म. टा. प्रतिनिधी, नाशिक
शहर सर्वांचे आहे. शहराचा विकास नागरिकांशी जसा जोडला तसे येथील कायदा आणि सुव्यवस्थेची जबाबदारी पोलिसांसह नागरिकांवर येते. त्यामुळे आपल्या हक्कांप्रमाणे कर्तव्यांबाबतही जागरूकता ठेवायला हवी, असे मत पोलिस आयुक्त डॉ. रवींद्रकुमार सिंघल यांनी व्यक्त केले.
नाशिक सिटिझन्स फोरमच्या वतीने विविध संघटना प्रतिनिधींनी पोलिस आयुक्तांशी संवाद साधला. यावेळी ते बोलत होते. उपस्थितांनी वाहतुकीसंबंधी सर्वाधिक सूचना मांडल्या. नाशिक-औरंगाबाद महामार्गावर येवला येथे ज्या पद्धतीने गार्ड स्टोन लावून पादचारी अथवा स्थानिकांसाठी वेगळी मार्गिका तयार करण्यात आली आहे. त्याच धर्तीवर नाशिक-त्र्यंबक रस्त्यावरही गार्ड स्टोन लावून पायी जाणारे आणि सायकलिस्ट यांच्यासाठी एक स्वतंत्र मार्गिका तयार केली जावी, असा प्रस्ताव यावेळी पोलिस आयुक्तांपुढे नाशिक सिटिझन्स फोरमच्यावतीने मांडण्यात आला. वाहतूक कोंडी टाळण्यासाठी शाळा महाविद्यालयांबरोबरच वर्दळीच्या चौकांवर आणि मार्गावरील हॉकर्स गर्दीस आळा घालावा, अपघात टाळण्यासाठी दुभाजकांना असलेले पंक्चर्स आणि स्पीड ब्रेकरबाबतही यावेळी चर्चा करण्यात आली. शहर आणि ग्रामीण रिक्षांसाठी कलरकोड ठेवावा, अशी सूचनाही यावेळी करण्यात आली. दरम्यान, सर्व पदाधिकाऱ्यांकडून आलेल्या सूचनांनंतर पोलिस आयुक्तांनी सांगितले, की नाशिक शहरातील वर्षांनुवर्षांपासून समस्या निर्माण झाल्या आहेत. या गंभीर समस्या सोडविणासाठी पोलिस, महापालिका, हायवे अॅथॉरिटी, आरटीओ अशा विविध विभागांत समन्वयाची गरज आहे. मात्र, अनेकदा जबाबदारी झटकण्याकडे सर्वांचा कल असतो. पोलिसांशी संबंधित असलेली कामे सोडविण्यासाठी निश्चित ठोस प्रयत्न केले जातील, असे आश्वासन त्यांनी दिले.
उपस्थित पदाधिकारी
बैठकीस निमाचे अध्यक्ष हरिशंकर बॅनर्जी, मंगेश पाटणकर, आयमाचे राजेंद्र अहिरे, नाईसचे विक्रम सारडा, क्रेडाई नाशिकचे अध्यक्ष सुनील कोतवाल, उमेश वानखेडे, अनिल आहेर, बार असोसिएशनचे अॅड. नितीन ठाकरे, अॅड. जयंत जायभावे, असोसिएशन ऑफ कन्सल्टिंग सिव्हिल इंजिनीअर्सचे विजय सानप, आर्किटेक अँड इंजिनीअर असोसिएशनचे सचिन गुळवे, इन्स्टिट्यूट ऑफ इंजिनीअर्सच नरेंद्र बिरार, द इंडियन इन्स्टिट्यूट ऑफ आर्किटेक्सचे प्रदीप काळे, लघुउद्योग भारतीचे एम. जी. कुलकर्णी, नाशिक स्कूल्स असोसिएशनचे सचिन जोशी आदी उपस्थित होते.
या सुधारणा दृष्टिक्षेपात
शहरातील प्रमुख ठिकाणी सीसीटीव्ही लावण्याबाबतचा आराखडा तयार असून, तो वरिष्ठ पातळीवर सादर केलेला आहे. या सीसीटीव्हींसाठी एक बेस सि‌स्टिम तयार करण्यात येईल. तसेच वाढते अपघात टाळण्यासाठी व वाहतूक कोंडीवर मात करण्यासाठी थ्रीडी झेब्रा क्रॉसिंग बसवण्याची तयारी असल्याचे पोलिस आयुक्त रवींद्रकुमार सिंघल यांनी स्पष्ट केले.
मोबाइल अॅप डाउनलोड करा आणि राहा अपडेट
