म. टा. प्रतिनिधी, नाशिक
महापालिका निवडणुकीसाठी महाराष्ट्र नवनिर्माण सेनेकडून इच्छुक उमेदवारांच्या मुलाखती सुरू झाल्या असून, मंगळवारी तब्बल २४३ इच्छुकांनी उमेदवारीसाठी मुलाखत दिली. मनसेची पहिली यादी ३० जानेवारीला जाहीर होणार असून, मनसेचा अंडर करंट कायम असल्याचे पक्षाचे संपर्क नेते अविनाश अभ्यंकर यांनी या वेळी सांगितले.
महापालिका निवडणुकीचे वेध लागल्यापासून महाराष्ट्र नवनिर्माण सेनेला भगदाड पडण्यास सुरुवात झाली. यातून मनसे सावरणार काय, असा प्रश्न उपस्थित होत असतानाच मंगळवारी ठक्कर बाजार येथील राजगड कार्यालयात इच्छुक उमेदवारांच्या मुलाखती घेण्यात आल्या. पंचवटी प्रभाग १ ते ६ व नाशिकरोड विभागातील प्रभाग १७, १८, १९, २०, २१, २२, तसेच मध्य नाशिकमधील प्रभाग ७, १४, १६, २३ मधील इच्छुकांच्या मुलाखती घेण्यात आल्या. मनसेचे नेते बाळा नांदगांवकर, संपर्क नेते अविनाश अभ्यंकर, डॉ. प्रदीप पवार, प्रदेश उपाध्यक्ष अॅड. राहुल ढिकले, राज्य सचिव प्रमोद पाटील, स्थायी समितीचे सभापती सलीम मामा शेख, गटनेते अनिल मटाले, जिल्हाध्यक्ष रतनकुमार इचम यांच्या उपस्थितीत मुलाखती पार पडल्या. जवळपास १६ प्रभागांमध्ये २४३ इच्छुक उमेदवार पुढे आले. विद्यमान नगरसेवकांनीही मुलाखती दिल्या. मनसेकडे एकूण ४७३ इच्छुक उमेदवार आले असून, उर्वरित उमेदवारांच्या मुलाखती बुधवारी होणार आहेत. यामध्ये मध्य नाशिकमधील प्रभाग १२, १३, १५ सिडकोतील २४, २५, २७, २८, तसेच प्रभाग २९, ३०, ३१ त्यानंतर सातपूर विभागातील ८, ९, १०, ११, २६ या प्रभागांतील इच्छुकांच्या मुलाखती घेण्यात येणार आहेत.
पक्षनिष्ठा हा महत्त्वाचा फॅक्टर
पक्षाकडून लढण्यासाठी डॉक्टर, इंजिनीअर, उच्चशिक्षित उमेदवार पुढे येत आहेत. लेखी परीक्षा रद्द झाली असली तरी मुलाखत हीदेखील परीक्षाच आहे. पक्षनिष्ठा, प्रभागातील समस्यांची जाणीव असलेले, प्रभागाची भौगोलिक रचना माहीत असलेले, त्या प्रभागात एक ओळख असलेला उमेदवार अपेक्षित आहे. या निकषांवर खऱ्या उतरणाऱ्या उमेदवारांची माहिती पक्षप्रमुख राज ठाकरे यांना देण्यात येईल. त्यानंतर उमेदवारी निश्चित होईल, अशी प्रतिक्रिया अभ्यंकर यांनी दिली. साधारणतः ३० जानेवारी रोजी पहिली यादी जाहीर होणार असल्याचे अभ्यंकर यांनी स्पष्ट केले. दरम्यान, महापौर अशोक मुर्तडक, तसेच मनसे प्रदेश उपाध्यक्ष राहुल ढिकले यांचीही रीतसर मुलाखत घेण्यात आली.
गद्दारांना स्थान नाही
इतर पक्षांतील प्रबळ, मात्र उमेदवारी न मिळाल्याने नाराज असलेले काही इच्छुक पक्षाच्या संपर्कात आहेत. त्यात लवकरच मोठी वाढ होईल. अशा उमेदवारांबाबत पक्ष विचार करेल. पक्षप्रमुख राज ठाकरे अंतिम निर्णय घेतील. मात्र, पक्षातून बाहेर पडलेल्या नगरसेवकांना कोणत्याही परिस्थितीत पुन्हा पक्षात स्थान मिळणार नाही, असे अभ्यंकर यांनी स्पष्ट केले. काही नगरसेवकांनी तसा प्रयत्न सुरू केला आहे. मात्र, पक्षाची पॉलिसी अंतिम असून, त्यात बदल होणार नाही, असे अभ्यंकर यांनी स्पष्ट केले.
बाळा नांदगावकरांचे गुफ्तगू
नेते बाळा नांदगावकर यांनी दुपारी एक वाजेच्या सुमारास मुलाखतीतून वेळ काढून सुरेखा भोसले, सुजाता डेरे, अर्चना जाधव, कांचन पाटील, मेघा साळवे, नितीन साळवे, सविता काळे यांच्यासह माजी आमदार नितीन भोसले यांच्याशी गुफ्तगू केले. निवडणुकीपूर्वी उद््भवलेल्या समस्या व आता त्यावर निघणारे पर्याय याविषयी बैठकीत चर्चा करण्यात आली.
मोबाइल अॅप डाउनलोड करा आणि राहा अपडेट
