नवीन नाशिक विभागातील सहा प्रभागांसाठी १७ इच्छुकांनी १८ ठिकाणी दावेदारी सांगत आपली माहिती भरली आहे. अद्याप त्यांनी अर्ज दाखल केलेले नाहीत. कोणत्याही पक्षाकडून अद्याप उमेदवारी यादीवर शिक्कामोर्तब झाले नसून, काठावर बसून इच्छुक उमेदवार आपल्याला संधी मिळणार काय, याची प्रतीक्षा करीत आहेत.
नवीन नाशिकमध्ये २४ ते २९ असे सहा प्रभाग असून, यात प्रमुख राजकीय पक्षांची ताकद पणाला लागली आहे. शिवसेना आणि भाजपकडे इच्छुक उमेदवारांची मोठी फौज आहे, तर महाराष्ट्र नवनिर्माण सेना, काँग्रेस, मार्क्सवादी कम्युनिस्ट पक्ष तसेच राष्ट्रवादीकडे थोडीफार ताकद असल्याचे दिसते. या पार्श्वभूमीवर ऑनलाइन अर्ज सादर करण्यास सुरुवात झाली असून, प्रभाग २४ आणि २९ मधील उमेदवारांनी आपापली माहिती भरण्यास सुरुवात केली आहे. माहिती भरणाऱ्या उमेदवारांनी अर्ज दाखल केलेला नाही. दाखल झालेल्या अर्जाची प्रत उमेदवारास विभागीय कार्यालयात जमा करावी लागणार आहे. मनसेचे पहिली यादी ३० किंवा ३१ जानेवारीला प्रसिद्ध होण्याची शक्यता आहे. इतर प्रमुख पक्षदेखील याच दरम्यान आपले उमेदवार निश्चित करतील, अशी शक्यता आहे. या पार्श्वभूमीवर ऑनलाइन पद्धतीने अर्जातील माहिती भरून ठेवत इच्छुक आपल्या उमेदवारीवर दावा करीत पक्षावर दबाव निर्माण करण्याची चिन्हे आहेत.
प्रभाग २४ मधून शिवसेनेचे इच्छुक उमेदवार प्रवीण सावळीराम तिदमे यांनी वॉर्ड क्रमांक अ, तसेच ड साठी उमदेवारी अर्जावरील माहिती भरली आहे. याच प्रभागातून अ वॉर्डातून शिवसेनेच्या विद्यमान नगरसेविका कल्पना चंद्रकांत पांडे यांनीही उमेदवारीवर दावा केला आहे. इच्छुक उमेदवारांमधील चढाओढीला सुरुवात झाल्याचे यातून दिसते. प्रभाग २५ (अ)मधून हेमंत ईश्वरलाल बिऱ्हाडे, २६ (ड)मधून अण्णा पाराजी आरोटो, २७ (अ) मधून किरण हरी ढवळे, २८ मधील अ मध्ये नयन दिलीप कोठावदे आणि विजय साहेबराव शिंदे, २८ ब मध्ये भाजपच्या इच्छुक अपर्णा रमेश गाजरे, २८ (ड)मधून साहेबराव गंगाधर दातीर, प्रभाग २९ च्या अ वॉर्डासाठी विठाबाई बाळासाहेब सोनवणे, ब वॉर्डामधून तुषार गजानन नागरे, तसेच संतोष लक्ष्मण सांगळे, क वॉर्डामध्ये मुक्तार अन्सार शेख, तसेच सुरेश रामचंद्र पवार आणि ड वॉर्डामधून शिवसेनेचे इच्छुक रमेश रामजी उघडे यांनी माहिती भरण्यात आघाडी घेतली आहे.
मोबाइल अॅप डाउनलोड करा आणि राहा अपडेट
