fanindra.mandlik
@timesgroup.com
Tweet @FanindraMT
नाशिक ः महापालिका निवडणुकीच्या मतदानासाठी अवघे चार दिवस राहिले असताना नाशिकरोडच्या निवडणुकीकडे शहरवासीयांचे लक्ष लागले आहे. गेल्या निवडणुकीत नागरिकांनी ज्यांना भरघोस मतांनी विजयी केले, त्यांच्या पारड्यात मतांचा कौल पडणार, की नवख्या उमेदवारांना मतदार पसंती देणार याबाबत चर्चा रंगत आहे. राज्यात युती न झाल्याने शिवसेना व भारतीय जनता पक्ष यांच्यातच घमासान सुरू असून, त्याचे पडसाद नाशिकरोडमध्येही दिसून येत आहेत. गेली अनेक वर्षे बरोबर असलेल्या उमेदवारांनी एकमेकांविरोधात शड्डू ठोकले असून, त्याचा फायदा नक्की कुणाला होईल, हे येणाऱ्या काही दिवसांतच जनतेसमोर येईल.
नव्या प्रभागरचनेत नाशिकरोड विभागातील अनेक नगरसेवकांचे भाग वगळल्याने विद्यमान नगरसेवकच आमनेसामने उभे आहेत. प्रभागरचना आणि आरक्षण यामुळे सत्ताधारी नगरसेवकांपैकी काहींची प्रचंड अडचण झाली आहे. काही नगरसेवकांनी कुटुंबातील महिलांना उमेदवारी मिळवून सत्तेत सामील होण्याचे प्रयत्न सुरू केले आहेत. याशिवाय अनेक माजी नगरसेवकांचेही राजकीय पुनर्वसन होण्याची शक्यता वर्तविली जात असून, नाशिकरोड विभागाची निवडणूक सर्वाधिक चुरशीची होण्याची चिन्हे आहेत. नव्या रचनेनुसार या विभागात प्रभाग क्रमांक १७, १८, १९, २०, २१, २२ या प्रभागांचा समावेश झाला आहे. पूर्वीच्या प्रभागरचनेत प्रत्येक प्रभागात दोन नगरसेवक होते. त्याची संख्या २४ होती. नवीन रचनेनुसार प्रभाग क्रमांक १९ सोडल्यास नगरसेवकांची संख्या चार असणार आहे. त्यामुळे नाशिकरोड विभागात यापुढे एक नगरसेवक कमी होणार आहे.
प्रभाग क्रमांक १७
हा प्रभाग अनुसूचित जाती, महिला ओबीसी, सर्वसाधारण महिला व सर्वसाधारण गटासाठी राखीव आहे. अनुसूचित जाती गटासाठी एकूण १३ उमेदवार रिंगणात असून, खरी लढत माजी महापौर अशोक दिवे यांचे पुत्र व शिवसेनेचे उमेदवार प्रशांत दिवे, भाजपच्या सुनंदा मोरे, कॉँग्रेसचे शशिकांत उन्हवणे व मनसेचे प्रमोद साखरे यांच्यात आहे. नागरिकांच्या मागास प्रवर्ग महिला गटात सहा उमेदवार उभे, असून शिवसेनेच्या विद्यमान नगरसेविका मंगला आढाव व भाजपच्या ज्योती आढाव यांच्यात लढत आहे. सर्वसाधारण महिलांच्या गटात शिवसेनेच्या आशा पवार, राष्ट्रवादीच्या कुंदा सहाणे, भाजपच्या सुमन सातभाई यांच्यात लढत पाहायला मिळणार आहे. याच प्रभागात सर्वाधिक चुरस माजी नगरसेवक भाजपचे दिनकर आढाव व विद्यमान नगरसेवक शैलेंद्र ढगे यांच्यात पाहायला मिळणार आहे. मागील निवडणुकीतील त्यांच्यातील चुरस नाशिकरोडकरांच्या चर्चेचा विषय झाली होती. माजी महापौर अशोक दिवे यांची राहुल व प्रशांत ही दोन्ही मुले वेगवेगळ्या पक्षांकडून लढत आहेत. प्रशांत दिवे अखेरच्या क्षणी शिवसेनेचे उमेदवार बनल्याने सगळी समीकरणे बदलली आहेत.
प्रभाग क्रमांक १८
या ठिकाणी अनुसूचित जाती, नागरिकांचा मागास प्रवर्ग (महिला), सर्वसाधारण (महिला), सर्वसाधारण असे आरक्षण आहे. अनुसूच‌ति जाती या वर्गामध्ये सहा उमेदवार रिंगणात आहेत. शिवसेनेच्या शोभना शिंदे, कॉँग्रेसचे मनोज रोकडे, भाजपचे शरद मोरे व अपक्ष उमेदवार नगरसेवक पवन पवार यांच्यात खरी लढत आहे. महिलांच्या गटात शिवसेनेच्या रंजना बोराडे या माजी नगरसेविका व व्यापारी बॅँकेवर संचालक असल्याने त्यांना या प्रभागात मताधिक्य मिळू शकते. भाजपतर्फे मंदा फड व राष्ट्रवादीतर्फे संगीता तुपे यादेखील नशीब आजमावत आहेत. सर्वसाधारण महिला गटात मीरा हांडगे, मनसेतर्फे रोहिणी पिल्ले व शिवसेनेच्या शीतल ताकाटे रिंगणात आहेत. या प्रभागातील खरी चुरस अपक्ष माजी नगरसेवक सुनील बोराडे, भारतीय जनता पक्षाचे विशाल संगमनेरे व शिवसेनेचे अशोक सातभाई यांच्यात आहे. विशाल संगमनेरे यांनी अनेक कार्यक्रम राबवून आपला वेगळा ठसा उमटवला आहे, तर पूर्वाश्रमीचे मनसेचे व सध्याचे शिवसेनेचे उमेदवार अशोक सातभाई हे व्यापारी बॅँकेवरही संचालक असल्याने त्याचाही त्यांना फायदा होऊ शकतो. सुनील बोराडे यांनीही राष्ट्रवादीतून प्रवेश केला होता. तथापि, एबी फॉर्मच्या घोळामुळे त्यांना अपक्ष लढावे लागत आहे. पक्षांतर करुनही उमेदवारी न मिळाल्याने त्यांनी बंडखोरी केली असून, शिवसेनेला ती महागात पडू शकते.
प्रभाग क्रमांक १९
या प्रभागात संमिश्र वस्ती आहे. मागील निवडणुकीत या प्रभागात मतदारांची संख्या कमी होती. यंदा भौगोलिक स्थितीचा विस्तार झाल्याने परिस्थिती बदलली आहे. हा परिसर अनुसूचित जाती, नागरिकांचा मागस वर्ग प्रवर्ग (महिला), सर्वसाधारण गटासाठी राखीव आहे. अनुसूचित जाती गटात या ठिकाणी हरीश भडांगे मागील वेळी राष्ट्रवादीचे नगरसेवक म्हणून निवडून आले होते. यंदा ते अपक्ष म्हणून निवडणूक लढवित आहेत. नगरसेवक कन्हैया साळवे भाजपकडून, तर माजी नगरसेवक संतोष साळवे शिवसेनेकडून रिंगणात आहेत. महिलांच्या गटातही चुरस आहे. यात राष्ट्रवादीच्या शोभा आवारे, भाजपच्या नंदा भोर, शिवसेनेच्या जयश्री खर्जुल यांच्यात खरा सामना होणार आहे. सर्वसाधारण गटात शिवाजी भागवत भारतीय संग्राम परिषदेतर्फे, मनसेतर्फे सचिन चव्हाण, राष्ट्रवादीतर्फे विक्की खेलूकर, तर शिवसेनेतर्फे माजी नगरसेवक अंबादास ताजनपुरे निवडणूक रिंगणात आहेत.
प्रभाग क्रमांक २०
हा प्रभाग अनुसूचित जाती, नागरिकांचा मागस वर्ग प्रवर्ग (महिला) सर्वसाधारण (महिला), सर्वसाधारण यासाठी राखीव करण्यात आला आहे. हा प्रभाग उच्चभ्रू असल्याने गेल्या दोन्ही वेळी तो भाजपचे संभाजी मोरुस्कर यांच्याकडे होता. या प्रभागात इतर प्रभागांच्या तुलनेत उमेदवारांची संख्या कमी असली, तरी तुल्यबळ लढत होईल अशी चर्चा आहे. गेल्या अनेक वर्षांपासून भाजपचे कार्यकर्ते असलेले अंबादास पगारे यांना उमेदवारी मिळाली आहे. त्याचप्रमाणे या गटात शिवसेनेतर्फे अशोक पगारे हेदेखील रिंगणात आहेत. मागास प्रवर्ग महिला गटात अवघ्या दोन उमेदवार निवडणुकीच्या रिंगणात आहेत. माजी नगरसेविका सीमा ताजणे या भाजपतर्फे, तर शिवसेनेतर्फे सुनीता गायकवाड उभ्या आहेत. सर्वसाधारण महिलांच्या गटात विद्यमान नगरसेविका संगीता गायकवाड भाजपतर्फे निवडणूक लढवित असून, त्यांच्या प्रतिस्पर्धी म्हणून शिवसेनेतर्फे योगिता गायकवाड या आहेत. या प्रभागात खरी चुरस आहे ती सर्वसाधारण गटामध्ये. यात भाजपचे विद्यमान नगरसेवक संभाजी मोरुस्कर, शिवसेनेचे गिरीश मुदल‌ीयार व मनसेचे विक्रम कदम यांच्यात चुरस पाहायला मिळत आहे. या प्रभागातील बालाजी मंदिर पाडण्याचा विषय चांगलाच तापला असून, त्याचे फायदे-तोटे नेमके कोणाला होतील यावर चर्चा झडत आहेत.
प्रभाग क्रमांक २१
या ठिकाणी स्लम वस्तीचा भाग अधिक असल्याने तेथील मतदारांवरच उमेदवारांची भिस्त राहणार आहे. त्याचप्रमाणे या प्रभागात मारवाडी, जैन व मुस्लिम समाज लक्षणीय असल्याने त्यांची मते कुठे झुकतात, यावर निकाल अवलंबून राहील. हा प्रभाग अनुसूचित जाती (महिला), नागरिकांचा मागास प्रवर्ग, सर्वसाधारण (महिला), सर्वसाधारण गटासाठी राखीव आहे. या प्रभागात महिलांच्या अनुसूचित जाती गटात माजी मंत्री बबनराव घोलप यांची कन्या तनुजा घोलप या शिवसेनेतर्फे निवडणूक लढवित असून, त्यांना तुल्यबळ लढत देण्याचे काम शिवसेनेतून भाजपत गेलेल्या नगरसेविका कोमल मेहरोलिया यांना करावे लागत आहे. नागरिकांचा मागास वर्ग प्रवर्ग गटात बहुजन समाजवादी पक्षातर्फे प्रतिभा भालेराव मैदानात असून, मनसेचे नगरसेवक रमेश धोंगडे यंदा शिवसेनेकडून निवडणूक लढवित आहेत. भाजपतर्फे नितीन खोले, मनसेतर्फे शिवसेनेचे माजी नगरसेवक अस्लम मणियार व ‘एमआयएम’चे सत्तार तांबोळी यावेळी एकमेकांसमोर उभे आहेत. सर्वसाधारण महिला गटात विद्यमान नगरसेविका वैशाली दाणी व शिवसेनेच्या ज्योती खोले यांच्यात चुरस आहे. सर्वसाधारण खुल्या गटात विद्यमान नगरसेवक सूर्यकांत लवटे यांची माजी नगरसेवक सतीश मंडलेच्या (भाजप) व रईस शेख (कॉँग्रेस) यांच्याशी चुरशीची लढत होत आहे.
प्रभाग क्रमांक २२
नाशिकरोडच्या मध्यवस्तीचा हा भाग असून, यात दिग्गजांची बाजी पणाला लागली आहे. अनुसूचित जाती विभागात शिवसेनेच्या उमेदवार व माजी महापौर नयना घोलप व त्यांच्या भावजय सुषमा रविकरण घोलप एकमेकांच्या समोर निवडणूक लढवित आहेत. नागरिकांच्या मागस वर्ग प्रभागात शिवसेना महिला विभागाच्या प्रमुख व माजी नगरसेविका सत्यभामा गाडेकर शिवसेनेतर्फे निवडणूक लढवित असून, त्यांना कॉँग्रेसच्या लंकाबाई हगवणे, भाजपच्या दीपाली कोठुळे, मनसेच्या पुष्पा रोकडे यांच्याशी कडवी झुंज द्यावी लागणार आहे. सर्वसाधारण महिला गटात राष्ट्रवादीच्या स्नेहल देशमुख, शिवसेनेच्या सुनीता कोठुळे, भाजपच्या गौरी साडे या निवडणुकीच्या रिंगणात आहेत. सर्वसाधारण गटात अपक्ष म्हणून चैतन्य देशमुख, भाजपतर्फे प्रभाकर पाळदे, शिवसेनेचे विद्यमान नगरसेवक केशव पोरजे, राष्ट्रवादीचे चंद्रकांत साडे यंदाही नशीब आजमावून बघत आहेत.
मोबाइल अॅप डाउनलोड करा आणि राहा अपडेट
