उमेदवार व कार्यकर्त्यांची गर्दी, रात्री उशिरापर्यंत अर्ज छाननी सुरू; चोख पोलिस बंदोबस्त
टीम मटा
महापालिकेच्या सहाही प्रभागात किरकोळ वाद वगळता शांततेत अर्ज छाननी पार पडली. सुमारे १०६ अर्ज अवैध ठरले असून, ३१ प्रभागांच्या १२२ जागांसाठी अर्ज छाननीनंतर आता १०३५ उमेदवार रिंगणात आहेत. शनिवारी रात्री उशिरापर्यंत अर्ज छाननी सुरू होती. चार प्रभागांच्या अर्जांची छाननी प्रलंबित आहे. यामुळे उमेदवारांची संख्या वाढणार आहे.
पंचवटीत उशिरापर्यंत छाननी
पंचवटी विभागातील ६ प्रभागातील २४ जागांवरील उमेदवारांच्या नामनिर्देशन पत्राची छाननी किरकोळ प्रकार वगळता शांततेत पार पाडली. या छाननीत प्रभाग ४, ५ व ६ मधील छाननी साडेचारपर्यंत संपली. पण प्रभाग १, २ व ३ मधील छाननी रात्री उशिरापर्यंत सुरू होती.
काँग्रसेच्या उमेदवार विमल पाटील यांनी ए फॉर्मबरोबर बी फॉर्म न भरल्यामुळे त्यांना पक्षाची उमेदवारी गमवावी लागली. राष्ट्रवादीच्या उमेदवार सोनाली काळे यांनी उमेदवारी अर्जात पक्षाचे नाव न टाकल्यामुळे त्यांना अपक्ष म्हणून निवडणूक लढवावी लागणार आहे. या विभागात प्रभाग क्रमांक ४, ५ व सहामध्ये पाच उमेदवाराचे अर्ज बाद झाले. दोन ठिकाणी नामनिर्देशनपत्र भरलेल्या सात उमेदवारांचे एकच अर्ज ठेवण्यात आले. त्यामुळे या विभागात ९८ उमेदवारांचे अर्ज वैध ठरले आहेत. त्यात प्रभाग ४ मध्ये ४०, प्रभाग ५ मध्ये २८, प्रभाग ६ मध्ये ३० उमेदवार असणार आहेत. या विभागात अवैध ठरलेल्या नामनिर्देशनपत्रात कविता पवार, नवनाथ जीवराम जाधव, सविता मोठे व हेमंत वाघ यांचे अर्ज अवैध ठरवले. सुनीता काकड यांनी जातप्रमाणपत्राची पोहच न लावल्यामुळे त्यांचा अर्ज नामंजूर केला.
‘पूर्व’मध्ये दोन अर्ज अवैध
नाशिक पूर्वमधील सहा प्रभागांमधून दोन अर्ज छाननीत बाद करण्यात आले. प्रभाग चारमधील शिवसेनेच्या तीन उमेदवारांचा एबीफॉर्म झेरॉक्स असल्याने त्यांना अपक्ष ठरवण्यात आले असून, संजय चव्हाण यांच्या अर्जावर सोमवारी सुनावणी होणार आहे. दरम्यान, काही समर्थकांनी कार्यालयाबाहेर एकच गर्दी केल्याने पोलिसांना सौम्य लाठीमार करावा लागला.
नाशिकपूर्व मध्ये प्रभाग १३, १४, १५ तसेच १६, २३, ३० असे सहा प्रभाग आहेत. संजय चव्हाण यांच्या अर्जावर सोमवारी सुनावणी होणार असली, तरी निवडणूक निर्णय अधिकाऱ्यांनी कागदपत्र स्वीकारणार नसल्याचे सांगून त्यांना गॅसवर ठेवले आहे. माजी महापौर यतीन वाघ व नगरसेवक मुशीर सैय्यद यांच्यावरील हरकती फेटाळण्यात आल्या. प्रभाग २३ अ मधील रुपाली गांगुर्डे या उमेदवाराचे पती हे मनपा ठेकेदार असल्याची तक्रार रुपाली निकुळे यांनी केली. त्यामुळे त्यांचा अर्ज अवैध ठरविण्यात आला. प्रभाग १६ मधील रेखा गांगुर्डे यांचे कागदपत्रे अपूर्ण असल्याने त्यांचा अर्ज अवैध ठरविण्यात आला. प्रभाग ३० मधील शिवसेनेचे उमेदवार संजय चव्हाण, रशिदा शेख, शकुंतला खोडे, नीलेश चव्हाण यांचे एबीफॉर्म हे झेरॉक्स होते. तसेच झेरॉक्सवरच काळ्या पेनाने सह्या करण्यात आल्या आहेत. त्यामुळे हे अर्ज फेटाळण्याचा निर्णय घेण्यात आला. परंतु, संजय चव्हाण यांच्या वकिलाने आक्षेप घेतला. तसेच सुनावणीसाठी वेळ मागितली.
नाशिकरोडला २७ अर्ज अवैध
नाशिकरोड प्रभागात दाखल झालेल्या ३१८ उमेदवारांच्या अर्ज छाननीत विविध कारणांनी २७ उमेदवारांचे नामनिर्देशनपत्र बाद झाले असून, २९१ उमेदवारांचे अर्ज वैध ठरले आहेत. छाननीनंतर नाशिकरोडमधील प्रभाग १७, १८ व २० मधून मनसे व प्रभाग १८ व २० मधून काँग्रेस-राष्ट्रवादी आघाडी आपले पॅनलही पूर्ण करू न शकल्याचे स्पष्ट झाले आहे. मनसेला २३ पैकी ६, तर आघाडीला ३ जागांवर आपले उमेदवारच देता आलेले नाहीत. प्रभाग १८ मधून बाबुराव आढाव यांनी दिनकर आढाव यांच्या एबी फॉर्ममध्ये व्हाईटिंग लावून खाडाखोड केलेला असल्याने त्यांचा अर्ज बाद करण्यात यावा, अशी मागणी केली. प्रभाग १८ मधून अशोक सातभाई व सुनील बोराडे यांच्या अर्जांकडे सर्वांचे लक्ष लागले होते. सातभाईंनी अगोदर आपला अर्ज सादर केल्याने त्यांचा अर्ज वैध ठरला.
पश्चिमच्या तीन प्रभागांत ९० उमेदवार
अर्ज छाननीनंतर पश्चिम विभागातील प्रभाग सात, १२ आणि २४ मध्ये एकूण ९० उमेदवार रिंगणात आहेत. अर्ज वैध ठरलेल्या उमेदवारांपैकी कोण माघार घेते याकडे सर्वांचे लक्ष असून, त्यानंतरच या प्रभागातील खरे चित्र स्पष्ट होईल. सर्वाधिक उमेदवार प्रभाग २४ मध्ये आहेत.
पश्चिम विभागातील तीन प्रभागांसाठी तब्बल १७२ अर्ज सादर झाले होते. अनेक उमेदवारांनी दोन ते तीन ठिकाणाहून किंवा एकाच जागेसाठी अर्ज सादर केले होते. ते सर्व अर्ज छाननीत बाद झाले. त्यानंतर तब्बल ९० उमेदवार रिंगणात आल्याचे दिसते. यात, अपक्षांचाही भरणा मोठा असून, अर्ज माघारी घेण्याची प्रक्रिया पूर्ण झाल्यानंतर खरी लढत सुरू होईल. निवडणूक अधिकाऱ्यांनी सकाळी छाननी प्रक्रिया सुरू केली. काही किरकोळ हरकती समोर आल्या. मात्र, त्यांचा लागलीच निर्णय झाला. दुपारी अडीच वाजेपर्यंत छाननी प्रक्रिया पूर्ण झाली होती. प्रभाग ७ अ मधून चार, ब मधून नऊ, क साठी तीन तर ड मधून १० उमेदवार रिंगणात आहेत. प्रभाग १२ च्या अ, ब, क आणि ड मध्ये अनुक्रमे नऊ, सहा, पाच आणि आठ इतके उमेदवार आहेत. सर्वांचे लक्ष असलेल्या प्रभाग २४ च्या अ मध्ये पाच, ब मध्ये पाच, क मध्ये नऊ तर ड मध्ये तब्बल १३ उमेदवार आहेत.
सातपूर प्रभागात तीन अर्ज बाद
नाशिक महापालिकेच्या पंचवार्षिक निवडणुकीत उमेदवारी अर्ज दाखल केल्यानंतर शनिवारी अर्जांची छाननी करण्यात आली. यामध्ये तीन उमेदवारांचे अर्ज बाद ठरविण्यात आल्याचे निवडणूक निर्णय अधिकारी भालचंद्र बेहेरे यांनी सांगितले. यामुळे सातपूरच्या चार प्रभागांत १६ जागांसाठी १८५
उमेदवार निवडणुकीच्या रिंगणात आहेत. आता माघारीनंतरच चित्र स्पष्ट होणार आहे.
सातपूर विभागातील चार प्रभागांची अर्ज छाननी विभागीय कार्यालयातील निवडणूक विभागात पार पडली. निवडणूक निर्णय अधिकारी बेहेरे यांनी सकाळी ११ वाजेपासून छाननीला सुरुवात केली. यात प्रभाग ८ अ मधून मीना डोळस यांचा उमेदवारी अर्ज जात प्रमाणपत्र नसल्याने बाद करण्यात आला. प्रभाग ९ अ मधून सदावर्ते परमेश्वर यांचेही जात प्रमाणपत्र नसल्याने उमेदवारी अर्ज बाद करण्यात आला. प्रभाग ११ अ मधून आशा शेलार यांना तीन अपत्य असल्याने उमेदवारी अर्ज बाद ठरविण्यात आल्याचे निवडणूक निर्णय अधिकाऱ्यांनी जाहीर केले.
अर्ज छाननीला सकाळी ११ वाजेच्या आतच चारही प्रभागातील उमेदवारांनी गर्दी केली होती. उमेदवारांसोबत कार्यकर्त्यांची गर्दी झाल्याने पोलिसांच्या मदतीने उमेदवाराचे नाव वाचून दोन जणांनाच प्रवेश देण्यात आला. अर्ज छाननीत तीन अर्ज बाद झाल्याने आता १६ जागांसाठी तब्बल १८५ उमेदवार निवडणूक रिंगणात आहेत. उमेदवारी अर्ज माघारीनंतरच उमेदवारांचे चित्र स्पष्ट होईल.
सिडकोत हरकतींचा निर्णय प्रलंबित!
महापालिकेच्या निवडणुकीसाठी सिडकोतील दोन प्रभागांमध्ये शिवसेनेचे पंधरा, तर भाजपचे दोन एबीफॉर्म आले असल्याने या हरकतींवरून सिडकोतील विभागीय कार्यालयात सकाळपासूनच उमेदवार व त्यांच्या समर्थकांची गर्दी केली होती. या हरकतींबाबत सर्वच उमेदवारांचे मत निवडणूक निर्णय अधिकाऱ्यांनी जाणून घेतले. मात्र रात्री उशिरापर्यंत याबाबतचा निर्णय जाहीर करण्यात आला नाही.
सिडकोतील प्रभाग २८ मध्ये शिवसेनेचे सात, तर भाजपचे दोन एबीफॉर्म दाखल झाले आहेत. त्यामुळे शिवसेनेच्या या जादा तीन एबीफॉर्मबद्दल हरकती घेण्यात आल्या आहेत. यामध्ये २८ अ मधून विद्यमान नगरसेवक डी. जी. सूर्यवंशी यांच्या विरोधात स्वीकृत नगरसेवक माणिक सोनवणे यांनी हरकत घेतली असून, प्रभाग २८ ब मधून नगरसेविका शीतल भामरे यांच्या विरोधात सोनाली काकडे यांनी, क गटातून नगरसेविका सुवर्णा मटाले यांच्या विरोधात रेणुका गायधनी यांनी एकमेकांविरोधात हरकती घेतल्या आहेत. या प्रभागातील क गटातून भाजपच्या विद्या लगड व अपर्णा गाजरे यांनी एकमेकांविरोधात हरकती घेतल्या आहेत. प्रभाग २९ अ मधून सुमन सोनवणे यांनी माधुरी खैरनार यांच्या विरोधात, तर ब गटातून नगरसेविका रत्नामाला राणे यांनी माजी नगरसेविका सुमन सोनवणे यांच्या विरोधात, तसेच क गटातून नगरसेवक अरविंद शेळके यांनी भूषण देवरे यांच्या विरोधात, ड गटातून दीपक बडगुजर व सतीश खैरनार यांच्या परस्परविरोधात हरकती दाखल केल्या आहेत. त्याचप्रमाणे ब गटातून भाजपच्या संगीता बरके व सोनाली मंडलेचा यांनीही परस्परविरोधात हरकती दाखल केल्या आहेत. शिवसेनेच्या वंदना बिरारी यांच्या विरोधात सर्वच उमेदवारांनी जात प्रमाणपत्राची हरकत घेतली आहे. उमेदवार व त्यांच्या समर्थकांची गर्दी विचारात घेऊन निवडणूक निर्णय अधिकाऱ्यांनी याबाबतचा निकाल हा ई मेलद्वारे देण्यात येणार असल्याचे सांगितले.
मोबाइल अॅप डाउनलोड करा आणि राहा अपडेट
