दररोज सकाळी वृत्तपत्र विक्रते हे संपूर्ण शहरात विविध भागात फिरत असतात. या व्यवसायामुळे त्यांचा घरोघरी संपर्क असतो. प्रत्येक भागात फिरत असल्यामुळे त्या भागाचे प्रश्न व समस्याही त्यांच्या तोंडपाठ असतात. इतकेच नाही तर त्यांच्याकडे काही प्रश्न वाचक सहजपणे सांगत असतो. त्यामुळे त्यांच्या चष्म्यातून नाशिक शहर कसे असावे व शहराचे नेमके प्रश्न काय आहेत, यावर वृत्तपत्र विक्रेत्यांचे मत ‘मटा जाहीरनामा’तून जाणून घेतले. या विक्रेत्यांनी शहराच्या प्रश्नाबरोबरच त्यांच्या व्यवसायसच्या समस्याही सांगत आपला जाहीरनामा समोर ठेवला.
आम्ही रोज प्रश्न सांगू शकतो
आमचे संपूर्ण शहरात सहाशेहून अधिक सदस्य आहेत. आम्ही सकाळपासून वर्तमानपत्र विकण्याच्या निमित्ताने सर्व शहर पादाक्रांत करत असतो. आम्हाला जर महानगरपालिकेने विश्वासात घेतले, तर आम्ही रोज त्यांना त्या भागातील प्रश्न व त्याची गरज सांगू शकतो. याबरोबरच शहरात अनेक विकासकामे झाली, पण सार्वजनिक प्रसाधानगृहाचा प्रश्न हा मोठा आहे. त्याकडे पूर्ण दुर्लक्ष झाले आहे. शहरातील गार्डन व इतर सार्वजनिक ठिकाणी हे बांधणे सहज शक्य आहे. त्याचप्रमाणे त्याची निगा व स्वच्छता होण्यालाही अग्रक्रम असावा. पार्किंगची समस्या सोडवावी व वाहतुकीचे नियम सांगण्यासाठी मनपाने उपक्रम घेणे गरजेचे आहे. त्यातून बरेच प्रश्न सुटतील.
-चंद्रकांत पवार, अध्यक्ष, नाशिक शहर वृत्तपत्र विक्रेता संघटना
पाण्याचे वाटप विषम स्वरुपात
शहरात मुबलक पाण्याचे प्रमाणे असले तरी वाटप मात्र विषम स्वरुपात आहे. काही ठिकाणी २४ तास पाणी असते तर काही ठिकाणी फक्त एक तास. त्यामुळे वितरणव्यवस्था सुदृढ करणे व समान वाटप करणे हा प्रश्न महत्वाचा आहे. त्यामुळे पाणीटंचाईचा सामना करण्याची वेळ येणार आहे. पाणीप्रश्नाबरोबरच कचऱ्याचा विषयसुध्दा गंभीर आहे. वडाळा भागात तर कचरा मोठ्या प्रमाणात टाकला जातो व मनपाही तो उचलते. पण त्यानंतर पुन्हा कचरा टाकला जातो. त्यामुळे कचरा टाकण्यासाठी केवळ मनपावर विसंबून चालणार नाही. त्यासाठी नागरिकांचे प्रबोधनही महत्वाचे आहे. कचऱ्यामुळे त्याच भागाचे आरोग्य बिघडते त्यासाठी सर्वांनी या प्रश्नावर जागृत असावे.
-अजय बागूल, सिडको
उघड्यावर मांस विक्री नको
उघड्यार मांस विक्री सर्रास होते. त्यावर निर्बंध असावे. त्यासाठी प्रत्येक भागात सॉल्टर हाऊसची व्यवस्था मनपाने करावी. या मांसविक्रीमुळे दुर्गंधी तर येतेच, पण आरोग्याचेही अनेक प्रश्न उभे राहतात. त्याचप्रमाणे भाजी मार्केट हा सर्व उपनगरात असावे. तशी व्यवस्था करण्यात यावी व त्यासाठी पार्किंगची व्यवस्थाही हवी. त्यामुळे रहदारीला त्याचा त्रास होणार नाही. त्याचप्रमाणे सार्वजनिक जागेवर निगा राखण्यासाठी रखवालदार असावेत. त्यामुळे जुगारी व इतर जण त्या जागेवर घाण करणार नाहीत.
-विनोद पाटील, सरचिटणीस, शहर वृत्तपत्र विक्रेता संघटना
भटक्या कुत्र्यांना आवरा
शहरात भटक्या कुत्र्यांचा प्रश्न मोठा आहे. आम्ही वृत्तपत्र घरोघरी देतो तेव्हा हा प्रश्न किती तीव्र आहे याची आम्हाला नेहमीच जाणीव होते. सामान्य माणसालासुध्दा त्याचा त्रास सहन करावा लागतो. या प्रश्नावर महानगरपालिका फारशी गंभीर नाही. जेव्हा हा प्रश्न तीव्र होतो, तेव्हा त्यावर काहीतरी उपाययोजना केली जाते. पण नंतर त्याकडे दुर्लक्षच केले जाते. त्यामुळे हा प्रश्न कायमस्वरुपी सुटेल यासाठी सातत्याने त्याकडे लक्ष देणे गरजेचे आहे. भटक्या कुत्र्यांप्रमाणेच आम्हाला पाण्याचे लिकेज हा प्रश्नही सकाळी सर्वत्र दिसतो. संपूर्ण रस्ता पाण्याने वाहत असतो. त्यामुळे हे लिकेज कसे बंद करता येईल, याकडेही लक्ष देणे गरजेचे आहे.
-दत्तात्रय ठाकरे, अध्यक्ष, सिडको वृतपत्र सेवाभावी संस्था
कव्हरेज नाही
खरं तर सर्व प्रश्न महानगरपालिकेशी संबंधित असतात असे नाही. पण नगरसेवकांनी इतर प्रश्नांकडेसुध्दा लक्ष देणे गरजेचे आहे. सातपूर शिवाजीनगर भागात मोबाइलला रेंजच नाही. एकीकडे डिजिटल इंडियाचा नारा दिला जातो व खेड्यापाड्यात मोबाइल पोहचत असताना शहरात अशी समस्या असेल यावर कोणी विश्वास ठेवत नाही. पण ही समस्या आहे व त्याचा आम्ही नेहमी पाठपुरावा केला. पण त्यातून मार्ग निघाला नाही. त्याचप्रमाणे ड्रेनेज व कचरा ही मोठी समस्या आहे. त्याकडे लक्ष देणे गरजेचे आहे. त्र्यंबकरोड व सातपूर या रस्त्यावर नेहमी अपघात होतात. त्यावरही कायमस्वरुपी उपाययोजना करण्याची गरज आहे.
-विनोद कोर, अध्यक्ष, सातपूर वृत्तपत्र विक्रेता संघटना
स्पीड ब्रेकर हवे
संपूर्ण शहरात रस्ते करण्यात आले. पण स्पीड ब्रेकर नाही. त्यामुळे सुसाट जाणाऱ्या गाड्या व त्यातून अपघात होण्याचे प्रमाण वाढले आहे. याला आळा घालण्यासाठी महानगरपालिकेने स्पीड ब्रेकर करण्याची गरज आहे. त्यातून अपघाताचे प्रमाण कमी होईल. लहान मुलांना बाहेर पाठवणे यामुळे अवघड झाले आहे. स्पीड ब्रेकरप्रमाणेच स्वच्छतेचा विषयसुध्दा गंभीर आहे. कर्मचारी वेळेवर येत नाहीत. त्यांच्या दांड्याही मोठ्या प्रमाणात असतात. त्यामुळे अस्वच्छेतेचे प्रमाण वाढले आहे. सातपूर विभागात एटीएम नाही. त्यामुळे आमची प्रचंड गैरसोय होते. त्यासाठी नगरसेवकांनी पाठपुरावा करावा.
- राजू अनमोला, सातपूर
मनपाच्या शाळेकडे दुर्लक्ष
शहरात महानगरपालिकेच्या प्रत्येक विभागात शाळा आहेत. पण त्याकडे दुर्लक्ष केल्यामुळे इतर खासगी शाळांमध्ये विद्यार्थ्यांना पालक टाकतात. मनपाच्या शाळा जर दर्जेदार केल्या, तर येथे विद्यार्थ्यांचे प्रमाणही वाढेल व चांगले शिक्षण मिळेल. महानगरपालिकेने या शाळांसाठी स्वतंत्र बजेट करणे गरजेचे आहे. त्यासाठी अत्याधुनिक सुविधा दिल्या तर या शाळांतही स्मार्ट विद्यार्थी तयार होतील. त्यामुळे अशा शाळांना दर्जेदार करणे हे गरजेचे आहे. खासगी शाळांत मोठ्या प्रमाणात देणग्या घेतल्या जातात. त्यातून नागरिकांची पिळवणूकच होते. त्यामुळे बदलत्या काळात या शाळांचे रुपडे बदलण्यासाठी त्यांच्याकडे लक्ष देणे गरजेचे आहे.
-भारत माळवे, नाशिकरोड
भरारी पथके हवीत
आम्ही जेवढे फिरतो तेवढे नगरसेवकही फिरत नाहीत. त्यामुळे आमचाच वृत्तपत्र विक्रेता जर नगरसेवक झाला तर तो सर्व प्रश्न चांगले मांडेल. खरंतर नगरसेवकांनासुध्दा जे प्रश्न माहीत नसतात, ते आम्हाला फिरताना पटकन कळतात. नगरसेवकही कधी संपूर्ण प्रभागात फिरत नाही. आमचे विक्रेते मात्र व्यवसाया निमित्ताने सर्वत्र जातात. शहरात आज पाण्याचा प्रचंड प्रमाणात गैरवापर केला जातो. काही ठिकाणी तर गाड्या व रस्ते पिण्याच्या पाण्याने धुतले जातात. त्यामुळे पाणीप्रश्न व पाणीटंचाईचा सामना करण्याची वेळ येते. त्यासाठी महानगरपालिकेने भरारी पथके नेमण्याची गरज आहे. त्याचप्रमाणे नाशिकरोड येथे उड्डाणपुलाच्या खाली भाजी विक्रेते असतात. पण सायंकाळी येथे मोठा कचरा असतो. त्याकडे लक्ष दिले तर अस्वच्छता होणार नाही.
-विजय सोनार, नाशिकरोड
वृत्तपत्र विक्रेत्यांना स्टॉल द्य
पुण्याच्या धर्तीवर नाशिकमध्येही वृत्तपत्र विक्रेत्यांना स्टॉल हवे. वृत्तपत्र विक्रेत्यांना अनेक अडचणींचा सामना करावा लागतो. पावसाळ्यात तर आमचे प्रचंड हाल होतात. त्यामुळे आमचे प्रश्न सोडवण्यासाठी महानगरपालिकेने पुढाकार घ्यावा. विक्रेत्यांना खूप जागाही लागत नाही. छोट्या जागेत हा व्यवसाय आम्ही करतो. पुणे महानगरपालिकेने वृत्तपत्र विक्रेत्यांना स्टॉल दिले. आयुक्त पुणे येथे असताना त्यांनी याबाबत पुढाकार घेतला, तसाच नाशिक येथेही घ्यावा.
-किशोर सोनवणे, अध्यक्ष, वृत्तपत्र विक्रेता संघटना, नाशिकरोड
गोदावरीकडे लक्ष देणे गरजेचे
नाशिक हे तीर्थक्षेत्र म्हणून प्रसिध्द आहे. या ठिकाणी देशभरातून भाविक येतात व ते रामकुंडावर जाऊन दर्शन घेतात. पण या तीर्थक्षेत्रात सांडपाण्याचे नियोजन अजूनही महानगरपालिकेला व्यवस्थित करता आले नाही. त्यामुळे नाल्यांचे सांडपाणी गोदावरीत मिळते. त्यातून चुकीचा संदेश जातो. जो प्रश्न सर्वात प्रथम सोडवायला हवा, तोच प्रश्न सुटत नाही. याला प्राथमिकता देणे गरजेचे आहे.
- अनिल निंबाळकर
झोपडपट्टीत पाणी नाही
शहरात सर्वत्र मुबलक पाणी आहे. काही ठिकाणी त्याचा गैरवापरही केला जातो. पण झोपडपट्टीत पाणी नाही. दोन ते तीन किमी अंतर पार करुन लहान मुले पाणी जेव्हा वाहून आणतात, तेव्हा ही असमानता प्रकर्षाने दिसते. त्यामुळे नेमका काय विकास केला, असा प्रश्नही पडतो. सर्वांना समान हक्क आहे. त्यामुळे पाण्याचे वाटप सर्वत्र व्हावे. त्यासाठी वेगळे सांगण्याची गरजही भासू नये. पण तसे होत नाही. त्याचप्रमाणे महानगरपालिकेकडे मैदाने आहेत, पण तेथे कोणतेही खेळ होत नाहीत. त्यामुळे मुले आता मैदानी खेळ विसरू लागले आहेत. सायबर कॅफेत जाऊन ही मुले खेळत बसतात. त्यामुळे अशा प्रश्नांकडे लक्ष देणे गरजेचे आहे.
-बाळू सूर्यवंशी, सिडको
अतिक्रमणापूर्वीच कारवाई व्हावी
अतिक्रमण झाल्यानंतर कारवाई केली जाते. त्यामुळे अनेक अडचणी येतात. पण अतिक्रमण होण्यापूर्वीच जर कारवाई केली, तर त्यातून कोणीही अतिक्रमण करणार नाही व अतिक्रमण होण्याचेही प्रमाण कमी होईल. भाजी विक्रेते तर कुठेही मोक्याच्या ठिकाणी अतिक्रमण करुन दुकाने थाटतात. त्यामुळे रहदारीला अडचण तर होतेच, शिवाय त्यामुळे अतिक्रमणांचे प्रमाणही वाढते. शहरात काही ठिकाणी नगरसेवकांच्या पुढाकाराने सीसीटीव्ही बसवले आहेत. पण हे सीसीटीव्ही बंद आहेत. त्यामुळे ते कशासाठी बसवले असा प्रश्न पडतो.
- बापू जाधव
आमचाही ना हरकत दाखला घ्या
महानगरपालिकेच्या निवडणुकीसाठी इच्छुक उमेदवारांकडून वेगवेगळ्या दाखल्यांची मागणी करत असतात. आता तर शौचालयाचा दाखला अनिवार्य केला. त्याचबरोबर कोणतीही थकबाकी नसल्याचा दाखलाही महत्वाचा असतो. पण या दाखल्याबरोबर वृत्तपत्र विक्रेत्यांचाही दाखला अनिवार्य करा. कारण राजकारणीच आमचे सर्वात जास्त बिल थकवतो. ज्या वर्तमानपत्रातून त्यांना राजकारणाची माहिती मिळते व शहराचे प्रश्न कळतात, त्याच वर्तमानपत्राचे बिल थकवणे ही गोष्ट खरेतर चुकीची आहे. त्यामुळे त्यांना हा दाखलाही अनिवार्य करा, अशी मागणी वृत्तपत्र विक्रेत्यांनी केली.
मोबाइल अॅप डाउनलोड करा आणि राहा अपडेट
