राज्य सरकारच्या त्रिस्तरीय क्रीडा संकुल उभारणीच्या धोरणानुसार जिल्ह्यातील १६ तालुक्यांमध्ये क्रीडा संकुलांना मान्यता देण्यात आली. त्यातील सहा क्रीडा संकुलांचे काम पूर्ण झाले असून, आठ अर्धवट स्थितीत आहेत, तर दोन संकुलांच्या कामांना अजूनही सुरुवात झालेली नाही. जी क्रीडा संकुले शंभर टक्के पूर्ण झाली आहेत, त्यांचा मूळ उद्देशासाठी पुरेसा वापरच होत नसल्याची स्थिती आहे. त्यांच्या सुरक्षेचा प्रश्नही ऐरणीवर आला असून, सुरक्षारक्षकच नसल्याने ही संकुले जुगाराचे अड्डे झाले आहेत. जणू पांढरा हत्तीच ठरलेल्या या संकुलांसंदर्भात घेतलेला आढावा...
--
राज्यातील ग्रामीण भागातील खेळाडूना आंतराष्ट्रीय दर्जाच्या क्रीडा सुविधा उपलब्ध व्हाव्यात, यासाठी त्रिस्तरीय क्रीडा संकुलांची उभारणी करण्याचे धोरण राज्य सरकारने स्वीकारले आहे. त्यात विभागीय, जिल्हा व तालुका क्रीडा संकुलांचा समावेश आहे. त्यानुसार नाशिक जिल्ह्यातील १६ तालुक्यांमध्ये तालुका क्रीडा संकुलांना मान्यता देण्यात आली होती. नाशिक, येवला, पेठ, दिंडोरी, नांदगाव, त्र्यंबकेश्वर या तालुक्यांतील क्रीडा संकुले पूर्ण झाली असून, बागलाण, कळवण, सटाणा, मालेगाव मध्य, मालेगाव बाह्य, नांदगाव, इगतपुरी, सुरगाणा येथील संकुलांची कामे अपूर्ण आहेत. जिल्ह्यातील सिन्नर आणि देवळा तालुक्यांच्या क्रीडा संकुलांच्या कामांना अद्यापही मुहूर्त सापडलेला नाही.
--
नाशिकला सर्वांत जास्त जागा
राज्य सरकारच्या मालकीची नाशिक जिल्ह्यात सगळ्यात जास्त जागा असल्याने इतर जिल्ह्यांच्या तुलनेत राज्यात नाशिक जिल्ह्याला सर्वांत जास्त जागा तालुका क्रीडा संकुलांना मिळाली आहे. तालुका क्रीडा संकुलांसाठी जवळपास २ हेक्टर जागा असून, त्यात एक २०० मीटर लांबीचा इनडोअर बहुद्देशीय हॉल, २०० व ४०० मीटरचा ट्रॅक आणि विविध खेळांची क्रीडांगणे उभारण्याचे काम करण्यात आले आहे.
--
सिन्नरसाठी आठ कोटी
राज्याच्या २००१ च्या क्रीडा धोरणानुसार तालुका स्तरावरही क्रीडा संकुले उभारण्याचा निर्णय घेण्यात आला. २००९ मध्ये त्यासाठी भरीव तरतूद करण्यात आली. या प्रत्येक संकुलासाठी एक कोटी रुपयांची तरतूद करण्यात आली आहे. विशेष बाब म्हणून नाशिक जिल्ह्यातील सिन्नरच्या तालुका क्रीडा संकुलाला तब्बल आठ कोटी रुपये मंजूर करण्यात आलेले आहेत. मात्र, त्याच्या कामाला प्रारंभच झालेला नाही.
--
आमदारांकडे अध्यक्षपद
नव्या शासननिर्णयात प्रत्येक तालुक्याचे आमदार हे तालुका क्रीडा समितीचे अध्यक्ष असून, एखाद्या मतदारसंघात दोन तालुके येत असतील, तर दुसऱ्या तालुका क्रीडा संकुलासाठी विधान परिषद सदस्यांचा अध्यक्ष म्हणून प्राधान्याने विचार करण्यात आला आहे. या समितीत तहसीलदार, जिल्हा क्रीडा अधिकारी, महापालिका, नगरपालिका व पंचायत समिती यांपैकी एक अधिकारी, वॉर्ड अधिकारी, मुख्य अधिकारी, नगर परिषद, ग्रामविकास अधिकारी यांपैकी एक, उपअभियंता, सार्वजनिक बांधकाम विभाग, नगर परिषद किंवा महापालिका यांचा एक प्रतिनिधी, गटशिक्षण अधिकारी, पोलिस निरीक्षक हे सदस्य आहेत. सचिव म्हणून तालुका क्रीडा अधिकारी किंवा संबंधित क्रीडा अधिकारी आहेत.
--
पांढरा हत्ती पोसायचा कुणी?
ही क्रीडा संकुले उभारण्याचा राज्य सरकारचा उद्देश चांगला आहे. परंतु, ती बांधल्यानंतर सांभाळायची कुणी, याबाबत विचारच केला गेला नसल्याने सध्या जी संकुले तयार आहेत, त्यांची दुरवस्था झाली आहे. सार्वजनिक बांधकाम विभाग क्रीडा संकुले बांधून मोकळा झाला. त्यानंतर मात्र ती संकुले सांभाळायची कुणी, असा प्रश्न निर्माण झाला. त्यामुळे ही संकुले बऱ्याच कालावधीपासून ओस पडली आहेत. परिणामी या संकुलांच्या दुरस्तीसाठी बांधण्याइतकाच खर्च येणार असल्याचे तज्ज्ञांचे म्हणणे आहे.
--
सुरक्षेचा प्रश्न एेरणीवर
सुरक्षारक्षकांअभावी तालुका क्रीडा संकुलांत प्रेमीयुगुले, टवाळखोरांचा वावर वाढला आहे. त्यामुळे येथे नियमित सराव करणाऱ्या खेळाडूंना धोका निर्माण झाला आहे. खेळाडूंसाठी येथे विविध स्पर्धा घेण्यात येतात. त्यामुळे महिला, पालकांचीही येथे वर्दळ असते. विविध खेळांचा सराव करण्यासाठी अनेक महिला क्रीडापटूसुद्धा येथे सायंकाळी सराव करतात. मात्र, या ठिकाणी सायंकाळनंतर प्रेमीयुगुले व टवाळखोरांचा वावर वाढला आहे. त्यामुळे खेळाडूंसह पालकांनाही गैरसोय सहन करावी लागत आहे. काही ठिकाणी तर गांजाचे सेवन केले जात असल्याच्याही तक्रारी आहेत.
--
प्रकाश यंत्रणेची तोडफोड
सायंकाळनंतर पुरेसा प्रकाश नसल्याने गैरवर्तन करणाऱ्यांचे चांगलेच फावत आहे. या संकुलांमध्ये मोठे दिवे बसविण्यात आले होते. परंतु, टवाळखोरांनी ते फोडले आहेत. त्यामुळे लगतच्या रस्त्यांवरदेखील अंधाराचे साम्राज्य पसरत असून, तेथूनही महिला ये-जा करण्यास घाबरतात. अशा प्रकारांमुळे येथे सरावासाठी येणाऱ्या खेळाडूंची सुरक्षा धोक्यात आली आहे. काही अनुचित घटना घडल्यास त्याला जबाबदार कोण, असा सवाल क्रीडाप्रेमींकडून उपस्थित होत आहे.
--
अधिकाऱ्यांची अपुरी संख्या
जिल्हा क्रीडा अधिकाऱ्यांच्या अखत्यारित तालुका क्रीडा संकुले येतात. या संकुलांचे काम पाहण्यासाठी केवळ एका तालुका क्रीडाधिकाऱ्याची नेमणूक केलेली आहे. हा एकच अधिकारी किती ठिकाणी भेट देणार व किती ठिकाणी लक्ष देणार, असाही प्रश्न आहे. त्यामुळे एका तालुका क्रीडा अधिकाऱ्याच्या हाताखाली आणखी काही कर्मचारी दिल्यास काम करणे सोपे जाईल आणि विविध ठिकाणी पुरेशा उपाययोजना करणे शक्य होऊ शकेल.
--
आउटसोर्सिंगचे प्रयत्न फोल
जी क्रीडा संकुले पूर्ण झाली आहेत ती क्रीडा संस्थांना वापरण्यास देऊन त्यांच्याकडून येणाऱ्या निधीचा वापर मेंटेनन्ससाठी करण्याची कल्पना होती. ही योजना राज्यातील काही विभागीय क्रीडा जिल्हा संकुलांत यशस्वी झाली. परंतु, तालुक्याच्या ठिकाणी फारशी यशस्वी होऊ शकली नाही. तालुक्याच्या ठिकाणी संस्था नाहीत, ज्या आहेत त्यात फारसे खेळाडू नाहीत. त्यामुळे या संकुलांचा वापर करण्यासाठी संस्था पुढे आल्या नाहीत. ज्या संस्था पुढे आल्या त्यांना खेळाडूंकडून फी न मिळाल्याने क्रीडा विभागाला पैसे देता आले नाहीत. त्यामुळे त्यांचे कामकाज बंद पडले आहे.
--
मानधनावरचे कर्मचारी घरी
प्रत्येक तालुका क्रीडा संकुलात दोन प्रशिक्षक, एक लिपिक, एक शिपाई यांची मानधनावर नियुक्ती करण्यात आली होती. परंतु, जून २०१६ पासून या मानधनावरच्या सर्व कर्मचाऱ्यांना काढून टाकण्यात आले आहे. परिणामी येथे शिकवण्यासही कुणी नसल्याने क्रीडा संकुले केवळ नावापुरतीच उरली आहेत. त्यामुळे ही क्रीडा संकुले सुरू करण्याच्या ग्रामीण भागातील क्रीडाप्रसाराच्या मूळ हेतूलाच हरताळ फासला गेला आहे.
--
एक कोटींचा वापर असा...
प्रत्येक तालुक्यासाठी एक कोटी रुपये खर्च करण्यात येणार आहे. त्यातील ९१ लाख रुपये बांधकामासाठी वापरण्यात येणार असून, पाच लाखांचे क्रीडा साहित्य व चार लाख रुपये हे किरकोळ खर्चासाठी देण्यात येणार आहे.
---
देवळा व सिन्नर वगळता इतर तालुक्यांतील क्रीडा संकुलांची कामे पूर्ण झाली आहेत. सिन्नरच्या संकुलाची विशेष बाब असल्याने प्रकरण तांत्रिक मंजुरीसाठी पाठविण्यात आले आहे. लवकरच कामाला सुरुवात होईल. काही तालुक्यांत क्रीडा संकुल उभारणीची कामे प्रगतिपथावर आहेत. ही कामे तातडीने पूर्ण व्हावीत यासाठी पाठपुरावा सुरू आहे.
-पल्लवी धात्रक, तालुका क्रीडा अधिकारी
....
पूर्ण झालेली संकुले (तालुकानिहाय)
--
नाशिक
सय्यद पिंप्री येथील गट नंबर १०७७ व १०७२ मध्ये शासनातर्फे ३.६३ हेक्टर जमिनीवर क्रीडा संकुल साकारले आहे. एक कोटींचा निधी मल्टिपर्पज इनडोअर हॉल, व्यायामशाळा, कॅफेटेरिया, कार्यालय, चेजिंग रूम, २०० क्षमतेची प्रेक्षक गॅलरी, क्रिकेटचे स्वतंत्र मैदान, तीन टर्फ विकेट, तारेचे कुंपण, रेन वॉटर ड्रेनेज, मैदानावर पाण्याची व्यवस्था आदींसाठी खर्च केला आहे.
...
पेठ
शासकीय आयटीआयजवळील गट नंबर २२४ मधील १.५० हेक्टर जमिनीवर क्रीडा संकुल साकारले आहे. ९१ लाखांचा निधी वॉल कंपाउंड, मैदान सपाटीकरण, विविध क्रीडा प्रकारांकरिता क्रीडांगणे, अंतर्गत रस्ते, कार्यालय, स्टोअर रूम व चेंजिंग रुम्स, इनडोअर मल्टिपर्पज हॉल, विद्युतीकरण, पाणीपुरवठा व्यवस्था आदींसाठी खर्च केला आहे.
...
येवला
कोपरगावरोडवर नगर परिषद हद्दीतील सर्वे नंबर ३०१८, ३०१९ व ३०२० मधील १.१५ हेक्टर जमिनीवर संकुल साकारले आहे. एक कोटींचा निधी मल्टिपर्पज इनडोअर हॉल, जलतरण तलाव, बास्केटबॉल कोर्ट, २०० मीटरचा ट्रॅक, विविध खेळाची क्रीडांगणे, विद्युतीकरण, पाणीपुरवठा आदींसाठी खर्च केला आहे.
...
दिंडोरी
केआरटी हायस्कूल, कसबे वणी येथील गट नंबर ७५० मधील १.५० हेक्टर जमिनीवर संकुल साकारले आहे. एक कोटींचा निधी वॉल कंपाउंड, मैदान सपाटीकरण, विविध खेळांची क्रीडांगणे, अंतर्गत रस्ते, कार्यालय, स्टोअर रूम व चेंजिंग रुम्स, इनडोअर मल्टिपर्पज हॉल, विद्युतीकरण, पाणीपुरवठा व्यवस्था आदींसाठी खर्च केला आहे.
..
त्र्यंबकेश्वर
अंजनेरी येथे ब्रह्मा व्हॅली स्कूलजवळ गट नंबर ९५२ मधील १.५० हेक्टर जमिनीवर संकुल साकारले आहे. एक कोटींचा निधी मल्टिपर्पज इनडोअर हॉल, व्यायामशाळा व टॉयलेट ब्लॉक, कंपाउंड वॉल, मैदान सपाटीकरण, विविध खेळाची क्रीडांगणे तयार करणे, त्याचप्रमाणे खेळाडू व प्रेक्षकांसाठी इतर आनुषंगिक सुविधांवर खर्च करण्यात आला आहे.
..
नांदगाव
येथील पंचायत समितीच्या मागे गट नंबर २७/२५५ ब मधील १.०० हेक्टर जमिनीवर संकुल साकारले आहे. ९५.९८ लाखांचा निधी मल्टिपर्पज इनडोअर हॉल, व्यायामशाळा व टॉयलेट ब्लॉक, कंपाउंड वॉल, मैदान सपाटीकरण, विविध खेळांची क्रीडांगणे तयार करणे आणि इतर उपयुक्त कामांसाठी खर्च करण्यात आलेला आहे.
०००
काम सुरू असलेली संकुले (तालुकानिहाय)
इगतपुरी
येथील ग्रामीण रुग्णालयाजवळ नगर परिषद हद्दीमधील सर्वे नंबर १५८ ब मधील ५९०८ चौरस मीटर जमिनीवर संकुल साकारले जाणार आहे. वॉल कंपाउंड, मैदान सपाटीकरण, कार्यालय, स्टोअर रूम व चेंजिंग रुम्स, इनडोअर मल्टिपर्पज हॉल, विविध क्रीडा प्रकारांसाठी क्रीडांगणे, अंतर्गत रस्ते, विद्युतीकरण, पाणीपुरवठा आदींसाठी एक कोटींचा निधी मंजूर आहे.
...
कळवण
नाकोडा येथील गट नंबर १ मधील १.५० हेक्टर जमिनीवर संकुल साकारले जाईल. मैदान सपाटीकरण, २०० मीटरचा ट्रॅक, कंपाउंड वॉल, कार्यालय, स्टोअर रूम, चेंजिंग रुम्स, टॉयलेट, इनडोअर मल्टिपर्पज हॉल, बास्केटबॉल मैदान, अंतर्गत रस्ते, विद्युतीकरण, पाणीपुरवठा, ड्रेनेज व्यवस्था आदींसाठी एक कोटींचा निधी मंजूर आहे.
...
सुरगाणा
येथील गट नंबर १०० मधील १.५० हेक्टर जमिनीवर संकुल साकारले जाईल. वॉल कंपाउंड, मैदान सपाटीकरण, २०० मीटरचा ट्रॅक, कार्यालय, स्टोअर रूम, चेंजिंग रुम्स, टॉयलेट आदींसाठी एक कोटींचा निधी मंजूर करण्यात आलेला आहे.
...
निफाड
येथील गट नंबर २३४ मधील १.००. हेक्टर जमिनीवर संकुल साकारले जाईल. इनडोअर मल्टिपर्पज हॉल, विविध खेळांची क्रीडांगणे, कंपाउंड वॉल, अंतर्गत रस्ते, मैदान सपाटीकरण आदींसाठी आदींसाठी एक कोटींचा निधी मंजूर करण्यात आलेला आहे.
...
मालेगाव बाह्य
संदेश टॉकीजजवळील प्लॉट नंबर ८१ मधील १.३९ हेक्टर जमिनीवर संकुल साकारले जाईल.
कंपाउंड वॉल, अंतर्गत रस्ते, मैदान सपाटीकरण, २०० मीटरचा ट्रॅक आदींसाठी ५० लाखांचा निधी मंजूर करण्यात आलेला आहे.
...
मालेगाव मध्य
मालेगाव हायस्कूलजवळील सर्वे नंबर १३७, १३ / १,१३९ मधील ६२५५० चौरट मीटर जमिनीवर संकुल साकारले जाणार आहे. विविध खेळांची क्रीडांगणे, कंपाउंड वॉल, अंतर्गत रस्ते, मैदान सपाटीकरण आदींसाठी ४५.४५ लाखांचा निधी मंजूर करण्यात आलेला आहे.
...
बागलाण
नामपूर येथील गट नंबर ३५ मधील १.५० हेक्टर जमिनीवर संकुल साकारले जाणार आहे. एक कोटींचा निधी उपलब्ध असून, बांधकामासाठी सार्वजनिक बांधकाम विभागाकडून निविदा प्रक्रिया राबविण्याची कार्यवाही सुरू झालेली आहे. त्यानंतर प्रत्यक्ष कामाला प्रारंभ होणार आहे.
००००
कामाच्या प्रतीक्षेतील संकुले (तालुकानिहाय)
सिन्नर
शिर्डीरोडवर मुसळगाव येथील गट नंबर १०८५ मधील २० हेक्टर जमीन संकुलासाठी प्राप्त झालेली आहे. बांधकामासाठी प्रकल्प वास्तुविशारदांची नियुक्ती केलेली असून, लवकरच निविदा प्रक्रिया राबवून प्रकल्पाचे काम सुरू करण्यात येणार आहे. आठ कोटी रुपयांचा निधी त्यासाठी मंजूर करण्यात आलेला आहे.
...
देवळा
उमराणे- नामपूर येथील गट नंबर ३५ मधील १.५० हेक्टर जमीन संकुलासाठी प्राप्त झालेली आहे.
कामाला अजून प्रारंभ झालेला नसून, एक कोटींचा निधी वॉल कंपाउंड, मैदान सपाटीकरण, कार्यालय, स्टोअर रूम व चेंजिंग रुम्स, इनडोअर मल्टिर्पपज हॉल, विविध क्रीडा प्रकारांसाठी क्रीडांगणे, अंतर्गत रस्ते आदींसाठी मंजूर आहे.
मोबाइल अॅप डाउनलोड करा आणि राहा अपडेट
