नाशिकरोड मध्यवर्ती कारागृहात मोबाइलचे घबाड आढळून आल्यानंतर येथील कैद्यांची थेट तुरुंगाधिकाऱ्यावर हल्ला करण्याची मजल पोहचल्याने आता या कारागृहाची थेट राज्याच्या कारागृह महासंचालकांकडूनच झाडाझडती घेतली जाणार असल्याचे खात्रीलायक वृत्त आहे. परिणामी या कारागृहातील कैद्यांना मोबाइल सेवा पुरविणाऱ्यांवर पांघरुण घालणाऱ्यांचे पितळ येत्या काही दिवसांतच उघडे पडणार आहे.
नाशिकरोड मध्यवर्ती कारागृहात सध्या बेकायदेशीररित्या आढळून येणाऱ्या मोबाइल फोनचे सत्र थांबता थांबेना. एका आठवडाभराच्या कालावधीत या कारागृहात तब्बल ३२ मोबाइल फोन आढळून आल्याच्या घटना उघडकीस आल्या आहेत. यातील दोन मोबाइल फोनमध्ये सीम कार्डही आढळून आल्याने संबंधित कैदी बाहेरील गुन्हेगारी जगताशी संपर्कात असल्याचेही सिद्ध झाले आहे. या मोबाइल सत्रामुळे या कारागृहाच्या सुरक्षा व प्रशासन व्यवस्थेची पुरती नाचक्की झाली आहे. त्यातच शनिवारी मोबाइल आढळून आलेल्या एका कैद्याची चौकशी करणाऱ्या तुरुंगाधिकाऱ्यावरच संबंधित कैद्याने हल्ला चढविल्याने या कारागृहाच्या सुरक्षा व्यवस्थेचा कोणताही दबदबा राहिला नसल्याचे स्पष्ट झाले आहे. याशिवाय यापूर्वी या कारागृहात कैद्यांच्या आपसांतील हाणामारीत एका कैद्याचा मृत्यूही झाला आहे. त्यापूर्वी एका कैद्याचा खूनही झाला होता. या गुन्हेगारी घटनांचा विचार करता या कारागृहाची सुरक्षाव्यवस्था व प्रशासन यांचा कैद्यांवर वचकच नसल्याचे उघड झाले आहे.
निलंबनाची कारवाई व्यर्थ
कैद्यांकडे मोबाइल फोन आढळून आल्याच्या घटनेचे गांभीर्य ओळखून राज्याच्या कारागृह प्रशासनाने तीन तुरुंगाधिकाऱ्यांना जबाबदार धरुन त्यांच्यावर निलंबनाची कारवाई केली होती. या कारवाईनंतर या घटना थांबण्याऐवजी पुन्हा मोबाइल फोन आढळून आल्याच्या घटना उघडकीस आल्या. यावरुन निलंबनाची कारवाई व्यर्थ गेल्याचे स्पष्ट झाले आहे.
मोबाइल अॅप डाउनलोड करा आणि राहा अपडेट
