म. टा. खास प्रतिनिधी, नाशिक
५६ व्या महाराष्ट्र राज्य अंतिम हौशी मराठी नाट्य स्पर्धेत नाशिक केंद्रातील मेनली अमॅच्युअर्स या संस्थेच्या ‘गांधीहत्या आणि मी’ या नाटकाने द्वितीय क्रमांक पटकावला. ‘गांधीहत्या आणि मी’ नाटक अतिशय संवेदनशील असून ते योग्य पध्दतीने हाताळण्यात आले.
अंतिम स्पर्धेत रंगभूषेचे द्वितीय पारितोषिक माणिक कानडे यांना तर संगीत दिग्दर्शनाचे द्वितीय पारितोषिक तेजस बिल्दिकर यांना मिळाले. उत्कृष्ट अभिनयाचे पारितोषिक महेश डोकफोडे यांना तर स्त्री कलाकार सुरभी पाटील यांना मिळाले. अभिनयासाठी गुणवत्ता प‍्रमाणपत्रे अक्षय मुडावदकर यांना मिळाले.
नथुराम गोडसे यांनी गांधीहत्या केल्यानंतर जे वादळ उठले, त्याचा इतिहास सर्वसामान्यांना माहीत नाही. परंतु, त्यातून जे निभावून गेले त्यांच्यावर काय आपबिती झाली याचा उहापोह करणारे ‘गांधीहत्या आणि मी’ हे नाटक होते. नथुराम गोडसेच्या गांधीहत्येनंतर जे घडते ते दाखविण्याचा प्रयत्न या नाटकातून करण्यात आला. नथुरामचे बंधू गोपाळ गोडसे शिक्षा भोगत आहेत. त्यांना भेटायला त्यांची पत्नी सिंधू येते आणि तिच्या हाती ते ‘गांधीहत्या आणि मी’ हे पुस्तक ठेवतात. येथून प्लॅशबॅक दाखविण्यात आला आहे. गांधीजींचे मृत्युच्या दिवशी प्रार्थनेला निघण्या अगोदरचे सिंग साहेबांचे कृपाणवरून त्यांच्याशी भांडण दाखविण्यात आले. त्यानंतर नथुरामचे गांधींना मारणे, स्वत:ला अरेस्ट करून देणे आणि इतर बाबींतून या सर्व प्रकारावर प्रकाश टाकण्यात आला.
या नाटकात महेश डोकफोडे, प्रफुल्ल लेले, माधुरी जोशी, अक्षय मुडावदकर, डॉ. प्राजक्ता लेले, आशिष चंद्रचूड, अनिकेत कुलकर्णी, डॉ. प्रसाद धर्माधिकारी, सिमरपाल सिंग, सुरभी पाटील, प्रितम नाकील हर्षल भट, अमेय कुलकर्णी, अश्विनी शिरसाठ, स्वरूप बागूल, कैवल्य एखंडे यांनी भूमिका केल्या. नेपथ्य सुनील परमार यांचे होते. प्रकाशयोजना ईश्वर जगताप यांची होती. संगीत तेजस बिल्दिकर यांचे तर
वेशभूषाडॉ. प्राजक्ता लेले, रंगभूषा माणिक कानडे यांची होती. नाटकाचे दिग्दर्शन महेश डोकफोडे यांनी केले. प्रा. रवींद्र कदम यांची नाटकाची निर्मिती केली. ‘गांधीहत्या आणि मी’ने नाशिक केंद्रातून दिग्दर्शनासह प्रकाशयोजना, रंगभूषा, उत्कृष्ट अभिनय रौप्यपदक तसेच अभिनय गुणवत्ता प्रमाणपत्रही मिळवले होते.
या यशाने खूप आनंद झाला आहे. संस्था स्थापन व्हायला आता २० वर्षे झाली. परंतु, पहिल्यांदाच अंतिम फेरीत गेलो होतो. नाटक द्वितीय आल्याने ती लढाई जिंकलो आहोत. त्याचा आनंद आहे. तो शब्दात व्यक्त करू शकत नाही. स्वप्न पूर्ण झाले आहे.
- प्रा. रवींद्र कदम, अध्यक्ष, मेनली अमॅच्युअर्स संस्था
मी भरून पावलो आहे. पाहिलेल स्वप्न पूर्ण झाले. दोन स्पर्धेत तब्बल २१ बक्षिसे मिळवली. आताही चार लाखांचं बक्षिस मिळालं. हे आम्हाला आर्थिक पाठबळ देणारं आहे. नथुराम, गोपाळ गोडसे लोकांपर्यंत पोहोचवल्याचं व त्यांना ते समजल्याचा खूप आनंद आहे.
- महेश डोकफोडे, लेखक व दिग्दर्शक, ‘गांधीहत्या आणि मी’
मोबाइल अॅप डाउनलोड करा आणि राहा अपडेट
