महाराष्ट्रातील शेतकऱ्यांच्या व्यथा, समस्या समजून घेऊन त्यावर दीर्घोपयोगी उपाययोजना करण्यासाठी १९ मे रोजी सकाळी नऊ वाजता चोपडा सभागृह, गंगापूर रोड, नाशिक येथे शिवसेना कृषी अधिवेशन २०१७ होणार आहे. या अधिवेशनाच्या तयारीचा आढावा घेण्यासाठी शिवसेनेचे नेते बुधवारी नाशिकमध्ये येणार आहेत.
उत्तर महाराष्ट्रातील शिवसेनेचे संपर्कप्रमुख, जिल्हाप्रमुख, उपजिल्हाप्रमुख, तालुकाप्रमुखांसह अनेक पदाधिकारी शेतकऱ्यांसह अधिवेशनात सहभागी होणार आहेत. शिवसेना पक्षप्रमुख उद्धव ठाकरे मार्गदर्शन करणार आहेत. निसर्गाचा कोप, दुष्काळ, कर्जाचा डोंगर यामुळे राज्यात शेतकरी आत्महत्यांच्या घटना वाढत आहेत. शेतकऱ्यांच्या वेदनेवर फुंकर घालण्याचा प्रयत्न या अधिवेशनाच्या माध्यमातून शिवसेना करीत आहे. अधिवेशन दोनच दिवसांवर येऊन ठेपले असून, शिवसेना नाशिक महानगराच्या वतीने त्यासाठीची तयारी सुरू आहे. अधिवेशनाला येणाऱ्या शेतकऱ्यांसाठी वाहनव्यवस्था, निवासव्यवस्था, स्वागत कक्ष, नोंदणी कक्ष, खानपान व्यवस्था, आसनव्यवस्थेचा आढावा या वेळी घेण्यात येणार आहे. दोन दिवसांवर येऊन ठेपलेल्या या अधिवेशनाच्या पूर्वतयारीचा आढावा घेण्यासाठी राज्याचे उद्योग व खनिकर्ममंत्री सुभाष देसाई, खासदार संजय राऊत, जिल्हा संपर्कप्रमुख अजय चौधरी बुधवारी सकाळी नाशिकमध्ये येणार आहेत. देसाई यांचे सकाळी दहाच्या सुमारास सरकारी विश्रामगृहावर आगमन होणार आहे. राऊत आणि चौधरी हेदेखील नाशिकमध्ये येणार असून, सकाळी दहा ते दुपारी एक या वेळेत ते शिवसेनेच्या स्थानिक पदाधिकाऱ्यांशी चर्चा करून अधिवेशनाच्या तयारीचा आढावा घेणार आहेत.
मोबाइल अॅप डाउनलोड करा आणि राहा अपडेट
