सिटी बसमधून गेल्या पाच वर्षांत १०८ कोटी तोटा सहन करणाऱ्या राज्य परिवहन महामंडळाला या आर्थिक वर्षातही १७ कोटी ७९ लाख ६२ हजारांचा फटका बसला आहे. यंदा सिटी बसच्या माध्यमातून एसटीला ६५ कोटी ११ लाख ५५ हजार रुपये उत्पन्न मिळाले; मात्र त्यांचा खर्च या सेवेवर तब्बल ८२ कोटी ३१ लाख ४४ हजार झालेला आहे.
नाशिक विभागाच्या बजेट बैठकीनंतर ही आकडेवारी समोर आली आहे. फेब्रुवारीत तोट्याचा आकडा वाढल्यामुळे राज्य परिवहन महामंडळाने ही सेवा परवडणारी नसल्यामुळे ती ताब्यात घेण्याचा आग्रह महापालिकेला केला. त्याचबरोबरच सेवा ताब्यात घेणार नसेल तर तोटा भरून द्यावा, असा पर्यायही अगोदरच दिला होता. मात्र, त्यानंतर सेवाही बंद झाली नाही व तोटाही भरून मिळाला नाही. त्यामुळे गेल्या महिन्यापासून पुन्हा हालचाली सुरू झाल्या व तोट्याची ही सेवा बंद केली नाही तर एसटीचा हा भुर्दंड वाढणार असल्यावर चर्चा होऊ लागली. त्यानंतर एसटीच्या बैठकीत सेवा बंद करण्याचा निर्णय घेतला. मात्र, एकाच वेळी सेवा बंद केली तर सर्वांचा रोष सहन करावा लागेल. त्यामुळे टप्प्याटप्प्याने ही सेवा बंद करण्याचा पर्यायही एसटीने ठेवला असून, त्यासाठी सुरुवातीला ४५ बस कायमस्वरूपी बंद केल्या जाणार आहेत. त्यानंतर काही ठिकाणी फेऱ्या, तर काही ठिकाणी कपात केली जाणार आहे.
यंदा सिटी बससेवेतून अनेक फेऱ्या रद्द केल्या तरी तोट्याचा हा आकडा काही कमी होत नसल्यामुळे एसटी प्रशासनाची चिंता वाढली आहे. सिटी बससेवेने वर्षभरात १ कोटी ६७ लाख ६२ हजार किलोमीटरचा प्रवास झाला. त्यातून एसटीचा खर्च ४९ रुपये ११ पैसे प्रत्येक किलोमीटरला आला आहे. मात्र, त्यातून उत्पन्न केवळ ३८ रुपये ८५ पैसे मिळाले आहे. त्यामुळे एसटीच्या सिटी बससेवेचा खर्च दरवर्षी वाढत असून, अपेक्षित उत्पन्न मिळत नाही.
वाद मनपा-एसटीचा'; फटका प्रवाशांना
एसटीने सिटी बस तोट्यात चालत असल्यामुळे अनेक ठिकाणच्या फेऱ्या कमी केल्या तर आता पहिल्या टप्प्यात ४५ बस कायमस्वरूपी बंद करण्याचा निर्णय घेतला आहे. तोट्याचा आकडा वाढत असल्यामुळे एसटीने महापालिकेकडे बोट दाखवले आहे. मात्र, या सर्व प्रकारातून सर्वसामान्य प्रवासाला मात्र त्याचा फटका बसणार आहे.
‘मटा’च्या वृत्ताने खळबळ
एक मेपासून सिटी बससेवा बंद केली जाणार असल्याच्या वृत्ताने शहरात खळबळ उडाली आहे. एसटीच्या या निर्णयामुळे अनेकांनी तीव्र प्रतिक्रिया व्यक्त केल्या. एसटी निर्णय मागे घेते की पुन्हा पत्र दिले जाते, याकडे आता सर्वांचे लक्ष लागले आहे. एक मे रोजीच यावर काय तो निर्णय होईल. त्यामुळे राजकीय हालचालीसुद्धा सुरू झाल्या आहेत.
मोबाइल अॅप डाउनलोड करा आणि राहा अपडेट
