अभिव्यक्ती मीडिया फॉर डेव्हलपमेंट आणि मराठा विद्याप्रसारक समाज, नाशिक यांच्या संयुक्त विद्यमाने आयोजित अंकुर फिल्म फेस्टिव्हलमध्ये पहिला दिवस सामाजिक आशयाच्या फिल्म्सने गाजवला. बालविवाह, बलात्काराचे सावट, लोकशिक्षण, प्रबोधन, तसेच आरोग्य जागृती असे विषय या फिल्म्समधून साकारण्यात आले. हा फेस्टिव्हल २५ डिसेंबरपर्यंत रावसाहेब थोरात सभागृह, गंगापूररोड येथे होणार आहे. फेस्टिव्हलचे यंदाचे पाचवे वर्ष आहे.
सकाळच्या सत्रात शाहिरी ही फिल्म झाली. तीन तासांची ही फिल्म वेगवेगळ्या शाहिरांवर साकारण्यात आली. दिग्दर्शन अशित साबळे यांचे होते. शाहिरीचे खरे स्वरूपच या फिल्ममधून दिसले. त्यानंतर चकवा ही फिल्म झाली. २७ मिनिटांची ही फिल्म सामाजिक आशयावर बेतलेली होती. दुपारच्या सत्राची सुरुवात सावट या फिल्मने झाली. दिग्दर्शन स्वप्नील राजशेखर यांनी केले होते. ‘सावट’ ही बालविवाह प्रथेशी निगडित फिल्म होती. दारूडा बाप आणि त्यांच्या ओझ्याखाली गुदमरलेली मुलगी यांच्यातील संबंधावर ही फिल्म भाष्य करते. मुलगी शाळेत गेलेली असते, परंतु बापाला मात्र वेगळीच चिंता सतावत असते. आपल्या मुलीला कुणी पळवून तर नेले नसेल ना, या सावटाखाली तो सतत वावरत असतो. त्यामुळे ती जेव्हा परत येते तेव्हा तो तिचे लग्न लावण्याचा विचार करतो. त्याच्या सावटामुळे बालविवाहाला पुष्टी मिळते, असा या फिल्मचा विषय होता.
त्यानंतर ‘बलुतं’ ही फिल्म दाखवण्यात आली. ‘बलुतं’ या फिल्ममध्ये नायिकेच्या पतीचे निधन होते. त्यानंतर चार पोरींचा सांभाळ करण्यासाठी ती केस कापण्याचे काम करते. गावचा पाटीलही तिला या प्रयत्नात मदत करतो. तो स्वत: तिच्याकडून केस कापून घेतो व इतरांनाही तसे करण्यास सांगतो. त्यातून तिला रोजीरोटी मिळते. शांताबाई यादव या महिलेच्या जीवनावर बेतलेली ही कथा होती. पहाटेची रात्र या फिल्ममध्ये दरोडेखोरांशी स्त्री कसा सामना करते हे दाखविण्यात आले आहे. तिन्ही दरोडेखोरांना आपल्या चिमुरड्यासाठी यमसदनी धाडते अशा आशयाची ही फिल्म होती.
यंदा फेस्टिवलमध्ये ८५ फिल्म दाखविल्या जाणार आहेत. या फिल्म्स मध्य प्रदेश, गोवा, गुजरातसह नाशिक, कोल्हापूर, मुंबई, सांगली, रायगड, उस्मानाबाद, जळगाव, पुणे, बुलडाणा या ठिकाणाहून आल्या आहेत. फेस्टिवलमध्ये दोन सत्रांत दोन वेगवेगळ्या विषयांवर मान्यवरांच्या मार्गदर्शनाखाली कार्यशाळा आयोजित करण्यात आल्या आहेत. पहिली कार्यशाळा अनिल झनकर यांच्या मार्गदर्शनाखाली झाली. लघु चित्रपट बनवण्याच्या पद्धती या विषयावर त्यांनी टिप्स दिल्या.
आजच्या फिल्म्स
अंकुर फिल्म फेस्टिव्हलमध्ये ‘आज’, ‘एक नयी सोच : स्वच्छता’, ‘पुस्तक’, ‘कैफियत’, ‘चांगदेव’, ‘अप्रुटेड’, ‘वारसा’, ‘हम चित्र बनाते है’, ‘जिव्हाळा’, ‘ऑफबिट’, ‘माझी आई पास झाली’, ‘वॉटर इज इनव्हॅल्युएबल’, ‘चाइल्ड मॅरेज’, ‘आम्ही भारताचे नागरिक’, ‘ये जो देस है मेरा’, ‘बस स्टॉप’, ‘डब्लूटीबीएलबी’ या फिल्म्स होणार आहेत.
कार्यशाळा : पटकथा लेखन विषयावर कार्यशाळा : मीताली जोशी, वेळ : दुपारी २ ते ४ या वेळेत होणार आहे.
मोबाइल अॅप डाउनलोड करा आणि राहा अपडेट
