पाथरवट लेनमध्ये रात्रीच्या सुमारास वाल्मिकनगर येथील गुंडांनी धारधार हत्यारे घेऊन दहशत माजविण्याच्या घटनेला चोवीस तास उलटत नाहीत तोच, म्हसरुळ-मखमलाबाद लिंक रोडवरील चाणक्यपुरी येथे तीस-चाळीस जणांच्या टोळक्याकडून दहशत माजविण्याचा प्रकार मंगळवारी रात्री बाराच्या सुमारास घडला. याप्रकरणी पोलिसांनी तीन संशयितांना अटक केली असून, चौथा फरार संशयित प्रवीण काकड हा आयुक्तालयात कार्यरत पोलिसाचा मुलगा आहे.
याबाबत सविस्तर वृत्त असे की, म्हसरुळ परिसरातील चाणक्यपुरी येथे रात्रीच्या सुमारास दुचाकीवरून काही तरुण आले. त्यांच्या हातात कोयता होता. त्यांनी चाणक्यपुरीच्या गेटवर मोठमोठ्याने आवाज करीत, शिवीगाळ करीत परिसरात दहशत पसरविण्याचा प्रयत्न केला. त्यांच्या आपसात मारामाऱ्या व भांडणांमुळे परिसरात घबराट पसरली होती. दरम्यान, हा गोंधळ सुरू असतानाच गस्त पथकाचे वाहन तेथून जात होते. हे वाहन पाहताच त्यातील काहींनी पळ काढला. काही तरुणांनी समोर असलेल्या कृष्‍णस्तुती अपार्टमेंटसमोर पार्क केलेल्या एका कारवर भलामोठा दगड टाकून मागची काच फोडली. पोलिसांना पाहताच संशयिताने अंधारात धूम ठोकली.
यावेळी नागरिकांनी पोलिसांना कळविल्यानंतर आणखी तीन पोलिस गाड्या घटनास्थळी दाखल झाल्या. पोलिसांनी संशयितांना ताब्यात घेण्याचा प्रयत्न केला. मात्र, अंधाराचा फायदा घेत काहींनी पोलिसांच्या हातातून निसटून पळ काढला. पोलिसांनी सिनेस्टाइल पाठलाग करून काहींना पकडले. त्यातील शांतीदूत लोखंडे (वय २०, रा. एसटी वर्कशॉप, पेठ रोड), पुष्पक कैलास शिंगाडे (वय २२, रा. शिवदर्शन अपार्टमेंट, आरटीओ वजनकाट्यामागे, पेठरोड), अक्षय प्रकाश वाघ (वय २०, रा. साईसिध्दी अपार्टमेंट, एसटी वर्कशॉपजवळ, पेठरोड) या तिघा संशयितांना पोलिसांनी ताब्यात घेतले. त्यातील प्रवीण काकड (रा. आर्यकृष्ण अपार्टमेंट, शिवाजीनगर, म्हसरुळ) हा संशयित फरार झाल्याचे पोलिसांनी सांगितले.
दहशत पसरविण्याचा प्रयत्न करणाऱ्या या तरुणांच्या विरोधात म्हसरुळ पोलिस ठाण्यात गुन्हा दाखल करण्यात आला आहे. फरार असलेला संशयित हा पोलिसाचा मुलगा असून सदर पोलिस आयुक्तालयात कार्यरत आहे.
पंचवटी परिसरात सलग दोन दिवस अशा प्रकारच्या दहशत निर्माण करणाऱ्या घटना घडल्या आहेत. या घटनांमुळे पंचवटीकरांच्या मनात भीतीचे वातावरण पसरले आहे. विविध भागात वारंवार घडणाऱ्या अशा प्रकारांची नागरिकांनी धास्ती घेतली आहे. पंचवटी परिसरातील वाढती गुन्हेगारी पोलिसांपुढे आव्हान ठरू लागली आहे.
पोलिसपुत्र फरार कसा?
संशयित प्रवीण काकड यास पोलिसांनी सर्वप्रथम पकडून व्हॅनमध्ये बसविले होते. त्याने पोलिसांशी अरेरावी केल्याने यावेळी त्याला गाडीतच पोलिसांनी जोरदार चोप दिल्याचे प्रत्यक्षदर्शींनी सांगितले. आपण पोलिसाचा मुलगा असल्याचे तो वारंवार सांगत होता. तथापि, त्याला न जुमानता पोलिसांनी त्याची गठडी वळली. असे असताना गाडीत बसवून नेल्यानंतर हा संशयित फरार कसा झाला, असा प्रश्न उपस्थित केला जात आहे.
वाल्मिकनगरात सापडली हत्यारे
म. टा. वृत्तसेवा, पंचवटी
पाथरवट लेन येथे वाल्मिकनगरमधील टोळक्याने धुमाकूळ घातल्याच्या घटनेनंतर संशयितांना ताब्यात घेत पोलिसांनी बुधवारी पुन्हा झडती घेतली. यात आठ ते दहा घातक हत्यारे सापडली. धुमाकूळ घालताना या हत्यारांचा सं‌शयितांनी वापर केला होता.
वाल्मिकनगर येथील या टोळक्याने जुन्या भांडणाची कुरापत काढून लाठ्या काठ्या, तलवार, कोयते, चोपर आदींचा वापर करून दहशत माजविण्याचा सोमवारी (दि. १५) रात्री प्रयत्न केला. या प्रकरणी पोलिसांनी मंगळवारी (दि. १६) सहा संशयितांना ताब्यात घेत त्यांची चौकशी केली असता त्यांनी वापरलेली हत्यारे कुठे लपवून ठेवली त्याची माहिती दिली. पोलिसांनी बुधवारीही वाल्मीकनगर परिसराची झाडाझडती घेतली. कुष्ठरोग्यांच्या दवाखान्याच्या पत्र्याच्या शेडवर ही हत्यारे लपविण्यात आली होती. यात तलवार, कोयते, चोपर, चाकू आदींचा सामवेश होता. याच हत्यारांचा वापर करीत टोळक्याने दहशत माजविली होती. पोलिस उपायुक्त लक्ष्मीकांत पाटील, सहाय्यक आयुक्त विजयकुमार चव्हाण, पंचवटी पोलिस ठाण्याचे गुन्हे शाखेचे वरिष्ठ निरीक्षक आनंद वाघ, आडगांव पोलिस ठाण्याचे निरीक्षक सुनीलकुमार पुजारी यांच्यासह पोलिस कर्मचाऱ्यांनी वाल्मिकनगरची झाडाझडती घेतली.
पोलिस ‘झगड्या’च्या मागावर
दोन गटांतील आपापसातील वादाची सामान्य नागरिकांना झळ पोहचली. या घटनेस जबाबदार असणाऱ्या रेकॉर्डवरील गुन्हेगार दीपक लाटे उर्फ झगड्या याच्या शोधार्थ खास पोलिस पथक तयार करण्यात आले आहे. पोलिस झगड्याचा कसून शोध घेत आहेत. मंगळवारी (दि.१६) रात्रीच्या सुमारास झगड्या गोदाघाटावर असल्याची गुप्त माहिती पोलिसांना मिळाली. पोलिस आल्याची चाहूल लागताच झगड्याने तेथून पळ काढला. पोलिसांनी पाठलाग केला; परंतु झगड्या पसार होण्यात यशस्वी झाला.
भाजप नगरसेवकास नोटीस
या प्रकरणी भाजपच्या एका नगरसेवकाने घटनेतील संशयितांना मदत केल्याचे पाथरवट लेनमधील पीडित नागरिकांनी पोलिसांना सांगितले. त्यावरून पोलिसांनी ‘त्या’ लोकप्रतिनिधीची चौकशी केल्याचे सूत्रांनी सांगितले. संशयितांना मदत करणे आणि त्यांना लपविण्यास सहकार्य करणे, अशा आशयाची नोटीस दिल्याचे पोलिस उपायुक्त लक्ष्मीकांत पाटील यांनी सांगितले. पोलिसांनी हे प्रकरण गांभीर्याने घेतले आहे. वेळप्रसंगी या प्रकरणातील दोन्ही गटातील मुख्य संशयितांवर ‘मोक्का’न्वये कारवाईचे संकेत पोलिसांनी दिले आहेत.
दोन गटांतील हाणामारीत सात जखमी
म. टा. वृत्तसेवा, सिन्नर फाटा
विवाहसोहळा उरकल्यानंतर सार्वजनिक ठिकाणी पडलेला कचरा व मद्याच्या बाटल्यांविषयी सोसायटी चेअरमनकडे तक्रार केल्याच्या रागातून जेलरोडवरील पवारवाडीतील भारतभूषणनगर येथे दोन गटांतील हाणामारीत सातजण जखमी झाल्याची घटना बुधवारी दुपारी घडली.
दोन्ही गटांतील प्रक्षुब्ध जमावाने एकमेकांवर दगडफेक केल्याने काही घरांचे नुकसान झाले, तर काहींची डोकी फुटली. या घटनेमुळे भारतभूषणनगरात काही काळ तणावाचे वातावरण निर्माण झाले होते. यातील काही युवकांकडे तलवारीसारखी घातक शस्त्रेही असल्याचे फिर्यादी मंगल वाघचौरे यांनी सांगितले. .
पवारवाडीतील भारतभूषण नगरातील समाजमंदिरात परवा एक विवाहसमारंभ झाला होता. हा विवाहसमारंभ आटोपल्यानंतर या ठिकाणी मोठ्या प्रमाणात कचरा व मद्याच्या बाटल्या पडून होत्या. या कचऱ्याविषयी स्थानिक नागरिक शशिकांत विठ्ठल वाघचौरे यांनी सोसायटीचे चेअरमन मिलिंद गांगुर्डे यांच्याकडे तक्रार केली होती. त्यातून बुधवारी सकाळी वाद झाला. यानंतर सकाळी साडेअकराच्या दरम्यान शशिकांत वाघचौरे यांना त्यांच्या राहत्या घरी मारहाण करण्यात आली. त्यामुळे शशिकांत वाघचौरे व मंगल वाघचौरे यांनी नाशिकरोड पोलिसांत बुधवारी सकाळी तक्रार दाखल केली. हे दोघे पती-पत्नी आपल्याकडील अॅक्ट‌िवा दुचाकीवरुन घराकडे जात असताना भारतभूषण नगरात रस्त्यावर दबा धरुन बसलेल्या तरुणांच्या टोळक्याने त्यांची गाडी अडवून त्यांच्यावर काठ्यांनी हल्ला केला. त्यांच्या गाडीचेही नुकसान केले. यावेळी दोन्ही गटाचे समर्थक जमा झाले व तुफान दगडफेक करुन परिसरातील घरांचेही नुकसान केले. या दगडफेकीत सातजण जखमी झाले. यातील काहीजण डोक्यास मार लागल्याने गंभीर जखमी झाले आहेत. या हाणामारी व दगडफेकीच्या घटनेप्रकरणी दोन्हीही गटांनी परस्परविरोधात नाशिकरोड पोलिस ठाण्यात तक्रारी दाखल केल्या आहेत. मंगल शशिकांत वाघचौरे यांनी बंटी जगताप, नीलेश जगताप, सचिन जगताप व बेबी जगताप यांच्या विरोधात तर बेबी जगताप यांनी शशिकांत वाघचौरे व सुधीर वाघचौरे यांच्याविरोधात मारहाण करुन धमकवल्याच्या तक्रारी दाखल केल्या आहेत.
बिटको रुग्णालयात तणाव
या हाणामारीत दोन्ही गटांतील शशिकांत विठठल वाघचौरे (५४), मंगल वाघचौरे (४६), निसर्ग माणिक वाघमारे(२७), सुधीर शशिकांत वाघचौरे (२०), विशाल अशोक गांगुर्डे(२२), दिनेश जगताप (३१) व बेबी विनायक जगताप (४७) या जखमींना दुपारी अडीचच्या सुमारास पालिकेच्या बिटको रुग्णालयात दाखल करण्यात आले. या जखमींवर वैद्यकीय अधिकारी डॉ. कांचन लोकवाणी यांनी उपचार केले. यावेळी दोन्ही गट पुन्हा समोरासमोर आल्याने बिटको रुग्णालयात प्रचंड तणाव निर्माण झाला होता. या प्रकाराची नाशिकरोड पोलिसांना माहिती मिळताच पोलिस उपनिरीक्षक राठोड आपल्या पथकासह बिटको रुग्णालयात पोहचले व दहशत माजविणाऱ्या युवकांची धरपकड करण्याचा प्रयत्न केला. परंतु, पोलिस पथक बघून बिटको रुग्णालयातील जमावाने पोबारा केला.
मोबाइल अॅप डाउनलोड करा आणि राहा अपडेट
