प्रभाग समित्यांसाठी ओढाताण

May 6, 2017, 3:30 pm

≫ Next: ‘रेरा’ हा पारदर्शकता आणणारा कायदा

≪ Previous: देवळा नगरपंचायत पोटनिवडणूक बिनविरोध!

म. टा. खास प्रतिनिधी, नाशिक

महापालिकेतील सहा प्रभाग समित्यांच्या सभापतिपदाच्या निवडणुका १९ व २० मे रोजी होत आहेत. बिगुल अखेर वाजला आहे. महापालिकेतील सध्याचे पक्षीय बलाबल पाहता नाशिक पूर्व, पंचवटी आणि नाशिकरोड या तीन ठिकाणी भाजपचा, तर सिडकोमध्ये शिवसेनेचा सभापती होऊ शकतो. मात्र, नाशिक पश्चिम आणि सातपूर या दोन ठिकाणी कोणालाही स्पष्ट बहुमत नसल्याने शिवसेना, काँग्रेस, राष्ट्रवादी व मनसेने महाआघाडी करून या समित्या पटकावण्याची रणनीती सुरू केली आहे. त्यातच पश्चिमवर काँग्रेसने, तर सातपूरवर मनसेने दावा सांगितल्याने महाआघाडीतच ओढाताण सुरू झाली आहे. दुसरीकडे विद्यार्थी सेनेने काँग्रेस व राष्ट्रावादीसोबत आघाडीला विरोध केला आहे.

महापालिकेच्या सहा प्रभाग समित्यांच्या सभापतिपदाचा निवडणूक कार्यक्रम विभागीय आयुक्तांनी जाहीर केला आहे. १९ मे रोजी सातपूर, सिडको, नाशिकरोडच्या, तर २० मे रोजी नाशिक पश्चिम, पंचवटी, नाशिक पूर्व सभापतीची निवडणूक होणार आहे. महापालिकेतील सहा विभागांचे सद्यःस्थितीचे बलाबल पाहता नाशिक पूर्व, पंचवटी आणि नाशिकरोड या तीन ठिकाणी भाजपचा सभापती होणार आहे हे निश्चित आहे. नाशिक पूर्वमध्ये एकूण १९ पैकी भाजपचे सर्वाधिक १२ सदस्य आहेत. पंचवटीत २४ पैकी १९ सदस्य भाजपचे आहेत. नाशिकरोड येथे २३ पैकी १२ नगरसेवक भाजपकडे आहेत. त्यामुळे या तीन ठिकाणी भाजपचाच सभापती होणार आहे. सिडकोतील २४ पैकी १४ सदस्य शिवसेनेचे आहेत. त्यामुळे तेथे शिवसेनेचा सभापती होणार आहे.

नाशिक पश्चिम व सातपूरमध्ये कोणत्याही पक्षाला बहुमत नाही. दोन्ही ठिकाणी भाजपचे सदस्य जास्त असले तरी शिवसेना, काँग्रेस, राष्ट्रवादी, मनसे या महाआघाडीचे सदस्य जास्त आहेत. महाआघाडीने एकत्रित निवडणूक लढवली तर भाजपला केवळ तीन ठिकाणीच समाधान मानावे लागणार आहे. नाशिक पश्चिममध्ये १२ सदस्य आहेत. सद्यःस्थितीत भाजप ५, काँग्रेस ४, शिवसेना, राष्ट्रवादी, मनसेचा प्रत्येकी एक सदस्य आहे. त्यामुळे संख्याबळ जास्त असल्याचे सांगत काँग्रेसने सभापतिपदावर दावा ठोकला आहे. काँग्रेसकडून डॉ. हेमलता पाटील यांना रिंगणात उतरवले जाण्याची शक्यता आहे. त्यांना मनसे, सेना व राष्ट्रवादीने पाठिंबा द्यावा, अशी मागणी केली आहे. त्यामुळे भाजपविरोधात महाआघाडीचे पारडे जड आहे. सातपूरमध्ये २० सदस्य असून, भाजपकडे ९ आणि सेनेकडे ८ सदस्य आहेत. त्यामुळे मनसेचे दोन आणि रिपाइंच्या एका सदस्यावर सभापतिपद अवलंबून आहे. सेनेला मनसे, रिपाइंच्या मदतीची अपेक्षा आहे. मात्र, मनसेनेही येथे दावा ठोकला आहे. त्यामुळे मनसे व सेनेतच ओढाताण सुरू झाली असून, महाआघाडीत फुटीची शक्यता आहे.

शिवसेनेत गटबाजी

प्रभाग समित्यांमध्ये सिडको प्रभाग समिती शिवसेनेला मिळणार आहे. मात्र, सातपूरमध्ये शिवसेनेला मनसे आणि रिपाइंची मदत घ्यावी लागणार आहे. मनसेसह काँग्रेस, राष्ट्रवादीच्या मदतीवरून शिवसेनेतच गटबाजी सुरू झाली आहे. विद्यार्थी सेनेने मात्र मनसे व आघाडीचा पाठिंबा नको, अशी भूमिका घेतली आहे. महानगरप्रमुख अजय बोरस्तेंना निवेदन देऊन तशी मागणीही केली आहे. मात्र, या मागणीमागे सेनेतीलच एक नेता असल्याची चर्चा शिवसेनेत आहे. भाजपला फायदा पोहोचवण्यासाठीच गटबाजी केली जात असल्याचा दावा दुसऱ्या गटाकडून केला जात आहे. त्यामुळे या गटबाजीत शिवसेना काय निर्णय घेते, याकडे लक्ष लागून आहे.

Latest Images