विषारी औषध प्राशन केलेल्या व्यक्तीचा उपचार सुरू असताना मृत्यू झाला. मागील चार दिवसांपासून उपचार सुरू असलेल्या व्यक्तीच्या आत्महत्येचे कारण स्पष्ट होऊ शकलेले नाही. या प्रकरणी आडगाव पोलिसांनी आकस्मात मृत्यूचा गुन्हा दाखल केला आहे.
संतू महादू कांडेकर (५५, रा. गौरव पेट्रोल पंपासमोर, लाखलगाव) असे आत्महत्या करणाऱ्या व्यक्तीचे नाव आहे. कांडेकर यांनी शनिवारी (दि. ६) रात्री अज्ञात कारणातून आपल्या घरात विषारी औषध सेवन केले होते. ही घटना लक्षात येताच मुलगा समाधान यांनी त्यांना तात्काळ दिंडोरीनाका येथील खासगी हॉस्पिटलमध्ये दाखल केले. त्यांचा बुधवारी (दि. १०) दुपारी चार वाजेच्या सुमारास उपचार सुरू असतांना मृत्यू झाला. घटनेचा अधिक तपास हवालदार शिंदे करीत आहेत.
युवतीचे अपहरण
आई समवेत कामावर गेलेली १५ वर्षीय युवती बेपत्ता झाली असून, तिचे अपहरण करण्यात आल्याच्या संशयावरून अंबड पोलिसांनी गुन्हा दाखल केला आहे.
पूजा शंकर कडू (रा. आंबेडकरनगर, वरचे चुंचाळे) असे युवतीचे नाव आहे. बुधवारी सकाळी (दि. १०) आईसमवेत पूजा अंबड एमआयडीसीतील एका कंपनीत कामासाठी गेली होती. दुपारी साडेबारा वाजेच्या सुमारास हात धुवून येते, असे सांगून गेली. मात्र, ती परतलीच नाही. तिचे अपहरण झाल्याच्या संशयावरून गुन्हा दाखल झाला असून, अधिक तपास हवालदार शेळके करीत आहेत.
हिंगणवेढे येथून शेळ्यांची चोरी
शेळ्यांच्या कळपातील तीन बकऱ्या चोरट्यांनी चोरून नेल्यात. ही घटना हिंगणवेढे (ता. जि. नाशिक) येथे घडली. या प्रकरणी नाशिकरोड पोलिस स्टेशनमध्ये गुन्हा दाखल करण्यात आला आहे. सुभाष निवृत्ती धात्रक, यांनी फिर्याद दिली. धात्रक हे शेतीला जोडधंदा म्हणून शेळी पालनाचा व्यवसाय करतात. यासाठी त्यांनी देशी-विदेशी शेळ्यांचे पालन केले आहे. शनिवारी रात्री त्यांच्या शेळ्यांच्या कळपातील उस्मानाबादी जातीच्या तीन बकऱ्या चोरट्यांनी चोरून नेल्या. प्रत्येक तीन ते चार हजार रुपये किंमतीच्या या शेळ्या असून, घटनेचा अधिक तपास हवालदार गांगुर्डे करीत आहेत.
मोबाइल अॅप डाउनलोड करा आणि राहा अपडेट
