स्थानिक स्तरावर विविध कल्पनेतून बांधण्यात येणाऱ्या शौचालयामुळे राज्यात शौचालय बांधणी अभियानाने गती घेतली आहे. पाणीपुरवठा आणि स्वच्छता विभागाच्यावतीने उघड्यावर शौचास जाणाऱ्यांच्या घरातून टमरेल जप्ती करण्यास सुरुवात करण्यात आली आहे. या पार्श्वभूमीवर कळवण तालुक्यातील ८६ ग्रामपंचायतीत गेल्या दोन दिवसात टमरेल जप्ती अभियान राबविण्यात आले. या अभियानात तालुक्यातून एक हजाराच्या आसपास टमरेल जप्त केले असून, या टमरेलवर उघड्यावर शौचास बसणाऱ्याचे नाव लिहून त्याचा पंचनामा करण्यात आला आहे. तसेच हे टमरेल ग्रामपंचायतीच्या दर्शनी भागात लावण्याचा निर्णय घेतल्याने उघड्यावर प्रातर्विधीस जाणाऱ्यांनी चांगलाच धसका घेतला आहे.
जिल्हा परिषदेचे मुख्य कार्यकारी अधिकारी मिलिंद शंभरकर व पाणी व स्वच्छता विभागाच्या उपमुख्य कार्यकारी अधिकारी श्रीमती प्रतिभा संगमनेरे यांच्या आदेशान्वये कळवण पंचायत समितीच्या वतीने ६ आणि ७ मार्च रोजी ही मोहीम राबविण्यात आली. टमरेल घेऊन उघड्यावर बसणाऱ्यांचा नावासह पंचनामा करण्याचा निर्णय पंचायत समितीचे गटविकास अधिकारी तुकाराम सोनवणे यांनी घेतला आहे. हागणदारी मुक्त गाव योजनेत सहभाग घेतलेल्या तसेच अन्य गावातील नागरिकांचे वारंवार प्रबोधन करूनही प्रतिसाद मिळत नसल्यामुळे जिल्हा प्रशासनाने हा अनोखा निर्णय घेतला आहे. या धडक कारवाईत नेमून दिलेल्या गावात गुड मॉर्निंग पथके सकाळीच हजर झाली. एकाच वेळी ८६ गावात ही मोहीम राबविण्यात आली. या मोहिमेत गटविकास अधिकारी यांच्या मार्गदर्शनाखाली सर्व विस्तार अधिकारी, ग्रामसेवक, शिक्षक, अंगणवाडी सेविका, आरोग्य सेविका आदींनी सहभाग घेतला.
मोबाइल अॅप डाउनलोड करा आणि राहा अपडेट
