टीम मटा
छत्रपती संभाजी महाराज यांची ३६० व्या जयंतीनिमित्त शहरात विविध कार्यक्रम घेण्यात आले. याप्रसंगी सामाजिक संस्थांकडून छत्रपती संभाजी महाराज यांच्या प्रतीमेस पुष्पहार अर्पण करून त्यांना अभिवादन करण्यात आले. शहरातील संभाजी महाराजांच्या पुतळ्यालाही पुष्पहार अर्पण करून त्यांची जयंती मोठ्या उत्साहात साजरी करण्यात आली.
‘राजेंवर मालिका व्हावी’
नाशिक : छत्रपती संभाजी महाराज यांच्या कार्याची माहिती युवा पिढीला व्हावी आणि त्यांच्या कार्याचा गौरवास्पद इतिहास सर्वसामान्यांना समजावा याकरिता एखादी मालिका तयार व्हायला हवी, असे प्रतिपादन महापालिकेचे स्थायी समिती सभापती शिवाजीराव गांगुर्डे यांनी सार्वजनिक वाचनालयात छत्रपती संभाजी महाराज यांची ३६० व्या जयंतीनिमित्त झालेल्या कार्यक्रमात केले. छत्रपती संभाजी महाराज यांच्या जयंतीनिमित्त झालेल्या कार्यक्रमात ते बोलत होते. या वेळी बोलताना ते म्हणाले की, छत्रपती शिवाजी महाराज यांच्या पश्चात संभाजी महाराजांनी हिंदवी स्वराज्य अबाधित राहावे याकरिता अपार कष्ट घेतले, प्रचंड यातना सोसल्या. मुघलसम्राट औरंगजेब याचे हिंदवी स्वराज्य गिळंकृत करण्याचे स्वप्न अखेरच्या क्षणापर्यंत हाणून पाडले. त्यामुळे संभाजी महाराजांचा शौर्याचा इतिहास नवीन पिढीला प्रेरणादायी ठरणारा आहे.
यावेळी सावानाच्या वतीने शिवाजीराव गांगुर्डे यांचा सत्कार प्रमुख सचिव श्रीकांत बेणी यांच्या हस्ते करण्यात आला. प्रास्ताविक नाट्यगृह सचिव डॉ. धर्माजी बोडके यांनी केले. सहसचिव अॅड. भानुदास शौचे यांनी आभार मानले. प्रसंगी संजय करंजकर, जयप्रकाश जातेगावकर, उदयकुमार मुंगी, प्रा. संगीता बाफना व शंकरराव बर्वे आदी उपस्थित होते.
आडगावात अभिवादन
आडगाव : धर्मवीर संभाजी महाराज यांच्या जयंतीनिमित्त आडगाव मधील ग्रामस्थांच्या वतीने आडगाव मारुती मंदिर सभागृहात संभाजी महाराज यांच्या प्रतिमेस माल्यार्पण करण्यात आले. या वेळी दिव्या शिंदे ,गार्गी शिंदे या दोन बालिकांच्या हस्ते पुष्पहार अर्पण करण्यात आले. या वेळी उमेश शिंदे ,पोपट लभडे, बालाजी माळोदे, राजेश शिंदे, मधुकर नवले, एकनाथ मते, ज्ञानेश्वर शिंदे , संजय शिंदे, संजय माळोदे आदींसह ग्रामस्थ मोठ्या संख्येने उपस्थित होते.
नाशिकरोडला आदरांजली
नाशिकरोड : पंचवटी येथे छत्रपती संभाजी महाराजांच्या पुतळ्याचे पुजन करून अभिवादन करण्यात आले. यावेळी नाशिकरोड येथील राहुल औटे, संतोष गायधनी, स्वप्नील पाळंदे, पुरुषोत्तम कोरडे आदींसह नागरिक मोठ्या संख्येने उपस्थित होते. शहरात याप्रसंगी विविध उपक्रमांचेही आयोजन करण्यात आले होते.
जुने नाशकात कार्यक्रम
आडगाव : स्वराज्याचे दुसरे छत्रपती, धर्मवीर संभाजी महाराज यांच्या जयंतीनिमित्त तिळेश्वर फ्रेंड्स सर्कल व एन. एस. जी. फाउंडेशनतर्फे जुने नाशिक येथे कार्यक्रमाचे आयोजन करण्यात आले. त्यानिमित्त जुने नाशिक (डिंगराळी) येथील धर्मवीर संभाजी महाराज यांच्या पूर्णाकृती पुतळ्यास पुष्पहार अर्पण करण्यात आला. धर्मवीर संभाजी महाराज हे शिवाजी महाराजांसारख्या युग पुरुषाचे पुत्र असल्यामुळे रणांगणातील मोहिमा आणि राजकारणातील डावपेच यांचे बाळकडू त्यांना लहानपणापासूनच मिळाले. तसेच राजकारणातील बारकावे त्यांनी भराभर आत्मसात केले, अशी माहिती किरण पानकर यांनी दिली. प्रसंगी प्रफुल्ल पाटील यांनी प्रास्ताविक केले. या वेळी रोहित चव्हाण, सागर दवंडे, सचिन बिडकर, सूर्यकांत भांगरे, किरण मानके, संतोष ढमाले, राकेश जाधव, अमोल भडके, हर्षल पवार, विजय भडांगे, सुरेश निमबाले, रितेश पखाले आदी उपस्थित होते.
मोबाइल अॅप डाउनलोड करा आणि राहा अपडेट
