शहर परिसरातील बहुतांश एटीएममध्ये पुन्हा एकदा खडखडाट झाल्याने कोणी कॅश देता का कॅश, अशी भावना हतबल नागरिकांकडून व्यक्त होत आहे. गेल्या दहा दिवसांपासून बहुतांश एटीएममध्ये कॅशचे शॉर्टेज झालेले आहे. त्यामुळे नागरिकांना एटीएममधून रिकाम्या हाती परतावे लागत आहे. नाशिकसह अन्य शहरांतही असेच चित्र असून, रिझर्व्ह बँकेने हात आखडता घेतल्याने ही स्थिती उद्भवल्याचा आरोप याप्रश्नी केला जात आहे.
--
करन्सी चेस्ट खाली
रिझर्व्ह बँकेकडून बँकांना कॅशचा सप्लाय होतो, त्याला करन्सी चेस्ट म्हणतात. बँकेची गरज बघून महिना-दोन महिन्यांनी करन्सी चेस्टला सप्लाय होतो. मात्र, पंधरा दिवसांपासून करन्सी चेस्टला रिझर्व्ह बँकेकडून पैसे येणेच बंद झाले आहे. त्यामुळे बँका एटीएम पूर्ण क्षमतेने चालवू शकत नसल्याची स्थिती आहे.
--
स्टेट बँकही हतबल
नोटाबंदीच्या काळात अनेक बँकांचे एटीएम बंद असायचे. मात्र, स्टेट बँकेचे एटीएम सुरूच असायचे. पण, गेल्या दहा दिवसांपासून स्टेट बँकेच्या एटीएममध्येही कॅश नसल्याचा अनुभव नागरिकांना येत आहे. स्टेट बँकेच्या नाशिकरोड, पंचवटी, सीबीएस, सिडको आणि सातपूर या शाखा करन्सी चेस्ट आहेत. म्हणजेच रिझर्व्ह बँकेकडून या शाखांना थेट रोकड येते. या शाखा नंतर आपल्या छोट्या शाखांना कॅश पुरवतात. स्टेट बँकेच्या या करन्सी चेस्टलाच पैसे येणे बंद झाल्याने एटीएमवर परिणाम झाला आहे.
--
दोन तासांत संपतेय कॅश
स्टेट बँकेच्या नाशिकरोड शाखेत नागरिक, व्यावसायिकांकडून कॅश भरणा होतो. रिझर्व्ह बँकेकडून रोकड येणेच बंद झाल्याने आपल्या भरण्यातूनच स्टेट बँक एटीएममध्ये पैसे भरत आहे. नाशिकरोड शाखेतील दोन एटीएममध्ये एक कोटी रुपये २४ तासाला भरले जातात. तेही लवकर संपत आहेत. एटीएमची क्षमता सुमारे ६५ लाखांची असते. महाराष्ट्र बॅँकेच्या नाशिक जिल्हा व शहरात ९० शाखा आहेत. या बँकेची शहरात वीस, तर नाशिकरोडला तीन एटीएम आहेत. जी कॅश एटीएममध्ये भरली जाते, ती दोन तासात संपत आहे.
--
ब्लॅक मनी शक्य
एका बँकेच्या सूत्रांनी सांगितले, की लोक बँकेतून पैसे काढत आहेत. मात्र, भरणाच आश्चर्यकारकरीत्या कमी होत आहे. रोटेशन व्यवस्थित होत नाही. याचा अर्थ ब्लॅकमनीसाठी पैसे वेगळे पडत असावेत, असाही होऊ शकतो. घरकुल व अन्य सरकारी योजनांचे लाभार्थी, रोजचे ग्राहक यांनाही कॅश द्यावी लागते. त्यातच करन्सी चेस्टला पैसे येत नाहीत. त्यामुळे एटीएमवर परिणाम होत आहे.
--
समस्या सर्वत्र
नाशिकरोड प्रेस कामगार राजू नागरे देवदर्शनासाठी नांदेडला गेले होते. जवळील रोकड संपल्याने सायंकाळी ते सर्व एटीएम फिरून आले. पण, पैसे मिळाले नाहीत. शेवटी एका सराफी पेढीकडे कार्ड स्वॅप करून त्यांनी पाच हजार रुपये मिळविले. त्यासाठी एक टक्का ‘व्हॅट’ त्यांना भरावा लागला. त्यानंतर एका पेट्रोलपंपावरून त्यांना आणखी कॅश घ्यावी लागली.
--
काल मी बोधलेनगर, अशोका मार्ग, इंदिरानगर, नाशिकरोड आदी ठिकाणच्या दहा-बारा एटीएममध्ये गेलो. मात्र, सगळीकडेच खडखडाट होता. बँकाही नीट उत्तर देत नाहीत.
-सागर कुलकर्णी, त्रस्त नागरिक
--
रिझर्व्ह बँकेकडून करन्सी चेस्टला होणारा सप्लायच बंद झाला आहे. सरकारी योजनांचे लाभार्थी, रोजच्या ग्राहकांसाठी कॅश द्यावी लागते. त्यामुळे कॅशची टंचाई झाली आहे.
-विक्रांत पाटील, व्यवस्थापक बँक ऑफ महाराष्ट्र, नाशिकरोड शाखा
--
करन्सी चेस्टचा दर्जा असलेल्या स्टेट बँकेच्या मुख्य शाखांकडून आमच्यासारख्या छोट्या शाखांना कॅश मिळते. तथापि, हे पैसेच येत नसल्याने रोकड कमी पडत आहे.
-चंद्रशेखर हेडावू, व्यवस्थापक, स्टेट बँक, जेलरोड शाखा
--
नोटाबंदीच्या दिवसांप्रमाणेच सध्याही नाशिकरोड प्रेसमध्ये दहा, वीस, पन्नास, शंभर, पाचशेच्या नोटांची छपाई अखंड सुरू आहे. कॅश शॉर्टेजचे कारण रिझर्व्ह बॅँकच सांगू शकते.
-जगदीश गोडसे, सरचिटणीस, प्रेस मजदूर संघ
मोबाइल अॅप डाउनलोड करा आणि राहा अपडेट
