म. टा. वृत्तसेवा, देवळाली कॅम्प
भगूर शहरात एकमेव राष्ट्रीयीकृत बँक असून नोकरदार, पेन्शनधारक, व्यापारी, सामाजिक क्षेत्रातील नागरिक या बँकेचे मोठ्या प्रमाणात ग्राहक असून पैसै स्वीकारण्यासाठी व पैसे देण्यासाठी एकमेव काऊंटर असल्याने ग्राहकांची मोठी गैरसोय व तासनतास सभासदांना रांगेत उभं राहावे लागत आहे. याबाबत युनियन बँकेच्या वरिष्ठ अधिकारी यांनी शाखेला तात्काळ दुसरे एक काऊंटर सुरू करण्याची मागणी, भगूर व्यापारी असोसिएशनचे उपाध्यक्ष शाम चांडक यांनी एका पत्रकाद्वारे केली आहे.
भगूर शहरात सर्वच सहकारी बँका आहेत, मात्र नागरिकांचे व्यवहार हे युनियन बँकेत व्यवहार जास्त चालतात. या शाखेत लहवित, लोहशिंगवे, वंजारवाडी, शेणित, पांढुर्ली, विंचुरी दळवी, दोनवाडे, राहुरी परिसरातील नागरिकांचा याठिकाणी राबता असतो. सध्या जुन्या नोटा व्यवहारातून बाद झाल्याने त्या जमा करण्यासाठी नागरिक बँकेत मोठ्या प्रमाणावर येत आहेत. याठिकाणी ज्येष्ठ नागरिक पेन्शन घेण्यासाठी आले तर त्यांना साधे बसण्यासाठी बाक अथवा खुर्च्यांची सुविधा नाही. त्यामुळे ज्येष्ठ नागरिकांचे होत असल्याचे ते सांगतात. बँक प्रशासनाने कुठलाही प्रकारची पार्किंग व्यवस्था केलेली नाही सकाळी १० ते दुपारी ३ वाजेदरम्यान या परिसरात वाहतूक सदैव जाम असते. यामुळे अनेकवेळा नागरिकांचे याठिकाणी छोटेमोठे वादही होतात. बँकेत ग्राहकांनी जर पासबूकवर एंट्री करून मागितली तर दुपारी ३ वाजेनंतर या असे सांगण्यात येते. त्यामुळे बाहेर गावाहून आलेल्या नागरिकांच्या दिवस खर्ची होतो तर शाखा व्यवस्थापकदेखील मनमानी कारभार करत असल्याच्या अनेक तक्रारी आहेत. परिणामी, ग्रामीण भागातील नागरिकांना पुरेशी माहिती मिळत नसल्याने महिला ग्राहकांचे हाल होत आहेत.
मोबाइल अॅप डाउनलोड करा आणि राहा अपडेट
