अभिजित राऊत, आडगाव
मराठा विद्या प्रसारक समाज शिक्षण संस्थेचे रावसाहेब थोरात ऑडिटोरियम हे सभागृह संस्थेच्या कार्यक्रमांबरोबरच विविध सामाजिक, सांस्कृतिक कार्यक्रम, शैक्षणिक कार्यशाळा, चर्चासत्रे आदींसाठी उपलब्ध करून दिले जाते. याशिवाय इतर छोट्या-मोठ्या संस्थांच्या बैठका, विविध पतसंस्थाच्या वार्षिक सर्वसाधारण सभा यांच्यासाठी ते खुले करून दिले जाते. मात्र, शहरातील अत्यंत मध्यवर्ती ठिकाणी असलेल्या या सभागृहाला पुरेशा नियोजनाअभावी काही समस्यांचा विळखा पडल्याचे दिसून येते. प्रामुख्याने या सभागृहासाठी पार्किंगची व्यवस्था असूनही त्याबाबतचे नियोजनच नसल्याने येथे येणाऱ्यांकडून सभागृहासमोरील अत्यंत वर्दळीच्या रस्त्याच्या दुतर्फाच वाहने उभी केली जातात. त्यामुळे येथे वारंवार वाहतुकीचा खोळंबा होताना दिसतो.
---
सुविधा मिळतात, पण...
तब्बल ७५० आसनक्षमतेच्या रावसाहेब थोरात ऑडिटोरियमची मुहूर्तमेढ १९८९ मध्ये झाली. त्यानंतर २००१ मध्ये ६,८८८ चौरस फुटांची इमारत तयार झाली. या सभागृहात प्रवेशासाठी तीन प्रवेशद्वारे आहेत. मात्र, बऱ्याचदा त्यापैकी एकच खुले राहत असल्याने गैरसोय होताना दिसते. व्हीआयपींसाठी विशेष वेटिंग रूमची व्यवस्थाही येथे आहे. या सभागृहात आवश्यकता भासल्यास प्रोजेक्टर, साउंड सिस्टिम उपलब्ध केली जाते. येथे वर्षभर विविध प्रकारचे कार्यक्रम सुरू असतात. त्यामध्ये वार्षिक सर्वसाधारण सभा, सांस्कृतिक कार्यक्रम, शैक्षणिक चर्चासत्रे, वार्षिक स्नेहसंमेलने, मविप्र करंडक, राज्यस्तरीय स्पर्धा होतात. मात्र, येथे विविध सुविधा पुरविल्या जात असल्या, तरी बऱ्याचदा त्यांचा दर्जा विविध उपक्रमांना साजेसा राहत नसल्याने स्वतंत्र व्यवस्था करण्याची वेळ संयोजकांवर येताना दिसते.
दुरुस्तीची कामे नित्याचीच
येथे देखरेखीसाठी कायमस्वरूपी कर्मचारी उपलब्ध असूनही सभागृहातील काही खुर्च्या, स्वच्छतागृह व अन्य सामग्रीची काही प्रमाणात दुरवस्था झाल्याचे दिसून येते. परिणामी येथे कायमच छोटी-मोठी दुरुस्तीची काम सुरू असल्याचे दिसते. नाशिकमध्ये दर बारा वर्षांनी होणाऱ्या सिंहस्थ कुंभमेळ्यात अनेक पोलिस कर्मचाऱ्यांना बैठकांसाठी व गरज भासल्यास सरकारी व सामाजिक कार्यक्रमांसाठी गरजेनुसार हे सभागृह उपलब्ध करून दिले जाते. तीन तासांसाठी साडेबारा हजार आणि संपूर्ण दिवसासाठी साडेबावीस हजार रुपयांमध्ये हे सभागृह उपलब्ध करून दिले जाते.
---
बेशिस्त पार्किंगने विचका
रावसाहेब थोरात सभागृहाशेजारी पार्किंगसाठी जागा उपलब्ध आहे. पण, त्याच्या वापरासंदर्भात पुरेसे नियोजन केले जात नसल्याचे दिसून येते. त्यातच आजूबाजूचला कॉलेज कॅम्पस आहे. त्यामुळे विद्यार्थ्यांकडून, तसेच कार्यक्रमानिमित्त येथे येणाऱ्या नागरिकांकडून सर्रासपणे वाहने बेशिस्तपणे सभागृहासमोरील रस्त्याच्या दुतर्फा उभी केली जातात. त्यामुळे अन्य वाहनधारकांना मनस्ताप सहन करावा. येथे बेशिस्तपणे वाहने उभी करणाऱ्यांना शिस्त लावण्याची आवश्यकता निर्माण झाला आहे.
---
प्रवेशद्वाराबाबत व्हावे नियोजन
रावसाहेब थोरात सभागृहाचे प्रवेशद्वार पुरेस रुंद नाही. सभागृहात जाण्यासाठी आणि बाहेर येण्यासाठी एकच मार्ग बहुधा खुला असतो. त्यामुळे एकाच वेळी खूप मोठ्याप्रमाणात गर्दी होते. एकच अरुंद प्रवेशद्वार असल्याने गर्दीमुळे अनेकांना मनस्ताप सहन करावा लागतो. त्यामुळे यासंदर्भात पुरेसे नियोजन करण्याची आवश्यकता असल्याचे मत नागरिकांकडून व्यक्त केले जात आहे.
---
नागरिक म्हणतात...
रावसाहेब थोरात सभागृहात अनेक सांस्कृतिक कार्यक्रम, व्याख्यानमाला होतात. त्या अनुषंगाने मोठी आसनव्यवस्था येथे आहे. मात्र, बऱ्याचदा वाहन पार्किंगसह काही बाबींसंदर्भात पुरेसे नियोजनच केले जात नसल्याने येथे येणाऱ्यांना काहीशी गैरसोय सहन करावी लागते. ती दूर करण्याची गरज आहे.
-विजय जगताप, नागरिक
---
रावसाहेब थोरात सभागृहात पिण्याच्या पाण्याची व स्वच्छतागृहाची चांगली सुविधा उपलब्ध आहे. शहरातील इतर सभागृहांच्या तुलनेत या सभागृहात पुरेशी स्वच्छता राखण्याचा प्रयत्न केला जात असला, तरी त्यातील उणिवांमुळे अनेकदा येथे येणाऱ्यांना गैरसोय सहन करावी लागते. प्रवेशद्वारात होणारी गर्दी टाळण्याचे नियोजन व्हावे.
-किरण जाधव
---
कलावंत म्हणतात...
रावसाहेब सभागृह हे कॉलेज कॅम्पसजवळ आहे. त्यामुळे विद्यार्थ्यांना येथील कार्यक्रमांचा आनंद घेता येतो. अंकुर फिल्म फेस्टिवलचेदेखील येथे आयोजन करण्यात आले होते. येथील विविध सुविधा समाधानकारक असल्या, तरी प्रवेशद्वार अरुंद आहे. त्यामुळे थोडी गैरसोय होते, ती टाळावी.
-प्रशांत दप्तरे, कलावंत
---
अधिकारी म्हणतात...
संस्थेकडून संस्थेच्या कार्यक्रमांबरोबर इतर वेळेत सामाजिक कार्यक्रमांना प्राधान्याने सभागृह उपलब्ध करून दिले जाते. शासकीय कामांना व बैठकांनादेखील गरजेच्या वेळी सभागृह उपलब्ध असते. सभागृहाची नियमित दुरुस्तीची कामे करून घेतली जातात. मोठी कामे दोन त तीन वर्षांतून करून घेतली जातात.
-विजय काजळे, शिक्षणाधिकारी, मविप्र
मोबाइल अॅप डाउनलोड करा आणि राहा अपडेट
