नाशिक : महापालिकेवर भगवा फडकविण्याचा निश्चय करणारी शिवसेना अडचणीत सापडल्याची चिन्हे आहेत. शहरातील पक्षाच्या तब्बल नऊ उमेदवारांचे अर्ज बाद ठरल्याची बाब पक्षाने गंभीरतेने घेतली असून, या साऱ्या प्रकरणाची चौकशी होणार आहे. तर, या साऱ्या प्रक्रियेत दिरंगाई नडल्याचा ठपकाही शिवसेनेच्या नेत्यांनी ठेवला आहे.
महापालिका निवडणुकीत अर्ज दाखल करण्याच्या अंतिम दिवशी उमेदवारी घोषित करण्याच्या आणि एबी फॉर्म वाटपाचा गोंधळ शिवसेनेच्या अंगाशी आला आहे. त्यामुळे शहरात तब्बल नऊ उमेदवार अपात्र ठरले असून, एका उमेदवारावर सोमवारी (६ फेब्रुवारी) निर्णय होणार आहे. तसेच, शहरांतर्गत नाराजीचा फटकाही शिवसेनेला बसणार आहे. युती तुटल्यानंतर शहरातील १२२ जागांसाठी तब्बल ८२३ इच्छुकांनी मुलाखती दिल्या. उमेदवारी घोषित न करता थेट शेवटच्या दिवशी एबी फॉर्म देण्यात आले. माजी महापौर विनायक पांडे यांचे चिरंजीव ऋतुराज यांना उमेदवारी नाकारण्यातून राडा झाला. या साऱ्या प्रकरणात महानगरप्रमुख अजय बोरस्ते यांना बेदम मारहाणही झाली. त्यानंतर पांडे यांचे बंड शमले असले तरी या साऱ्या प्रकारावेळी एबी फॉर्म पळवून नेल्याचा प्रकारही घडला. त्यामुळेच शहराच्या विविध भागात अधिकचे एबी फॉर्म आढळून आले. काही उमेदवारांनी दोन फॉर्म सादर केले. या साऱ्या गोंधळाचा मोठा फटका शिवसेनेला बसला आहे. पंचवटीतील प्रभाग चारमध्ये शिवसेनेच्या चारही उमेदवारांचे अर्ज अवैध ठरविण्यात आले आहेत. प्रभाग ३०मध्ये शिवसेनेच्या उमेदवारांनी एबी फॉर्मऐवजी झेरॉक्स जोडल्याचा प्रकार घडला. येथीलच उमेदवार संजय चव्हाण यांच्या अर्जावर सोमवारी सुनावणी होणार आहे. प्रभाग १२मध्येही उमेदवाराचा अर्ज बाद ठरवला आहे. तर, रविवारी झालेल्या सुनावणीत प्रभाग २९मध्ये विद्यमान नगरसेवक अरविंद शेळके यांचा अर्ज अवैध ठरविण्यात आला आहे. त्यामुळे शहरात एकूण नऊ शिवसेना उमेदवारांचे अर्ज बाद झाले आहेत. या साऱ्यांना आता धनुष्यबाण या चिन्हावर निवडणूक लढविता येणार नाही. त्यांना पुरस्कृत केले जाणार आहे. त्यातही प्रभाग ३०मध्ये सोमवारच्या सुनावणीनंतर सेनेची आणखी एक जागा कमी होणार की नाही, हे स्पष्ट होईल.
गोंधळाच्या या साऱ्या प्रकाराचा परिणाम सेनेच्या सत्ता उद्दिष्टावर होणार आहे. याची गंभीर दखल पक्ष नेतृत्वाने घेतली असून, या साऱ्या प्रकाराची चौकशी केली जाणार आहे. तसेच, या गोंधळामुळे सेनेंतर्गत बंडाळी पुन्हा उफाळून येण्याची चिन्हे आहेत. अर्ज बाद होताच सेनेतील धुसफूस बाहेर येत आहे.
दरम्यान, माजी महापौर विनायक पांडे यांचे भाचे कैलास शिंदे हे सिडकोतील प्रभाग २४मध्ये इच्छुक होते. त्यांना तिकीट नाकारण्यात आल्याने त्यांनी पत्नीसह भाजपात प्रवेश केला. तेथे भाजपाने अर्चना शिंदे यांना पुरस्कृत उमेदवार घोषित केले आहे.
पक्षाचे अधिकृत उमेदवार बाद झाल्याची माहिती मिळाली आहे. हा प्रकार गंभीर आहे. या साऱ्या प्रकाराची चौकशी केली जाईल.
- अजय चौधरी,
संपर्क प्रमुख, शिवसेना
उमेदवारी घोषित करण्याबाबत मोठा हलगर्जीपणा झाला. एकेक जागा महत्त्वाची असताना नऊ उमेदवार बाद झाले आहेत. मुंबईत उमेदवार निश्चितीनंतर कोअर कमिटीची बैठक घेऊन अंतिम निर्णय होणे आवश्यक होते.
- बबन घोलप, उपनेते, शिवसेना
मोबाइल अॅप डाउनलोड करा आणि राहा अपडेट
