टीम मटा
वैशाख मासात रणरणते ऊन, असह्य करणारा उकाडा अन् अंग भिजवून टाकणारा घाम असे वातावरण असते. मात्र, एप्रिल महिन्याचा अखेरचा रविवार नाशिक शहरासह जिल्हावासीयांसाठी धक्का देणारा ठरला. दुपारनंतर सोसाट्याच्या वाऱ्याने नाशिक शहरात धुळीचे लोट उठविले, तर जिल्हाभरात विविध ठिकाणी अर्धा ते दोन तास अवकाळी पाऊस झाला. त्यामध्ये शेतकऱ्यांचे पिकांसह पशुधनाचे नुकसान झाले. अवकाळी पावसाने बळीराजापुढे संकट निर्माण झाले आहे.
चांदवड, मनमाडला हलक्या सरी
मनमाड : चांदवड शहरासह परिसरात रविवारी दुपारी सुमारे तासभर पावसाच्या हलक्या सरी बरसल्या. पावसामुळे वातावरण शीतल झाले. उन्ह आणि घामाने त्रस्त नागरिकांना काहीसा दिलासा मिळाला. मनमाड शहरात दुपारी तीन वाजेनंतर ढगाळ वातावरण झाले. अचानक आलेल्या वादळाने रविवारच्या बाजारासाठी आलेल्या शेतीमाल विक्रेत्यांसह ग्राहकांचीही धावपळ उडाली. नांदगावमध्येही ढगाळ वातावरण होते.
गारांसह मुसळधार पाऊस
निफाड : तालुक्यातील चितेगाव, चेहडी, खेरवाडी या भागात काही ठिकाणी वादळ वाऱ्यासह गाराही पडल्या. त्यामुळे शेतकऱ्यांच्या द्राक्षबागांचे नुकसान झाले. काही शेतकऱ्यांनी शेतात कांदे काढून साठवून ठेवले होते. कांद्याच्या चाळीतही पाणी शिरल्याने कांद्याचे नुकसान झाले. लासलगाव, विंचूर भागातही वादळी वाऱ्यासह पाऊस झाला. या भागातील कांद्याचे नुकसान झाल्याची प्राथमिक माहिती आहे.
कळवणला अर्धा तास पाऊस
कळवण : कळवण परिसरात रविवारी सुमारे अर्धा तास पाऊस झाला. मात्र, दुपारपासूनच पावसाचे वातावरण तयार झाले होते. शेतकरी वर्ग प्लास्टिक कागद खरेदीला लागलेले दिसून आले. अचानक पावसाने आगमन केले. संततधार सुरू असल्याने शेतकरी, कष्टकरी वर्गाची मोठी तारांबळ उडाली.
वादळी वाऱ्यांमुळे आंब्याचे नुकसान
नाशिकरोड : नाशिकरोड परिसरात सायंकाळी सोसाट्याचा वारा सुटून ढगाळ हवामान तयार झाले. काही ठिकाणी वीजपुरवठा थोड्या वेळासाठी खंडित झाला. वाऱ्यामुळे अनेक ठिकाणी झाडांच्या कैऱ्या पडल्याने उत्पादकांचे नुकसान झाले आहे. नाशिकरोड, जेलरोड, शिंदे, पळसे, टाकळीरोड परिसरात शेतांमध्ये आंब्याचे भरपूर झाडे आहेत. जुन्या-नवीन कॉलन्यांमध्येही आंब्याची झाडे आहेत. वादळी वारा सुटल्याने अनेक ठिकाणी कैऱ्या पडल्या. तयार झालेल्या कैऱ्या बाजारात आणण्याचे नियोजन सुरू असतानाच हा फटका बसला.
‘अवकाळी’ने वाढली धास्ती
येवला : येवल्यास दुपारी तीन ते साडेचारच्या सुमारास अवकाळी पावसाने शेतकऱ्यांच्या काळजाचा ठोका चुकविला. मुखेड, पाटोदा, नगरसूल, राजापूर, अंदरसूल अशा सगळ्याच ठिकाणी पावसाचा शिडकावा झाला. रविवारच्या या निसर्गाच्या बदलेल्या कूसने आता पुढ्यात नेमकं काय वाढून ठेवल आहे? याची बळीराजाला चिंता लागली आहे.
देवळ्यात तिघे जखमी
कळवण : देवळा तालुक्यात दुपारी ३ वाजेच्या दरम्यान झालेल्या अवकाळी गारपीट व पावसाने शेतकऱ्यांच्या पिकांचे मोठ्या प्रमाणात नुकसान झाले. विठेवाडी येथे दोन तर देवळा शिवारातील एका घराचे पत्रे उडून गेल्याने तीन जण जखमी झाले. प्रमिला हिरामण आहेर (३९), कुणाल हेमंत आहेर (६) आणि एकनाथ यशवंत सोनवणे (१९) अशी जखमींची नोवे आहेत. त्यांच्यावर देवळा येथील खासगी रुग्णालयात उपचार सुरू असून त्यापैकी एकाची प्रकृती चिंताजनक आहे. तसेच उखा मोहन अहिरे यांच्या शेतातील पत्र्याचे शेड उडून विजेच्या तारांवर जाऊन पडले. शेतात काढून ठेवलेल्या कांद्यासह डाळिंब, मिरची, टमाटे, कोथंबीर, मेथी, कैऱ्यांचे नुकसान झाले. दरम्यान तहसीलदार कैलास पवार यांनी नुकसानग्रस्त भागाची पाहणी केली. नुकसानीचे तात्काळ पंचनामे करण्याचे आदेश संबंधित तलाठ्यांना दिले आहेत. नुकसानग्रस्त शेतकऱ्यांच्या पिकांचे तात्काळ पंचनामे करून भरपाई द्यावी, अशी मागणी राष्ट्रवादी काँग्रेसचे तालुकाध्यक्ष पंडितराव निकम यांनी केली आहे.
देवळा मुसळधार, येवल्यात हलक्या सरी
देवळ्यातही धुव्वाधार पाऊस झाला असून, नुकसानीचा नेमका अंदाज येऊ शकलेला नाही. चांदवड शहर परिसरातही पावसाने हजेरी लावली. मनमाडमध्ये दुपारी तीननंतर वादळी वाऱ्याने विक्रेते व ग्राहकांची धांदल उडवली. येवला शहर व तालुक्यात सव्वाचारच्या सुमारास काही ठिकाणी पाच मिनिटे पावसाचा हलकासा शिडकावा झाला. सिन्नर तालुक्यातील नांदूर शिंगोटे आणि परिसरात जोरदार पाऊस झाला. त्र्यंबकेश्वर तालुक्यात यंदा मोठ्या प्रमाणात आंब्याचे उत्पादन घेणाऱ्या शेतकऱ्यांचे ढगाळ वातावरणामुळे धाबे दणाणले. जिल्ह्यात अनेक ठिकाणी वीजपुरवठा खंडित झाला.
नाशिकमध्ये हलक्या सरी
शहरात दुपारपासून ढगाळ वातावरण होते. इंदिरानगर, सिडको परिसरात पावसाच्या हलक्या सरी कोसळल्या, तर सायंकाळनंतर गारठा वाढला. पावसाच्या शक्यतेमुळे अनेक ठिकाणी वीजपुरवठा खंडित झाला. उष्म्यामुळे त्रस्त झालेले नागरिक आल्हाददायक वातावरणाचा आनंद लुटण्यासाठी बाहेर पडले.
कांदा उत्पादक चिंतेत
निफाड : तालुक्यातील लासलगाव विंचूर परिसरात रविवारी अवकाळी पावसाने कहर केला. कांदा उत्पादक शेतकऱ्यांना खूप मोठे नुकसान सहन करावे लागणार असल्याची स्थिती आहे अवकाळी पावसाने सर्वाधिक नुकसान कांदा, द्राक्ष व डाळिंब पिकांचे झाल्याची प्राथमिक माहिती आहे. धो-धो कोसळणाऱ्या अवकाळी पावसाने जगाच्या पोशिंद्याच्या मेहनतीवर पाणी फेरले आहे. सरकारकडून तुटपुंजी मदत मिळत असतांना आता बँका, सरकारी, निमसरकारी संस्था, सोसायट्या यांच्याकडून शेतीसाठी घेतलेले कर्ज कसे फेडायचे यांची चिंता शेतकऱ्यांना सतावते आहे.
वादळी वाऱ्याचा जोर
निफाड : निफाड तालुक्यातील उगाव, शिवडी, वनसगाव भागात काही ठिकाणी पाऊस झाला. काही द्राक्ष उत्पादकांचे द्राक्ष काढणीचे काम सुरू होते. अचानक वादळ, वाऱ्यासह आलेल्या पावसमुळे त्यांची धावपळ झाली. सुमारे तीन तास सोसाट्याचा वारा वाहत होता. परिसरात वादळी रविवारी दुपारी दोन वाजेनंतर वाऱ्यासह ढगाळ हवामान होते. वेगवान वादळी वाऱ्यामुळे रस्त्यावर अनेक ठिकाणी धुळीचे साम्राज्य पसरले. सायंकाळी पाचच्या दरम्यान वातावरण निवळले. मात्र हवेचा झोत काही प्रमाणात सुरूच होता.
सातपूरला बत्ती गूल
सातपूर : सातपूर, अशोकनगर, श्रमिकनगर परिसरात सायंकाळी साडेचार ते पाच वाजेच्या दरम्यान जोराचा वारा सुटला. पावसाच्या हलक्या सरी झाल्याने वातावरणात गारवा पसरला. महावितरण कंपनीने कोणतीही अनुचित घटना घडून नये म्हणून वीज पुरवठा खंडित केला. सायंकाळनंतर पुरवठा पुन्हा सुरळीत करण्यात आला.
मोबाइल अॅप डाउनलोड करा आणि राहा अपडेट
