म. टा. खास प्रतिनिधी, नाशिक
मराठी भाषा अडचणीत आहे, यात शंका नाही. इंग्रजी शाळेमध्ये आपल्या मुलांना टाकणाऱ्यांना हे चांगलेच माहीत आहे; परंतु रस्त्यावरची भाषा विकत घेताना आपल्या काळजातील भाषा मात्र जपायला हवी, असे प्रतिपादन ज्येष्ठ साहित्यिक उत्तम कांबळे यांनी केले.
यशवंतराव चव्हाण महाराष्ट्र मुक्त विद्यापीठाच्या वतीने देण्यात येणाऱ्या विशाखा पुरस्कार २०१६ च्या वितरणात प्रमुख पाहुणे म्हणून कांबळे बोलत होते. महाकवी कालिदास कलामंदिरात हा सोहळा झाला.
कांबळे म्हणाले, की आई व माय मराठी हे एकमेकींचे प्रतिरूप आहे, असे समजून जोपर्यंत तुम्ही वागत नाही तोपर्यंत भाषेला चांगले दिवस येत नाहीत. कुसुमाग्रजांनी आयुष्यभर भाषेसाठी वेगवेगळे उपक्रम घेतले. भारतातील इतर राज्यांतील ज्ञानपीठ विजेत्या साहित्यिकांना नाशिकला बोलावून ते जाहीर कार्यक्रम घडवून आणायचे. म्हणूनच तर त्यांची कविता रेशनकार्डावर गेली. सामान्य माणसाच्या काळजाच्या अस्तित्वावर ज्या कवीची कविता जाते त्याचा जन्मदिन भाषादिन म्हणून साजरा होतो ही अलौकिक बाब आहे, असेही कांबळे म्हणाले.
व्यासपीठावर मुक्त विद्यापीठाचे प्रभारी कुलगुरू डॉ. दिलीप म्हैसेकर, कुलसचिव दिनेश भोंडे, विजया पाटील, मगन पाटील, विशाखा पुरस्कार विजेते योगिनी सातारकर, मोहन कुंभार आणि विष्णू थोरे यांची उपस्थिती होती. प्रारंभी मान्यवरांच्या हस्ते दीपप्रज्ज्वलन करण्यात आले. त्यानंतर विद्यापीठ गीत झाले. दिनेश भोंडे यांनी प्रास्ताविक केले. उत्तम कांबळे यांचा परिचय श्याम पाडेकर यांनी करून दिला. निवड प्रक्रियेविषयी विजया पाटील यांनी माहिती दिली.
कार्यक्रमात या तिन्ही कवींचा विशाखा पुरस्कार देऊन सन्मान करण्यात आला. प्रथम २१ हजार, द्वितीय १५ हजार तर तृतीय पुरस्कार १० हजार रुपयांचा होता. तो अनुक्रमे डॉ. योगिनी सातारकर, मोहन कुंभार आणि विष्णु थोरे यांना प्रदान करण्यात आला.
या वेळी तिघाही कवींनी सन्मानाला उत्तर देताना आपली एक कविता सादर केली. श्याम पाडेकर यांनी सूत्रसंचालन केले.
‘बोलू कवतिके’ कार्यक्रम रंगला
मराठी भाषा गौरवदिन २७ फेब्रुवारी हा दिवस साजरा करण्यात येतो. या दिवसाचे औचित्य साधून राज्य शासनाचा उच्च व तंत्रशिक्षण विभाग आणि मुक्त विद्यापीठाच्या वतीने सुरभी, पुणेनिर्मित ‘बोलु कवतिके’ हा सांस्कृतिक कार्यक्रम आयोजित करण्यात आला होता. या कार्यक्रमात ज्येष्ठ गायक रवींद्र साठे, अनुराधा मराठे, योगिता गोडबोले, श्रीरंग भावे, यांनी सहभाग घेतला. केदार परांजपे यांचे संगीत संयोजन, तर तुषार दळवी, मधुरा वेलणकर, प्रवीण जोशी यांनी अभिवाचन केले.
मोबाइल अॅप डाउनलोड करा आणि राहा अपडेट
