शहरातील स्टेट बँक नजीक बारा बंगला परिसरात शुक्रवारी दुपारी भरधाव येणारी चारचाकी रस्त्याच्या बाजूला असलेल्या विजेच्या खांबास जोरदार धडक देत समोर असलेल्या सलून दुकानात खुसल्याने सलून दुकानाचा चेंदामेंदा झाला. दुकान मालक व दाढी करण्यासाठी आलेले गृहस्थ मात्र सुदैवाने बचावले. दोघांना किरकोळ दुखापत झाली. यामुळे बारा बंगला परिसरात मोठी गर्दी झाली होती.
शुक्रवारी दुपारी दीड वाजेच्या सुमारास स्टेट बँकेच्याकडून साठफुटी रोडच्या दिशेने काळ्या रंगांची झायलो कार (एमएच १२ जी. झेड. ६२३८) वाहनचालक रोहित (वय २५ रा. पुणे) हा अत्यंत भरधाव वेगाने चालवत येत होता. त्याचा गाडीवरील ताबा सुटल्याने रस्त्याच्या डाव्या बाजूस असलेल्या विजेच्या खांबावर ही गाडी जोरदार धडकली. धडक इतकी जोरदार होती की विजेचा खांब क्षणार्धात कोसळला. त्यानंतरही त्याला गाडीवर ताबा न मिळवता आल्याने समोर असलेल्या सलून टपरीवरीत कार घुसली. तेव्हा दुकानात मालक जयराम चित्ते हे एका गृहस्थची दाढी करीत होते. बेभान वेगाने आलेली ती गाडी टपरीवर जोरदार आदळली. दोघांनी टपरीतून बाहेर उडी घेत स्वतःचा जीव वाचवला.
या जबर धडकेने टपरीचा चेंदामेंदा झाला. तसेच बाजूला उभे असलेली दुकाचाकीचेदेखील नुकसान झाले. काही क्षणात हा भीषण अपघात झाल्याने मोठा आवाज झाला. त्यामुळे परिसरातील नागरिकांनी घटनास्थळी धाव घेतली. जखमी झालेल्या दोघांना तत्काळ नागरिकांनी रुग्णालयात दाखल करून त्यांच्यावर उपचार केले. दरम्यान, घटनेची माहिती मिळताच छावणी पोलिस ठाण्याचे कर्मचारी घटनास्थळी दाखल झाले. त्यांनी कारचालक चालक व मालक यांना ताब्यात घेतले. सायंकाळी उशिरापर्यंत छावणी पोलिस ठाण्यात अपघाताची नोंद करण्याची कारवाई सुरू होती. मात्र गुन्हा दाखल झालेला नव्हता.
मोबाइल अॅप डाउनलोड करा आणि राहा अपडेट
